1, 2. (a) Long wanem wei nao disfala nogud world hem olsem datfala criminal wea olketa redi for killim hem dae? (Lukim piksa long start bilong study.) (b) Bihaen Jehovah finisim disfala nogud world, hao nao feeling bilong evriwan long heven and long earth?

TINGIM diswan. Long wanfala prison, olketa gard leadim wanfala raf criminal go long ples for killim man dae. Taem olketa wakabaot witim hem olketa gohed singaot olsem: “Hem dae wan finis!” Why nao olketa tok olsem? Bikos nomata man hia hem no sik and hem laef yet bat olketa judgem hem finis for hem dae. So hem olsem hem dae finis. *

² Disfala nogud world hem olsem disfala criminal wea olketa redi for killim hem dae. Bible sei: “World bae finis.” (1 John 2:17) Jehovah disaedem finis disfala world bae hem finis. Bat wei wea God judgem disfala world hem difren from wei wea olketa judgem datfala criminal. Samfala pipol maet tingse hem no stret for datfala criminal hem dae and maet olketa trae for stopem datwan for no happen. Bat Jehovah hem perfect and  disison wea hem mekem for distroem disfala world hem barava stret. (Deut. 32:4) Bae hem no changem disison bilong hem. Bihaen hem finisim disfala world, evriwan long heven and long earth bae savve wei wea Jehovah hem judgem disfala world hem barava stret. Evriwan bae hapi tumas!

3. Wanem fofala nogud samting nao Kingdom bilong God bae finisim?

³ Wanem nao disfala toktok “world” savve minim? Hem savve minim olketa nogud samting wea savve happen evriday. Klosap nao evri nogud samting hia bae finis. Diswan hem wanfala long olketa gud samting wea Kingdom bilong God bae duim long future. (Matt. 24:14) Long disfala study, bae iumi storyim fofala nogud samting wea Kingdom bilong God bae finisim. Hem nao olketa nogud pipol, olketa organization wea duim nogud samting, olketa rabis samting wea pipol duim, and olketa samting wea mekem pipol safa. Taem iumi storyim olketa samting hia, bae iumi lanem (1) hao diswan affectim iumi, (2) wanem Jehovah bae duim, and (3) wanem nao bae kamap bihaen.

4. Hao nao olketa samting wea olketa nogud pipol duim affectim iumi distaem?

⁴ Hao nao olketa samting wea olketa nogud pipol duim affectim iumi distaem? Aposol Paul sei long olketa last day, ‘evri samting bae hem hard tumas.’ Hem sei tu: “Wei bilong olketa nogud man and olketa man for laea bae worse moa.” (2 Tim. 3:1-5, 13) Waswe, iu lukim diswan happen? Staka long iumi kasem nogud samting from wei wea pipol spoelem narawan, heitim narawan, and from olketa raf criminal. Samfala nogud pipol no shame for duim nogud samting. Olketa narawan laea for helpem pipol batawea olketa duim nogud samting for spoelem olketa. Nomata kaen samting olsem no happen long iumi, wanem olketa nogud pipol hia duim hem still affectim iumi. Iumi savve sorre tumas taem iumi herem wei wea pipol treatim nogud olketa pikinini, olketa olo, and olketa wea no savve protectim olketa seleva. Wei bilong olketa nogud pipol hia hem olsem wei bilong olketa animal or olketa demon. (Jas. 3:15) Nomata olsem, iumi hapi bikos Bible hem givim iumi hope.

5. (a) Wanem chance nao olketa nogud pipol garem yet? (b) Wanem nao bae happen long olketa wea no laek for changem nogud wei bilong olketa?

⁵ Wanem nao Jehovah bae duim? Distaem, Jehovah givim chance long olketa nogud pipol for changem wei bilong olketa. (Isa. 55:7) Nomata olketa nogud pipol bae finis, Jehovah no judgem olketa yet. Bat wanem nao bae happen long olketa wea no laek for change and gohed duim olketa nogud samting go kasem taem bilong datfala big trabol? Jehovah talem finis hem bae finisim olketa nogud pipol long disfala world. (Readim Psalm 37:10.) Staka pipol distaem savve haedem nogud samting wea olketa duim and olketa tingse bae olketa no kasem panis from datwan. (Job 21:7, 9) Bat Bible sei: “God hem lukluk long wei bilong olketa man and hem lukim evri ples wea olketa go long hem. No eni ples hem barava dark mekem olketa nogud man hia savve haed long hem.” (Job 34:21, 22) So hem hard for man haed from Jehovah. Hem savve lukim evri samting wea olketa nogud man duim. Bihaen Armageddon, nomata iumi lukaotem olketa, bae iumi no savve faendem olketa. Olketa bae nomoa nao!—Ps. 37:12-15.

6. Bihaen God finisim olketa nogud pipol, olketa hu nao bae stap long earth, and hao nao datwan hem wanfala gud nius?

 ⁶ Bihaen God finisim olketa nogud pipol, olketa hu nao bae stap long earth? Jehovah promis hem “bae givim earth long olketa wea hambol, and olketa bae hapi fogud bikos evriwan bae garem peace.” Datfala psalm hem sei tu: “Olketa wea raeteous bae stap long earth, and olketa bae stap for olowe.” (Ps. 37:11, 29) Hu nao olketa hia wea “hambol” and olketa wea “raeteous”? Olketa wea hambol, hem olketa man wea willing for lane from Jehovah and obeyim hem. And olketa wea raeteous, hem olketa wea barava laek for duim wanem God sei hem stret. Long world distaem, olketa nogud pipol nao staka winim olketa gud pipol. Bat long niu world, olketa wea hambol and olketa wea raeteous nomoa bae stap and mekem disfala earth for kamap paradaes!

7. Hao nao olketa organization wea duim nogud samting affectim iumi distaem?

⁷ Hao nao olketa organization wea duim nogud samting affectim iumi distaem? Staka taem olketa organization nao kosim staka nogud samting wea happen long disfala world. Olketa religion laea long staka million pipol. Olsem example, olketa teachim laea samting abaotem God, olketa sei Bible no fitim iumi distaem, and olketa talem olketa laea story abaotem future bilong iumi olketa man and disfala earth. Olketa gavman wea corrupt sapotim olketa war and no stopem pipol for raf long olketa narawan from difren ples. Olketa spoelem pipol wea poor and olketa wea no fit for protectim olketa seleva. Kaen gavman olsem kamap rich and garem paoa bikos olketa favorim pipol or tekem olketa bribe. Olketa big bisnis wea greedy spoelem environment, spoelem olketa natural resource, and mekius long pipol mekem olketa kamap rich. Tru nao, olketa organization wea duim nogud samting mekem staka pipol safa tumas distaem.

8. Wanem nao Bible talem bae happen long olketa organization wea pipol tingse olketa strong tumas distaem?

⁸ Wanem nao Jehovah bae duim? Bigfala trabol bae start taem olketa gavman attakim datfala jury woman wea Bible kolem long Bigfala Babylon, wea hem nao evri false religion. (Rev. 17:1, 2, 16; 18:1-4) Evri religion hia bae finis for olowe. Bat wanem nao bae happen long olketa nara organization wea duim olketa nogud samting? Bible sei olketa organization hia olketa olsem strongfala maunten and olketa island, wea luk olsem no eniwan savve finisim olketa. (Readim Revelation 6:14.) Bat Bible sei tu, olketa gavman and evri nara organization wea no sapotim Kingdom bilong God bae olketa finis. Datwan bae happen long end bilong bigfala trabol. (Jer. 25:31-33) Bihaen datwan, no eni organization wea duim nogud samting bae stap!

9. Why nao iumi sure datfala “niu earth” bae hem barava organize gud?

⁹ Bihaen God finisim olketa organization wea duim nogud samting, wanem nao bae happen? Waswe, bihaen Armageddon bae eni organization stap long earth? Bible sei: “Iumi weitim wanfala niu skae and wanfala niu earth wea hem promisim, wea evri samting bae raeteous.” (2 Pet. 3:13) Oldfala skae and oldfala earth hem nao olketa gavman distaem and pipol wea sapotim olketa. Bihaen olketa finis, wanem nao  bae changem olketa? “Wanfala niu skae and wanfala niu earth.” Datfala niu skae hem niu gavman, wea hem nao datfala Kingdom, wea Jesus Christ and 144,000 rul insaed. Datfala niu earth hem olketa pipol wea Kingdom bilong God bae rulim olketa. Jesus and olketa wea rul witim hem bae barava followim wei bilong Jehovah wea no laekem eni samting for olobaot. (1 Cor. 14:33) So disfala “niu earth” bae hem barava organize gud, bikos olketa gudfala man nao bae organizem olketa samting. (Ps. 45:16) Christ and 144,000 wea rul witim hem nao bae leadim olketa man hia. Tingim taem wea no eni nogud organization bae stap and wanfala organization wea hem no savve corrupt, hem nomoa bae stap for olowe!

10. Wanem nao olketa rabis samting wea pipol duim long ples wea iu stap, and hao nao diswan affectim iu and famili bilong iu?

¹⁰ Hao nao olketa rabis samting wea pipol duim affectim iumi distaem? Iumi stap long world wea pipol duim staka rabis samting, olsem wei for durong, wei for no honest and wei for raf tumas. Olketa movie, TV program, music, and olketa buk mekhae long olketa samting hia, and datwan mekem pipol for ting nating nomoa long olketa standard bilong Jehovah. (Isa. 5:20) Olketa dadi and mami mas waka hard for protectim olketa pikinini from olketa rabis samting hia. Tru nao, evri tru Christian mas waka hard for no letem olketa samting hia for spoelem wei wea olketa fren witim Jehovah.

11. Wanem nao iumi lanem from samting wea Jehovah duim long Sodom and Gomorrah?

¹¹ Wanem nao Jehovah bae duim? Tingim samting wea Jehovah duim long Sodom and Gomorrah from pipol long there duim olketa rabis samting. (Readim 2 Peter 2:6-8.) Lot hem wanfala raeteous man, and hem and famili bilong hem safa tumas bikos pipol wea stap raonem olketa duim olketa rabis samting. From datwan, Jehovah finisim Sodom and Gomorrah. Datwan hem “showimaot samting wea bae kasem pipol wea no followim God” distaem tu. Jehovah bae finisim evri rabis samting wea pipol duim distaem, olsem hem duim long bifor.

12. Wanem nao samfala samting wea iu laek for duim long niu world?

¹² Bihaen God finisim olketa rabis samting wea pipol duim, wanem nao bae happen? Long niu world iumi bae hapi for duim staka gudfala samting. Olsem example, iumi bae mekem disfala earth kamap paradaes, and wakem haos for iumiseleva and for olketa narawan. Iumi bae welkamim staka million pipol wea bae laef bak and teachim olketa abaotem Jehovah and evri samting wea hem duim for olketa man. (Isa. 65:21, 22; Acts 24:15) Long datfala taem, bae iumi duim staka samting wea bae mekem iumi hapi and mekhae long Jehovah!

13. Wanem nao kamaot from wei wea Satan, Adam and Eve againstim Jehovah?

¹³ Hao nao olketa nogud samting wea happen distaem affectim iumi? Pipol safa tumas from disfala world hem fulap long olketa nogud pipol, olketa organization wea duim nogud samting, and olketa rabis samting wea pipol duim. Iumi evriwan kasem nogud samting from olketa samting olsem war, wei for poor, wei for heitim  narawan, sik, and dae. Olketa nogud samting hia kasem iumi bikos Satan, and Adam and Eve olketa againstim Jehovah. So iumi evriwan kasem nogud samting from wanem olketa duim.

14. Wanem nao Jehovah bae duim long olketa nogud samting wea mekem pipol safa distaem?

¹⁴ Wanem nao Jehovah bae duim? Tingim samfala example. Jehovah bae finisim olketa war. (Readim Psalm 46:8, 9.) Hem bae finisim sik. (Isa. 33:24) Hem bae finisim dae. (Isa. 25:8) No eniwan bae poor. (Ps. 72:12-16) And Jehovah bae finisim olketa nara nogud samting wea mekem pipol safa tumas distaem. Hem bae finisim tu olketa samting wea Satan and olketa demon iusim for spoelem iumi distaem!—Eph. 2:2.

15. Bihaen Armageddon, wanem nao samfala samting wea bae finis for olowe?

¹⁵ Tingim taem wea bae no eni war, sik, or dae! Bae no eni army, olketa samting for faet, or olketa war memorial. Iumi bae no needim hospital, olketa doctor, nurse, olketa morgue, or olketa beregraon. No eni criminal bae stap, so iumi no needim olketa police, olketa security alarm, and maet iumi no needim lok and key tu! Evri nogud samting wea mekem pipol safa bae finis for olowe.

16, 17. (a) Bihaen Armageddon, laef bilong iumi bae hao? Storyim example. (b) Wanem nao iumi savve duim mekem iumi laef taem disfala world bae finis?

¹⁶ Taem evri nogud samting hem finis, laef bae hem hao? Maet hem hard for iumi tingim datwan bikos iumi getius long olketa nogud samting wea kasem iumi for longfala taem finis. Olsem example, pipol wea stap klosap long road getius nao long noise bilong olketa trak wea go olowe long datfala road. And tu, pipol wea stap klosap ples for torowem rabis getius long smel bilong datfala rabis. Bat taem evri nogud samting hia hem finis, iumi bae feel gud and barava hapi!

¹⁷ Wanem nao bae happen bihaen evri nogud samting wea kasem iumi hem finis? Psalm 37:11 sei: ‘Pipol bae hapi fogud bikos evriwan bae garem peace.’ Iumi barava hapi tumas bikos diswan nao laef wea Jehovah laekem iumi for garem! Nomata iumi stap long olketa taem wea hem no isi, iumi laek for gohed for fren gud witim Jehovah and followim organization bilong hem. Iu garem nambawan hope for future, so iu mas tingim olowe, tingim olketa gud samting wea iu bae kasem, and storyim datfala hope long olketa narawan. (1 Tim. 4:15, 16; 1 Pet. 3:15) Taem iu duim datwan, iu savve sure taem disfala nogud world hem finis bae iu no dae and bae iu hapi for olowe!