Skip to content

Skip to table of contents

Klosap Nao God Bae Finisim Evri Nogud Samting

Klosap Nao God Bae Finisim Evri Nogud Samting

‘O [Jehovah]! Hao long nao yu no lisin kam long mi taem mi gohed fo krae long yu fo help? Hao long nao bae yu no sevem mifala, taem olketa nogud pipol gohed mekem mifala safa?’ (Habakuk 1:2, 3) Habakkuk, wea hem profet bilong God, hem nao talem datfala toktok. Waswe, samting wea hem askem showimaot hem no garem faith? Nomoa! God comfortim Habakkuk and sei Hem markem taem finis for finisim olketa nogud samting wea mekem pipol safa.—Habakuk 2:2, 3.

Taem iu or eniwan long famili kasem nogud samting, hem isi for tingse God slow tumas for helpem iumi. Bat Bible sei: “Jehovah hem no delay for duim samting wea hem promisim, wea hem nao tingting bilong samfala, bat hem patient witim iufala. Diswan hem bikos hem no laekem eniwan for dae bat hem laekem evriwan for garem chance for repent.”—2 Peter 3:9.

WANEM TAEM NAO GOD BAE DUIM SAMTING?

Barava klosap nao! Jesus sei wanfala genereson bae lukim olketa samting wea bae happen wea showimaot “world hem gogo for finis?” (Matthew 24:3-42) From profesi wea Jesus talem kamap tru distaem, datwan showimaot klosap nao God bae finisim evri nogud samting wea kasem iumi olketa man. *

Bat wanem nao God bae duim for finisim evri nogud samting hia? Taem Jesus stap long earth hem duim olketa samting wea showimaot hem kasem paoa from God for duim datwan. Tingim olketa example hia.

Olketa Natural Disaster: Taem Jesus and olketa aposol gogo insaed boat long Sea long Galilee, wanfala big wind klosap mekem boat bilong olketa for sink daon. Samting wea Jesus duim showimaot hem and Dadi bilong hem garem paoa for kontrolem weather. (Colossae 1:15, 16) Jesus sei nomoa long wind and sea: “Kwaet!” Semtaem nomoa, “wind hem stop and sea hem fine nao.”—Mark 4:35-39.

Sik: Staka pipol lukim taem Jesus healim pipol wea blind, kripol, olketa wea garem sik epilepsy, leprosy, and evri difren kaen sik. “Hem healim evriwan wea sik.”—Matthew 4:23, 24; 8:16; 11:2-5.

Kaikai Hem Short: Jesus iusim paoa wea hem kasem from Dadi bilong hem for feedim staka pipol witim lelebet kaikai nomoa. Bible storyim tufala taem nao hem feedim staka thousand pipol long lelebet kaikai nomoa.—Matthew 14:14-21; 15:32-38.

Dae: Thrifala resurrection wea Jesus duim pruvim Jehovah garem paoa for mekem olketa wea dae finis for laef bak moa. Wanfala long olketa hia hem dae finis for fofala day.—Mark 5:35-42; Luke 7:11-16; John 11:3-44.

^ par. 5 For samfala information moa abaotem olketa last day, lukim chapter 9 bilong disfala buk Wanem Nao Iumi Savve Lanem Long Bible? wea olketa Jehovah’s Witness pablisim and hem stap tu long www.jw.org.