Skip to content

Skip to table of contents

Iu Savve Laef Olowe Long Earth

Iu Savve Laef Olowe Long Earth

DATWAN HEM NAMBAWAN HOPE! God wea wakem iumi sei iumi savve laef olowe long earth. Bat staka pipol no bilivim datwan. Samfala sei: ‘Iumi evriwan bae dae. . . . Hem normal samting for man born kam and then gogo hem dae.’ Olketa narawan sei iumi savve laef olowe bat no long earth. Olketa sei bihaen man dae hem go ap and laef olowe long heven. Hao nao tingting bilong iu abaotem diswan?

Tingim diswan: “Waswe, hao God wakem iumi olketa man showimaot iumi savve laef for longtaem or short taem nomoa? Wanem nao plan bilong God for earth and iumi olketa man? Hao nao dae hem kasem iumi olketa man?” Hem gud for ting raonem ansa for olketa kwestin hia wea stap insaed Bible.

IUMI OLKETA MAN BARAVA DIFREN

Long evri samting wea God wakem, iumi olketa man barava difren from olketa nara samting wea laef long earth. Long wanem wei? Bible sei iumi olketa man nomoa God wakem iumi for “tekem wei blong hem.” (Jenesis 1:26, 27) Wanem nao datwan minim? Diswan minim iumi savve garem and showimaot olketa wei bilong God, olsem love and justice.

Nara samting, iumi olketa man savve ting raonem samting, and iumi fit for luksavve wanem hem stret and no stret, and iumi laek for savve long God and worshipim hem. From iumi garem olketa wei hia, iumi savve tinghae long olketa nambawan samting long universe, olketa barava naes samting long earth, art, and music. Winim datwan, iumi nomoa savve garem tingting for laek worshipim God. Olketa wei hia mekem iumi barava difren from eni nara samting wea laef long earth.

Tingim diswan: Sapos hem plan bilong God for iumi laef for short taem nomoa, waswe, hem mek sense for hem wakem iumi for garem olketa nambawan wei hia, and tu, for gohed lane for showimaot olketa wei hia long gudfala wei? Tru samting nao, God wakem iumi for garem and for showimaot olketa spesol wei hia mekem iumi savve enjoyim laef long earth for olowe.

PLAN BILONG GOD FOR EARTH

Bat samfala pipol sei hem no plan bilong God for iumi olketa man for laef olowe long earth. Olketa sei God wakem earth for iumi stap insaed for short taem nomoa, for God testim iumi for luksavve hu nao fit for go long heven for stap olowe witim hem. Bat sapos datwan hem tru, hem olsem iumi sei God  nao kosim evri nogud samting wea gohed for happen long earth. Bat kaen tingting olsem hem no tru bikos wei bilong God hem no olsem. Bible storyim God olsem: “Wei blong hem hemi gud tumas, an hemi stret olowe nomoa. . . . Hemi stret nomoa an hemi no save duim eni nogud samting.”—Diutronomi 32:4.

Bible showimaot plan bilong God for disfala earth. Hem sei ‘heven hemi ples blong Jehovah, bat wol [“earth,” NW], hemi givim long man.’ (Sams 115:16) Tru nao, God wakem earth for hem hom bilong iumi olketa man, and hem putim evri samting wea iumi needim for enjoyim laef for olowe long earth.—Jenesis 2:8, 9.

‘Heven hemi ples blong Jehovah, bat wol [“earth,” NW], hemi givim long man.’—Sams 115:16

Bible storyim tu plan bilong God for iumi olketa man. Hem talem firstfala man and woman for “garem plande pikinini and mekem earth fulap long pipol and lukaftarem earth. . . . Evri samting wea laef long earth mas stap anda long [tufala]” tu. (Genesis 1:28, NW) Hem wanfala privilege for tufala garem staka pikinini and for mekem full earth kamap Paradaes! Adam and Eve and olketa pikinini bilong tufala garem hope for laef olowe long earth, and no for laef long heven.

WHY NAO IUMI DAE?

So, why nao iumi dae? Bible showimaot wanfala angel long heven trae for spoelem plan bilong God long garden long Eden. Gogo hem kamap enemy bilong God, wea nem bilong hem Satan, and nara nem bilong hem Devil. Wanem nao hem duim?

Satan switim Adam and Eve for againstim God. Taem Satan sei God no laekem tufala for kasem gud samting, wea hem nao for disaedem seleva wanem hem stret and wanem hem no stret, tufala followim Satan and againstim God. Wanem nao kamaot from datwan? Gogo tufala dae olsem Jehovah talem tufala firstaem. Tufala no garem nao hope for laef olowe insaed Paradaes long earth.—Jenesis 2:17; 3:1-6; 5:5.

Samting wea Adam and Eve duim hem spoelem evri man kam kasem distaem. Bible sei: “Sin hem kasem evriwan long world bikos long wanfala man [Adam] nomoa. From olketa sin, olketa dae, dastawe evriwan dae bikos evriwan sin.” (Rome 5:12) Iumi dae bikos iumi kasem sin from Adam and Eve, and no bikos datwan hem plan bilong God.

IU SAVVE LAEF OLOWE LONG EARTH

Wanem hem happen long garden long Eden hem no stopem plan bilong God for iumi olketa man and for disfala earth. Bigfala love wea God garem and justice bilong hem mekem hem laek for duim samting for mekem iumi free from sin and dae. Aposol Paul sei: “Pei wea sin givim hem dae. Bat present wea God givim hem laef olowe bikos long samting wea Lord bilong iumi Christ Jesus hem duim.” (Rome 6:23) From God lovem iumi, “hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) From Jesus willing for sakrifaesim laef bilong hem olsem wanfala ransom, datwan openem wei for iumi kasem bak evri samting wea Adam lusim. *

Klosap nao earth bae kamap paradaes olsem God promisim. Iu bae fit for kasem diswan sapos iu followim disfala toktok bilong Jesus: “Go insaed long smolfala gate, bikos narafala road hem stap wea waed and isi for wakabaot long hem and staka pipol wakabaot followim datfala road. Bat taem olketa kasem end long road hia, bae olketa dae. Samfala pipol nomoa faendem datfala gate wea smol and datfala road wea no isi for wakabaot long hem. Bat taem olketa kasem end bilong datfala road, olketa bae kasem laef olowe.” (Matthew 7:13, 14) Future bilong iu hem depend long wanem iu chusim. Wanem nao bae iu disaed for duim?

^ par. 17 For savve moa abaotem wanem ransom savve duim for iumi, lukim chapter 5 long buk, Wanem Nao Iumi Savve Lanem Long Bible?, wea Olketa Jehovah’s Witness pablisim. Hem stap tu long www.jw.org.