Skip to content

Skip to table of contents

Future Bilong Iu Depend Long Wanem Iu Disaedem!

Future Bilong Iu Depend Long Wanem Iu Disaedem!

WASWE, MAN SELEVA SAVVE DISAEDEM FUTURE BILONG HEM? Samfala pipol bilivim God disaedem finis future bilong iumi, or kontrolem wanem bae happen long future, so iumiseleva no savve disaedem future bilong iumi. Taem olketa no kasem wanem olketa laekem, olketa savve sei, “Kanse nao, laef olsem nao!”

Staka pipol savve barava feel nogud taem olketa lukim olketa nogud samting wea no followim justice happen insaed long world. Maet olketa traem best for garem gudfala laef, bat wanem olketa planim hem brekdaon olowe nomoa bikos long war, crime, natural disaster, and sik. Maet olketa ting olsem: “Mi hard waka nating for wat nomoa ia!”

Hem tru, samting iumi no expectim savve seknomoa happen and spoelem plan bilong iumi. (Eklesiastes 9:11) Nomata olsem, for kasem laef olowe long future hem depend long wanem iu disaedem distaem. Bible nao talem datwan. Distaem bae iumi storyim wanem Bible talem.

Moses wea leadim nation bilong Israel bifor hem sei long olketa Israelite wea redi for go insaed long Promis Land: “Waswe, yufala laekem laef, o yufala laekem dae? ?Yufala laekem [Jehovah] fo blesim yufala, o yufala laekem [Jehovah] fo spoelem yufala? !Mi laekem tumas fo yufala siusim laef! Yufala mas lavem [Jehovah], God blong yufala, an herem hem an tinghevi long hem. [Jehovah] nomoa hemi save givim laef long yufala an olketa long laen blong yufala.”Diutronomi 30:15, 19, 20.

“Waswe, yufala laekem laef, o yufala laekem dae? ?Yufala laekem [Jehovah] fo blesim yufala, o yufala laekem [Jehovah] fo spoelem yufala? !Mi laekem tumas fo yufala siusim laef!”—Diutronomi 30:19

Tru nao! God sevem olketa Israelite from wei for slave long Egypt, and distaem olketa garem chance for go insaed long Promis Land wea olketa bae garem gudfala laef and no slave moa. Bat olketa bae no seknomoa kasem evri samting hia. For kasem olketa blessing hia, olketa mas “siusim laef.” Datwan minim olketa mas ‘lavem God, herem hem, an tinghevi long hem.’

Distaem, iu tu mas disaedem semkaen samting, and wanem iu disaedem bae affectim future bilong iu. Sapos iu disaed for lovem God, herem hem, and followim hem, hem olsem iu chusim laef, wea hem nao for laef olowe long paradaes long earth. Bat wanem hem minim for lovem God, herem hem, and followim hem?

DISAED FOR LOVEM GOD

Love hem main fasin bilong Jehovah. Aposol John sei: “God hem love.” (1 John 4:8) Dastawe taem wanfala man askem Jesus wanem law hem important winim olketa nara law, Jesus sei: “Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.” (Matthew 22:37) For fren gud witim Jehovah God hem no samting wea man duim bikos hem fraet or mas obey nomoa, bat man duim datwan bikos hem lovem God. Bat why nao iumi mas disaed for lovem God?

Jehovah lovem iumi olketa man olsem dadi and mami wea lovem pikinini bilong tufala. Nomata tufala hia no perfect, tufala teachim, encouragem, sapotim, and stretem pikinini bikos tufala laekem hem for hapi and garem gudfala laef. Wanem nao parents laekem pikinini for duim? Tufala laekem hem for lovem tufala and followim wanem tufala teachim mekem hem kasem gud samting. So Dadi bilong iumi long heven tu laekem iumi for tinghae long evri samting wea hem duim for iumi and for lovem hem.

 HEREM TOKTOK BILONG HEM

Taem Bible iusim datfala word “herem” staka taem hem minim for “obey.” Taem iumi sei long pikinini, “Iu herem toktok bilong parents bilong iu,” datwan minim iumi talem hem for obeyim parents bilong hem. So for herem toktok bilong God hem minim for iumi lanem wanem hem laekem and obeyim wanem hem talem. Nomata iumi no savve herem voice bilong Jehovah, iumi savve herem hem taem iumi readim and followim toktok bilong hem insaed Bible.—1 John 5:3.

Jesus talem hem barava important for herem toktok bilong God. Hem sei: “Samting wea mekem man laef nao, hem no kaikai nomoa, bat hem evri toktok wea kamaot from mouth bilong Jehovah.” (Matthew 4:4) Long sem wei wea iumi olketa man needim kaikai for iumi gohed laef, hem barava important for iumi lane abaotem God. Why nao olsem? Wise King Solomon sei: “Wisdom savve protectim man olsem selen savve protectim man. Bat wei for garem savve hem moabeta bikos wisdom nao hem mekem man gohed for laef.” (Ecclesiastes 7:12, NW) Savve and wisdom from God savve protectim iumi distaem and helpem iumi mekem olketa wise disison wea lead go for kasem laef olowe long future.

BARAVA FOLLOWIM HEM

Tingim tokpiksa bilong Jesus wea iumi storyim long article bifor diswan. Hem sei: “Samfala pipol nomoa faendem datfala gate wea smol and datfala road wea no isi for wakabaot long hem. Bat taem olketa kasem end bilong datfala road, olketa bae kasem laef olowe.” (Matthew 7:13, 14) Sapos iumi laek for kasem laef olowe, wea hem nao end long datfala road, bae iumi laek for followim samwan wea savve gud long road hia. Hem nao reason why iumi laek for barava followim God. (Sams 16:8) Bat hao nao bae iumi duim datwan?

Evriday, staka samting stap wea iumi mas duim and laek for duim. From iumi busy tumas, maet iumi no garem taem for tingim wanem God laekem iumi for duim. Dastawe Bible sei: “Lukluk gud long samting wea iufala duim, mekem iufala wise and no olsem pipol wea no wise. Iusim gud taem bilong iufala, bikos iumi stap long barava nogud taem.” (Ephesus 5:15, 16) Iumi bae barava followim God sapos wei for fren witim God nao hem important samting long laef bilong iumi.—Matthew 6:33.

HEM DISISON BILONG IU

Nomata iu no savve duim eni samting for changem wanem iu duim bifor, iu savve distaem for duim samting wea savve helpem iu and famili bilong iu for garem gudfala future. Bible showimaot Dadi bilong iumi long heven, Jehovah God, hem barava lovem iumi and talem iumi wanem hem laekem iumi for duim. Tingim toktok bilong profet Micah:

“Hem talem iu finis wanem hem laekem. And wanem nao Jehovah laekem iu for duim? Hem laekem iu for duim stret samting, for evritaem laek for faithful, and for hambol taem iu wakabaot witim God bilong iu!”Micah 6:8, NW.

Waswe, bae iu willing for barava followim Jehovah and kasem olketa blessing wea hem promisim for olketa wea fren gud witim hem? Datwan hem disison bilong iu!