Skip to content

Skip to table of contents

Olketa Profesi wea Kamap Tru Finis

Olketa Profesi wea Kamap Tru Finis

Long first article, iumi lanem wanfala kastom woman long Delphi givim rong information long Croesus, and from datwan king bilong Persia winim hem long faet. Bat Bible hem difren. Hem storyim wanfala spesol profesi abaotem king bilong Persia, and evri samting wea profesi hia storyim hem kamap tru.

Samting olsem 200 year bifor disfala king bilong Persia hem born, profet Isaiah talem finis nem bilong king hia, Cyrus, and hem storyim olketa samting wea Cyrus bae duim for distroem maeti taon bilong Babylon.

Aesaea 44:24, 27, 28 sei: “[Jehovah] nao . . . hemi tok olsem, . . . ‘Mi save tok nomoa, an dip si an olketa riva tu i kamap drae nao. Nomata hemi wanfala hae king, mi nomoa mi talem King Saeras fo lukaftarem olketa pipol long nem blong mi, an bae hemi duim wanem mi laekem. Ya, bae hemi tokstrong long olketa pipol fo bildimbaek moa Jerusalem an Tambuhaos.’”

Herodotus, wanfala Greek savveman, sei army bilong Cyrus changem gogo bilong datfala Euphrates River, wea ran long midol long datfala taon long Babylon. Datwan mekem wei for army bilong Cyrus for go insaed datfala taon followim datfala river. Bihaen Cyrus tekovarem datfala taon, hem letem olketa Jew wea prisoner long Babylon for go bak and buildim moa Jerusalem wea distroe 70 year go finis.

Aesaea 45:1 sei: “[Jehovah] hemi siusim finis Saeras fo kamap wanfala hae king. [Jehovah] hemi siusim hem fo faet an tekova long olketa narafala kantri an fo tekemaot paoa blong olketa narafala king, an fo brekemdaon olketa bikfala geit long olketa taon mekem olketa no save satem. [Jehovah] nao hemi tok olsem long King Saeras.”

From olketa long Babylon no wari for satem olketa big gate bilong datfala taon, hem isi nao for army bilong Persia for go insaed. Sapos olketa savve long plan bilong Cyrus, bae olketa satem evri gate wea open go insaed long river. Bat from olketa no savve, olketa no protectim taon bilong olketa.

Disfala spesol profesi hem wanfala nomoa long staka profesi long Bible wea kamap tru. * Olketa man wea sei olketa savve talem wanem bae happen long future sei olketa false god bilong olketa nao helpem olketa for duim datwan. Bat olketa profesi long Bible kam from God wea sei olsem: “Longtaem bifoa yet, mi talemaot finis olketa samting wea hemi hapen. Longtaem bifoa, mi talemaot finis olketa samting wea bae hemi hapen bihaen.”—Aesaea 46:10.

Trufala God, wea nem bilong hem Jehovah, hem nomoa savve duim datwan. Datfala nem Jehovah  hem minim, “Hem Savve Duim Eni Samting.” Diswan showimaot God nomoa savve long wanem bae happen long future and for mekem wanem hem happen for fitim plan bilong hem. So iumi barava sure evri promis wea hem talem bae kamap tru.

OLKETA PROFESI WEA KAMAP TRU DISTAEM

Waswe, iu laek for savve long samfala profesi abaotem olketa samting wea happen long taem bilong iumi? Samting olsem 2,000 year go finis, Bible sei “long olketa last day bae . . . evri samting hem hard tumas.” Olketa last day bilong wanem? Hem no olketa last day bilong disfala earth or iumi olketa man, bat hem olketa last day bilong evri nogud samting and hard taem wea kasem iumi olketa man for staka thousand year finis. Bae iumi storyim tu-thri profesi wea showimaot iumi stap long “olketa last day.”

2 Timothy 3:1-5 sei: “Long olketa last day . . . , pipol bae tingim olketa seleva nomoa, laekem tumas selen, tok praod, mekhae long olketa seleva, tok spoelem God and man, and no obeyim dadi and mami. Olketa bae no savve tinghae, bae no faithful, no garem love insaed long famili, and no willing for agree. Olketa bae laea for spoelem narawan, no savve kontrolem seleva, raf, and no laekem gud samting. Olketa bae spoelem fren bilong olketa, bighed, and praod tumas. Olketa bae no lovem God, bat bae interest nomoa for enjoyim seleva. Hem bae luk olsem olketa worshipim God bat samting wea olketa duim showimaot olketa nating worshipim hem nomoa.”

Waswe, iu lukim pipol garem olketa wei olsem distaem? Waswe, iu luksavve staka pipol distaem lovem olketa seleva, laekem selen tumas, and praod tumas? Waswe, iu luksavve pipol tingim olketa seleva nomoa and no willing for agree witim narawan? Masbi iu lukim staka young wan no obeyim dadi and mami, and pipol no lovem God bat interest nomoa for enjoyim seleva. Olketa samting hia gohed for kamap worse evriday.

Matthew 24:6, 7 sei: “Iufala [bae] herem olketa war wea gohed klosap long ples wea iufala stap and herem nius abaotem war long olketa nara ples. . . . Bae pipol long wanfala ples faetem pipol long nara ples and pipol long wanfala kantri faetem pipol long nara kantri.”

Samfala report sei start kam long year 1914, namba bilong pipol wea dae long war hem winim 100 million pipol, and namba hia hem winim population bilong staka kantri. Tingim staka pipol wea safa and sorre bikos long datwan. Waswe, olketa kantri lane from mistek bilong olketa and duim samting for finisim war?

Matthew 24:7 sei: “Olketa taem bilong bigfala hangre bae kasem plande pipol.”

Datfala organization World Food Programme sei: “Nomata inaf kaikai stap long earth wea fitim evriwan, 815 million pipol hangre evriday. Bat namba bilong pipol wea no garem inaf kaikai hem winim datwan.” Samting olsem thri million pikinini dae evri year bikos olketa hangre.

Luke 21:11 sei: “Olketa bigfala earthquake bae sekem staka ples.”

Evri year, samting olsem 50,000 big earthquake happen wea iumi savve feelim. Samting olsem 100 long olketa earthquake hia distroem olketa building, and evri year wanfala barava big earthquake wea winim olketa narawan savve happen. Wanfala report sei start long 1975 go kasem year 2000, samting olsem 471,000 pipol nao dae long olketa earthquake.

Matthew 24:14 sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”

Winim eit million Jehovah’s Witness gohed for talemaot gud nius abaotem Kingdom bilong God long 240 kantri raonem earth. Olketa talemaot datfala gud nius long olketa bigfala taon, olketa vilij, olketa ples long bush, and antap long olketa maunten. Profesi hia sei taem God talem pipol bilong hem for stop for duim disfala waka “bihaen datwan nao, world bae finis.” Wanem nao bae happen long datfala taem? Datwan minim evri gavman bilong man bae finis, and Kingdom bilong God nao bae rul ovarem disfala earth. Wanem nao samfala promis wea bae kamap tru taem Kingdom bilong God rul? Nara article bae storyim datwan.