Skip to content

Skip to table of contents

Hem Wanem Kaen God?

Hem Wanem Kaen God?

Taem iumi savve long olketa wei bilong wanfala man, datwan bae helpem iumi for savve hem wanem kaen man, and then bae iumi savve fren gud witim hem. Long sem wei tu, taem iumi savve long olketa wei bilong Jehovah, bae iumi savve hem wanem kaen God and bae iumi fren gud witim hem. God garem staka gudfala wei, bat fofala main wan nao: paoa, wisdom, justice, and love.

GOD GAREM BIGFALA PAOA

‘O Lod [Jehovah]! Yu . . . mekem skae an disfala wol long bikfala paoa bilong yu.’JEREMAEA 32:17.

Olketa samting wea God wakem showimaot hem garem bigfala paoa. Olsem example, taem iu standap aotsaed long hot sun, hao nao iu feel? Bae iu feelim hot bilong sun. Really, iu feelim paoa bilong Jehovah long creation bilong hem. Haomas paoa nao sun garem? Long midol long sun, temperature bilong hem kasem samting olsem 15,000,000 degrees Celsius. Evri second, sun givimaot energy wea semsem olsem staka handred million nuclear bomb wea bosta semtaem.

Bat sun bilong iumi hem smol nomoa sapos iumi comparem witim staka million nara star long universe. Olketa scientist sei wanfala star wea big tumas, wea olketa kolem long UY Scuti, hem samting olsem 1,700 taems big winim sun. Sapos UY Scuti stap long ples wea sun hem stap, from hem big tumas bae hem savve kavarem earth and gogo bae hem kavarem Jupiter tu. Diswan helpem iumi for minim toktok bilong Jeremiah taem hem sei Jehovah God wakem heven and earth, and full universe, long bigfala paoa bilong hem.

 Wanem gud samting nao iumi kasem from paoa bilong God? Sun and olketa nara samting wea God wakem long earth nao mekem iumi gohed for laef. And tu, each wan long iumi kasem gud samting from paoa bilong God. Long wanem wei? Long first century, God givim paoa long Jesus for duim olketa mirakol. Bible sei: “Olketa wea blind savve lukluk nao, olketa wea kripol savve wakabaot, olketa wea garem leprosy olketa gud bak, and olketa wea earpas savve herehere moa. Olketa wea dae finis olketa laef bak.” (Matthew 11:5) Waswe distaem? Bible sei: “[Jehovah] mekem olketa hu i taet fo strong moa.” Bible sei tu: “Olketa hu i trastem [Jehovah], bae i kamap strong moa.” (Aesaea 40:29, 31) God savve givim iumi “strong wea winim strong bilong man” wea savve mekem iumi fit for deal witim olketa test and hard taem wea kasem iumi. (2 Corinth 4:7) Waswe, iu laek for fren witim God olsem wea iusim bigfala paoa bilong hem for helpem iumi bikos hem lovem iumi?

GOD GAREM WISDOM

‘Lod [Jehovah], yu nao yu mekem plande samting tumas. Evrisamting ya hemi somaot yu waes fogud.’SAMS 104:24.

Taem iumi gohed for lane abaotem creation bilong God, datwan mekem iumi tinghae go moa long wisdom bilong hem. Olketa scientist studyim creation bilong Jehovah, and then copyim design bilong creation for wakem gud long olketa samting wea olketa wakem. Diswan olketa kolem biomimetics, and nara nem hem biomimicry. Samfala long olketa samting hia hem olketa smol samting olsem button and zipper go kasem olketa big samting olsem aeroplane.

Hao God wakem eye bilong iumi hem spesol tumas

Iumi savve lukim wisdom bilong God long hao hem designim body bilong iumi olketa man. Tingim hao baby start for grow insaed bele bilong mami. Diswan start taem wanfala cell hem fertilize, and hem garem evri genetic instruction insaed cell hia. Then cell hia divaed long staka cell wea luk semsem. Gogo olketa cell hia change for kamap staka handred difren kaen cell, olsem blood cell, nerve cell, and bone cell. Then olketa kamap olketa organ long body and start for waka. Insaed naen month nomoa, datfala first cell kamap staka billion cell wea hem wanfala baby. Hao baby start and grow insaed bele bilong mami mekem staka agree witim man wea raetem psalm, wea sei: “Mi preisim yu bikos wei wea yu bin mekem mi hemi barava nambawan an hemi spesol.”—Sams 139:14.

Wanem gud samting nao iumi kasem from God hem wise? God wea wakem iumi savve wanem iumi needim for hapi. From hem wise and garem bigfala savve, hem givim iumi gud advaes insaed Bible. Olsem example, Bible sei: ‘Evritaem forgivim narawan.’ (Colossae 3:13) Waswe, datwan hem gud advaes? Ia. Olketa wea duim research faendaot taem man forgivim narawan, datwan savve helpem hem for sleep gud, and daonem blood pressure bilong hem. And tu, diswan helpem man for no isi for kasem sik depression, and olketa nara sik. God hem olsem wanfala fren wea wise and evritaem laek for givim iumi advaes wea savve helpem iumi. (2 Timothy 3:16, 17) Waswe, iu laek for garem kaen fren olsem?

 GOD EVRITAEM FOLLOWIM JUSTICE

“Jehovah barava tinghae long justice.”PSALM 37:28, NW.

God hem evritaem duim stret samting. Bible sei: “Hard tumas for trufala God duim olketa nogud samting, and for Olmaeti duim samting wea no stret!” (Job 34:10, NW) Hem evritaem judgem man long stretfala wei, olsem man wea raetem psalm talem taem hem sei long Jehovah: “Yu [“bae,” NW] jajem evri pipol long stretfala wei.” (Sams 67:4) From Jehovah “lukluk insaet long haat” bilong man, no eniwan savve laea long hem bikos hem evritaem lukim truth abaotem samting and givim stretfala judgment. (Fas Samuel 16:7) And tu, God hem lukim evri samting wea happen long earth wea no followim justice and corruption wea gohed, and hem promis klosap nao bae hem “aotem an torowem olketa ravis pipol an evri nogud man from [“earth,” NW].”—Provebs 2:22.

Bat God hem no raf judge wea laekem tumas for panisim pipol. Long taem wea fitim, hem showimaot mercy long pipol. Bible sei: “Jehovah showimaot mercy and hem kaen” nomata long pipol wea wicked bat olketa repent. Datwan nao tru justice!—Psalm 103:8, NW; 2 Peter 3:9.

Wanem gud samting nao iumi kasem from God evritaem followim justice? Aposol Peter sei: “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.” (Acts 10:34, 35) Iumi kasem gud samting from justice bilong God bikos hem no savve favorim eniwan. God savve hapi long iumi and iumi savve worshipim hem nomata wanem nao kala skin, kantri, education, or living wea iumi garem.

From God no favorim eniwan, iumi evriwan kasem gud samting nomata wanem kala skin or living wea iumi garem

From God laekem iumi for savve and kasem gud samting from justice bilong hem, hem givim iumi konsens. Bible sei konsens hem olsem wanfala law wea stap ‘insaed tingting bilong iumi’ and hem ‘mekem iumi savve’ sapos samting wea iumi duim hem stret or nomoa. (Rome 2:15) Hao nao konsens helpem iumi? Sapos iumi trainim gud konsens bilong iumi, hem bae helpem iumi for no laek duim  nogud samting. And sapos iumi duim nogud samting, konsens savve helpem iumi for repent and stretem datwan. Tru nao, taem iumi savve God hem evritaem followim justice, datwan helpem iumi for fren gud witim hem!

GOD HEM LOVE

“God hem love.”1 JOHN 4:8.

God garem paoa, wisdom, and justice. Nomata olsem, Bible no sei God hem paoa, wisdom, or justice, bat Bible sei God hem love. Why nao olsem? Bikos paoa bilong God nao mekem hem fit for duim samting, and justice and wisdom bilong hem nao kontrolem hao hem duim samting. Bat love nao mekem hem laek for duim samting. Love nao bihaenem evri samting wea hem duim.

Nomata Jehovah no needim eniwan or eni samting, love bilong hem nao mekem hem laek for wakem olketa angel and iumi olketa man for kasem gud samting from love bilong hem and for hem lukaftarem olketa. Hao hem wakem earth for olketa man stap gud and barava enjoyim laef showimaot love bilong hem. And kam kasem distaem hem gohed showimaot love long evriwan taem hem “mekem sun hem shaen long pipol wea gud and pipol wea nogud and hem mekem hem rain long pipol wea raeteous and pipol wea no raeteous.”—Matthew 5:45.

And tu, “Jehovah hem lovem man and hem showimaot mercy long hem.” (James 5:11) Hem blessim olketa wea duim samting for savve long hem and for fren witim hem. God tingim each wan long olketa hia. Bible sei: ‘Hem tingim iu.’1 Peter 5:7.

Wanem gud samting nao iumi kasem from God hem love? Taem iumi lukim wanfala naes sunset, iumi enjoyim tumas. Iumi barava hapi taem iumi herem baby hem laflaf. Love wea famili member garem for iumi mekem iumi feel gud and hapi. Iumi no needim olketa samting hia for laef, bat olketa mekem iumi barava enjoyim laef.

Nara gud samting wea iumi kasem from love bilong God tu hem prea. Bible sei: “Iufala mas no wari abaotem eni samting bat long eni samting wea iufala needim, askem God for datwan long wei for prea long hem witim wei for barava askem help bilong hem and for talem thankiu tu.” From hem olsem dadi wea lovem iumi, hem laekem iumi for talem hem evri wari bilong iumi. Then Jehovah promis for givim iumi “peace bilong God wea winim nao wanem man savve minim” for strongim iumi.—Philippi 4:6, 7.

Taem iumi storyim fofala main wei bilong God hia, paoa, wisdom, justice, and love, waswe, datwan helpem iu for savve gud long God? For mekem iu tinghae go moa long God, mifala encouragem iu for lanem wanem hem duim finis and wanem hem bae duim long future for helpem iu.

HEM WANEM KAEN GOD? No eniwan garem paoa, wisdom, and justice olsem Jehovah. Bat love bilong Jehovah nao iumi tinghae tumas long hem