Skip to content

Skip to table of contents

 CHAPTER 4

Respectim Olketa wea Garem Paoa

Respectim Olketa wea Garem Paoa

“Respectim evri difren kaen man.” —1 PETER 2:17.

1, 2. (a) Why nao hem no isi for respectim olketa wea garem paoa? (b) Olketa wanem kwestin nao bae iumi tingim?

WASWE, enitaem iu lukim pikinini wea nating laek duim wanem dadi or mami talem? Feis bilong hem showimaot hem luksavve hem shud obey, bat hem no laek duim datwan. Hem herem wanem dadi or mami talem and hem savve hem mas obeyim hem. Nomata olsem, hem nating laek obey. Samting wea hem duim showimaot samting wea savve kasem iumi evriwan.

2 Staka taem, hem no isi for respectim olketa wea garem paoa. Waswe, hem no isi for iu tu? Hem no iuseleva nomoa olsem. Distaem, staka pipol no respectim olketa wea garem paoa. Bat Bible talem iumi for respectim olketa. (Proverbs 24:21) For gohed kasem gud samting from love bilong God, iumi mas duim datwan. So hem gud for tingim olketa kwestin hia: Why nao samfala taem hem no isi for respectim olketa wea garem paoa? Why nao Jehovah laekem iumi for respectim olketa? Wanem nao savve helpem iumi for obeyim olketa? Wanem nao iumi savve duim for showimaot iumi respectim olketa?

WHY NAO HEM NO ISI?

3, 4. (a) Sin hem kamap long wanem taem? (b) From iumi man wea sin, why nao hem no isi for respectim olketa wea garem paoa?

3 Iumi bae storyim tufala samting wea mekem hem no isi for respectim olketa wea garem paoa. First samting, iumi man sin. Mek-tu samting, pipol wea garem paoa sin  tu. Sin hem start long garden bilong Eden taem Adam and Eve bighed and no laekem God for rulim tufala. Taem Adam and Eve sin, tufala startim wei for bighed tu. Kam kasem distaem, iumi olketa man savve bighed tu.—Genesis 2:15-17; 3:1-7; Psalm 51:5; Rome 5:12.

4 From iumi man sin, staka savve praod dastawe iumi mas waka hard for gohed hambol. Nomata iumi faithful long God for staka year finis, iumi savve kamap bighed and praod. Tingim Korah. Hem stap witim pipol bilong Jehovah taem olketa kasem hard taem. Nomata olsem, hem laekem tumas for kamap bigman tu and hem no fraet for leadim olketa narawan for againstim Moses, wea hambol winim eni nara man long datfala taem. (Numbers 12:3; 16:1-3) Tingim King Uzziah wea kamap praod tu. Hem go insaed long temple bilong Jehovah for bonem incense wea olketa priest nomoa fit for duim datwan. (2 Chronicles 26:16-21) Tufala kasem nogud samting from tufala bighed. Nomata olsem, iumi savve lanem gud samting from nogud samting wea tufala duim. Iumi mas traem best for no praod wea savve mekem hem no isi for respectim olketa wea garem paoa.

5. Wanem nao olketa nogud samting wea olketa bigman duim?

5 Samting for tingim tu, samfala bigman duim samting wea mekem pipol no respectim olketa. Staka raf and savve barava spoelem and daonem pipol. Long bifor, staka wea garem paoa spoelem pipol tu. (Readim Ecclesiastes 8:9.) Tingim Saul. Taem Jehovah chusim hem for king, hem hambol and gudfala man. Bat gogo hem kamap praod and jealous. Hem spoelem David wea faithful long God. (1 Samuel 9:20, 21; 10:20-22; 18:7-11) Bihaen, David kamap nambawan king long Israel. Hem tingse hem savve duim eni samting nomoa from hem king, so hem stealim waef bilong Uriah. Taem olketa soldia bilong Israel  go faet, king talem olketa for putim Uriah long front mekem enemy killim hem dae. (2 Samuel 11:1-17) Tru tumas, from olketa bigman no perfect, hem no isi for olketa leadim pipol long gudfala wei. Taem olketa no obeyim Jehovah, olketa duim barava nogud samting. Wanfala bigman long Britain storyim wanem samfala pope bilong Catholic Church duim for spoelem pipol long staka difren ples. Hem sei: “Paoa wea man garem savve mekem hem duim nogud samting, and bigfala paoa wea hem garem barava spoelem gudfala wei bilong hem.” Taem iumi savve long nogud samting wea samfala bigman duim, hem gud for tingim kwestin hia: Why nao iumi mas respectim olketa wea garem paoa?

RESPECTIM OLKETA WEA GAREM PAOA

6, 7. (a) Wanem nao bae iumi duim sapos iumi lovem Jehovah, and why nao olsem? (b) Iumi mas ting hao long wei for obey?

6 Iumi respectim olketa wea garem paoa bikos iumi lovem Jehovah, lovem olketa narawan, and iumiseleva tu. From iumi lovem Jehovah winim eni nara samting, iumi laek mekem hem hapi. (Readim Proverbs 27:11; Mark 12:29, 30.) Long Eden, Adam and Eve bighed from tufala no laekem Jehovah for rulim tufala. Start long datfala taem staka pipol long world saedem Satan. Olketa no laekem Jehovah for rulim olketa. Bat iumi hapi tumas for sapotim rul bilong Jehovah. Iumi hapi tumas for readim nambawan toktok long Revelation 4:11. Iumi luksavve Jehovah nomoa fit for rulim heven and earth! Taem iumi evritaem duim wanem Jehovah laekem, iumi showimaot iumi laekem hem nomoa for rulim iumi.

7 Man wea respectim Jehovah bae obeyim hem. Iumi obeyim Jehovah bikos iumi lovem hem. Bat samfala taem, hem no isi for obeyim hem. Long taem olsem, hem gud for iumi lane for obey olsem smol boy wea iumi  storyim finis. Jesus duim wanem Dadi laekem nomata samfala taem hem no isi. Hem sei long Dadi: “No duim samting wea mi laekem, duim nomoa samting wea iu nao laekem.”—Luke 22:42.

8. (a) Hao nao iumi savve showimaot iumi laekem Jehovah for leadim iumi, and Jehovah ting hao long datwan? (b) Wanem nao savve helpem iumi for followim kaonsel and acceptim discipline? (Lukim box wea garem title “ Followim Kaonsel And Acceptim Discipline”.)

8 Distaem, Jehovah no story long iumi wanwan, bat hem iusim Bible and samfala man for story long iumi. Taem iumi respectim olketa wea Jehovah markem for leadim iumi or wea hem letem for leadim iumi, iumi showimaot iumi obeyim hem. Sapos iumi no stap anda long olketa, maet long wei for no followim kaonsel bilong olketa, God bae no hapi long iumi. Taem olketa Israelite bighed and komplen againstim Moses, Jehovah ting long datwan olsem olketa againstim hem.—Numbers 14:26, 27.

9. Why nao iumi respectim olketa wea leadim iumi? Storyim example.

9 Nara reason why iumi respectim olketa wea garem paoa hem bikos iumi lovem pipol. Why nao olsem? Tingim sapos iu wanfala soldia. Sapos evri soldia laek winim faet and laek stap laef, evri soldia mas waka tugeta witim bigman long army, obeyim hem, and respectim hem. Sapos iu bighed and no obey, nogud samting savve kasem evri soldia. Hem tru, olketa army distaem barava spoelem staka samting. Bat Jehovah garem olketa army wea duim gudfala samting nomoa for pipol. Staka taem, Bible sei olsem abaotem God: “Jehovah hem komanda bilong olketa army.” (1 Samuel 1:3) Hem Komanda bilong staka angel long heven. Samfala taem, Jehovah storyim pipol bilong hem long earth olsem army. (Psalm 68:11; Ezekiel 37:1-10) Sapos iumi bighed and no obeyim olketa wea Jehovah markem for leadim iumi, iumi savve mekem  nogud samting kasem olketa brata and sista. Taem wanfala Christian no obeyim olketa elder, maet olketa narawan long kongregeson kasem nogud samting. (1 Corinth 12:14, 25, 26) Taem pikinini no obeyim mami and dadi, evriwan long famili savve kasem nogud samting. Iumi showimaot iumi lovem narawan taem iumi waka hard for respectim and waka tugeta witim hem.

10, 11. Wanem nao nara reason for obeyim olketa wea garem paoa?

10 Nara reason tu for respectim olketa wea garem paoa hem bikos iumi bae kasem gud samting. Staka taem Jehovah talem gud samting wea iumi bae kasem sapos iumi respectim olketa wea garem paoa. Tingim diswan. Taem Jehovah talem olketa pikinini for obeyim dadi and mami, hem sei olketa bae garem gudfala laef and laef longtaem. (Deuteronomy 5:16; Ephesus 6:2, 3) Jehovah talem iumi for respectim olketa elder bikos sapos nomoa, iumi bae no fren gud witim Jehovah. (Hebrew 13:7, 17) Hem talem  iumi tu for obeyim olketa bigman mekem iumi kasem gud samting.—Rome 13:4.

11 Taem iumi savve why Jehovah laekem iumi for obeyim olketa wea garem paoa, iumi bae respectim olketa. Iumi bae storyim thrifala samting for helpem iumi respectim olketa wea garem paoa.

RESPECT LONG FAMILI

12. Wanem waka nao Jehovah markem for hasband duim long famili, and hao nao hem mas duim datwan?

12 Jehovah nao startim famili. From God no laekem eni samting for olobaot, hem givim waka for evriwan insaed famili mekem evriwan savve waka gud tugeta. (1 Corinth 14:33) Hem markem hasband for hed long famili. Hasband respectim Hed bilong hem Christ Jesus taem hem followim wei wea Jesus hed long kongregeson. (Ephesus 5:23) So hasband mas duim gud waka bilong hem and waef shud no duim waka bilong hasband. Hem mas no bossim famili or raf long olketa bat hem mas kaen, lovem, and isi long olketa. Nomata hem hed long famili, hem savve hem stap anda long Jehovah.

Wanfala Christian dadi followim example bilong Christ long wei wea hem duim waka olsem famili hed

13. Hao nao waef savve duim waka bilong hem long famili for mekem Jehovah hapi?

13 Jehovah hem markem waef for helpem hasband. Waef garem waka tu long famili. Dastawe  Bible story abaotem “teaching bilong mami.” (Proverbs 1:8) Nomata olsem, hem mas stap anda long hasband. Christian waef respectim hasband wea hed long famili taem hem helpem hasband for duim waka bilong hem long famili. Waef mas no tok daonem hasband, no switim hem for duim wanem hemseleva laekem, and mas no kamap hed long famili. Bat waef mas helpem and waka tugeta witim hasband. Taem hasband disaedem samting wea waef no hapi long hem, waef savve talem tingting bilong hem long wei wea showimaot respect, bat hem mas gohed stap anda long hasband. Sapos hasband no worshipim Jehovah, waef savve kasem samfala hard taem, bat taem hem gohed for stap anda long hasband, maet hasband laek for lane abaotem Jehovah.—Readim 1 Peter 3:1.

14. Hao nao olketa pikinini savve mekem dadi, mami, and Jehovah hapi?

14 Olketa pikinini mekem Jehovah hapi taem olketa  obeyim dadi and mami. Olketa respectim dadi and mami and mekem tufala hapi tu. (Proverbs 10:1) Sapos famili garem dadi or mami nomoa, hem gud for olketa pikinini mas obey and luksavve mami or dadi barava needim olketa for helpem and waka tugeta witim hem. Taem evriwan long famili duim waka wea God markem for olketa, evriwan bae stap gud and hapi, and olketa mekhae long Jehovah God wea startim famili.—Ephesus 3:14, 15.

RESPECT LONG KONGREGESON

15. (a) Long kongregeson, hao nao iumi savve obeyim Jehovah? (b) Olketa wanem Bible principle nao helpem iumi obeyim olketa wea leadim iumi? (Lukim box wea garem title ‘ Obeyim Olketa Wea Leadim Iufala.’)

15 Jehovah markem Son bilong hem for leadim Christian kongregeson. (Colossae 1:13) Jesus markem ‘wakaman bilong hem wea faithful and wise’ for helpem pipol bilong God fren gud witim God. (Matthew 24:45-47) Governing Body bilong Olketa Jehovah’s Witness nao datfala wakaman wea faithful and wise. Long first century, olketa Christian elder kasem instruction from Governing Body. Governing Body savve talem instruction stret long olketa elder or iusim narawan olsem traveling overseer. Hem semsem tu distaem. Taem iumi respectim olketa elder wea leadim iumi, iumi obeyim Jehovah.—Readim 1 Thessalonica 5:12; Hebrew 13:17.

16. Long wanem wei nao holy spirit markem brata for kamap elder?

16 Olketa elder and ministerial servant no perfect. Olketa tu garem wik point. Nomata olsem, Jehovah givim olketa elder “olsem present” for helpem iumi fren gud witim Jehovah. (Ephesus 4:8) Holy spirit nao markem brata for kamap elder. (Acts 20:28) Long wanem wei? Bifor brata kamap elder, hem mas kasem olketa mark wea Bible talem, wea holy spirit bilong God helpem olketa man for raetem. (1 Timothy 3:1-7, 12; Titus 1:5-9) Nara samting,  olketa elder prea for holy spirit helpem olketa for lukluk sapos brata fit for kamap elder.

17. Why nao samfala taem sista mas kavarem hed?

17 Samfala taem, maet no eni elder or ministerial servant stap for leadim grup for preach. So, nara brata wea baptaes finis savve duim datfala waka. Sapos no eni brata wea baptaes stap, mature Christian sista savve duim datwan. Bat taem sista duim waka wea brata nomoa fit for duim long kongregeson or long haos, sista mas kavarem hed. * (1 Corinth 11:3-10) Taem woman kavarem hed, datwan hem no for daonem hem. Bat hem respectim wei wea Jehovah markem samwan for hed long kongregeson and long famili.

RESPECTIM OLKETA BIGMAN

18, 19. (a) Storyim kam Bible principle long Rome 13:1-7. (b) Wanem nao showimaot iumi respectim gavman?

18 Olketa trufala Christian waka hard for followim Bible principle long Rome 13:1-7. (Readim.) Long datfala scripture, “olketa wea rul” hem minim olketa gavman. From Jehovah letem olketa gavman for rul, olketa duim important waka. Olketa mekem samting long kantri gohed gud, and givim wanem pipol needim. Taem iumi obeyim law bilong gavman, iumi respectim olketa. Iumi peim tax, raetem tru samting long eni pepa bilong gavman, obeyim law bilong gavman saed long iumi wanwan, famili, bisnis, or samting wea iumi garem olsem land and haos. Bat iumi no obeyim olketa bigman sapos olketa talem iumi for duim eni samting for no obeyim God. Iumi bae talem sem toktok wea olketa aposol talem: “God nao hem ruler wea mifala mas obeyim, no olketa man.”—Acts 5:28, 29; lukim box wea garem title “ Hu Nao Mi Shud Obeyim?

 19 Iumi respectim tu olketa bigman taem iumi showimaot gudfala wei long narawan. Maet samfala taem, iumi story witim olketa bigman long gavman. Aposol Paul story witim King Herod Agrippa and Governor Festus. Nomata tufala garem rabis wei, Paul story long wei wea showimaot hem respectim tufala. (Acts 26:2, 25) Nomata iumi story witim bigman long gavman or policeman, hem gud for followim wei bilong Paul. Olketa young Christian wea skul mas traem best for respectim teacher, bigman long skul, and wakaman long skul. Iumi respectim olketa wea tinghae long wanem iumi bilivim, bat iumi respectim tu olketa wea againstim Olketa Jehovah’s Witness. Olketa wea no worshipim Jehovah shud luksavve iumi pipol wea showimaot respect.—Readim Rome 12:17, 18; 1 Peter 3:15.

20, 21. Wanem blessing nao man savve kasem taem hem respectim olketa wea garem paoa?

20 Iumi mas evritaem respectim narawan. Aposol Peter sei: “Respectim evri difren kaen man.” (1 Peter 2:17) Pipol wea luksavve iumi respectim olketa, maet tinghae long datwan. Distaem staka pipol no respectim narawan. Taem iumi respectim narawan, iumi duim wanem Jesus talem. Hem sei: “Sapos iufala letem olketa man lukim laet bilong iufala, olketa bae lukim olketa gudfala samting wea iufala duim. Diswan bae mekem olketa for praisem Dadi bilong iufala long heven.”—Matthew 5:16.

21 Distaem, pipol wea hambol laekem tumas for lane abaotem God. Taem iumi respectim olketa long famili, kongregeson, and gavman, maet samfala bae laek for worshipim God witim iumi. Sapos olsem, datwan nambawan samting! Bat sapos nomoa, Jehovah hapi taem iumi respectim narawan and datwan helpem iumi for gohed kasem gud samting from love bilong hem. Datwan nao nambawan blessing!

^ par. 17 Appendix wea garem title “Wanem Taem Nao for Kavarem Hed, and Why Nao Olsem?” storyim taem wea sista shud kavarem hed.