Skip to content

Skip to table of contents

 CHAPTER 42

Why Iumi Need for Waka

Why Iumi Need for Waka

WANEM nao iu laek tumas for duim, waka or plei?— Hem no rong for plei. Bible story abaotem Jerusalem wea “fulap witim olketa boy and olketa gele wea plei insaed long olketa pablik ples bilong hem.”—Zechariah 8:5.

Datfala Nambawan Teacher laek tumas for lukluk taem olketa pikinini plei. Bifor hem kam long earth, hem sei: “Mi stap witim [God] olsem nambawan wakman . . . and evritaem mi hapi taem mi stap witim hem.” Lukim hao Jesus waka witim Jehovah long heven. And taem hem stap long there, hem sei: “Olketa samting wea mi laekem tumas nao olketa son bilong man.” Olsem iumi lanem finis, datfala Nambawan Teacher barava interest long evriwan, olketa young wan tu.—Proverbs 8:30, 31.

Wanem samting nao datfala Nambawan Teacher hapi tumas for duim bifor hem kam long earth?

 Long tingting bilong iu, waswe, Jesus plei taem hem smol pikinini?— Luk olsem hem laek for plei tu. Bat from hem wanfala “nambawan wakman” long heven, waswe, hem waka long earth tu?— Pipol kolem Jesus “son bilong datfala carpenter.” Bat olketa kolem hem tu, “datfala carpenter.” Wanem nao diswan showimaot?— Masbi Joseph, wea lukaftarem Jesus olsem son bilong hem nao teachim hem. So Jesus hem kamap wanfala carpenter tu.—Matthew 13:55; Mark 6:3.

Jesus hem wanem kaen carpenter?— From Bible kolem hem wanfala “nambawan wakman,” diswan minim hem savve tumas hao for duim waka bilong hem long heven, so waswe, iu agree hao masbi hem savve tumas hao for duim waka olsem carpenter long earth  tu?— Tingim hao waka bilong wanfala carpenter hem no isi long datfala taem. Maet Jesus need for go long bush for katem tree, katem olketa size timba hem laekem, and karem go bak long haos, and then hem wakem olketa tebol, stul, and olketa nara samting.

Waswe, iu ting Jesus hapi for duim disfala waka?— Waswe, bae iu hapi sapos iu savve wakem olketa naes tebol and chair and olketa nara samting for pipol iusim?— Bible sei hem gud for man “hapi long olketa waka bilong hem.” Iu kasem spesol feeling for hapi wea iu no savve kasem from wei for plei.—Ecclesiastes 3:22.

Iu savve, waka duim gudfala samting for mind and body bilong iumi. Long samfala kantri staka pikinini sidaon nomoa and lukluk television or pleim olketa video game. Olketa kamap baonsa and wiki, and olketa no barava hapi. And olketa no mekem nara pipol hapi tu. Wanem nao iumi mas duim for hapi?—

Iumi lanem long Chapter 17 hao wei for give and duim olketa samting for helpem nara pipol savve mekem man hapi. (Acts 20:35) Bible kolem Jehovah “datfala hapi God.” (1 Timothy 1:11) And, olsem iumi readim finis long Proverbs, Jesus ‘evritaem hapi taem hem stap witim God.’ Why nao Jesus hapi?— Hem talem wanfala reason taem hem sei: “Dadi bilong mi waka kam kasem distaem, and mi gohed for waka tu.”—John 5:17.

Taem Jesus stap long earth, hem no waka olsem carpenter for full laef bilong hem. Jehovah God garem wanfala spesol waka for hem duim long earth. Waswe, iu savve wanem nao datwan?— Jesus hem sei: “Mi mas talemaot gud nius bilong kingdom bilong God, bikos hem nao why hem sendem mi kam.” (Luke 4:43) Samfala taem wea Jesus preach long pipol, olketa bilivim hem and storyim long nara pipol olketa samting wea hem talem, olsem disfala Samaritan woman wea iu lukim long disfala piksa hem duim.—John 4:7-15, 27-30.

Wanem tufala difren kaen waka nao Jesus duim taem hem stap long earth?

 Hao nao Jesus ting long disfala waka? Waswe, iu tingse hem laek for duim?— Jesus hem sei: “Kaikai bilong mi hem for duim will bilong datwan wea sendem mi kam, and for finisim waka bilong hem.” (John 4:34) Waswe, iu kaikai smol nomoa long favorite kaikai bilong iu?— Diswan bae helpem iu for minim hao Jesus laekem tumas for duim waka wea God givim hem for duim.

God wakem iumi for kasem hapi from wei wea iumi lane for waka. Hem sei present wea Hem givim long man hem for man “hapi long hard waka bilong hemseleva.” So sapos iu lane for waka taem iu young yet, bae iu barava enjoyim full laef bilong iu.—Ecclesiastes 5:19.

Diswan no minim wanfala young pikinini savve duim waka bilong bigman, bat iumi evriwan savve duim samfala waka. Maet dadi and mami bilong iu go waka evriday for kasem selen mekem famili garem kaikai and haos for stap long hem. And olsem iu savve, staka waka stap for duim long haos mekem hem stret and klin.

Wanem waka nao iu savve duim wea bae helpem evriwan long famili?— Iu savve help for putim pleit long tebol, wasim olketa pleit, go torowem rabis, klinim rum bilong iu. Maet samfala samting hia iu duim finis. Datfala waka hem barava helpem famili.

Why nao hem important for putim olketa toy go bak long stretfala ples bihaen iu plei finis?

Iumi lukim hao waka olsem savve helpem famili. Bihaen iu plei finis witim olketa toy, putim olketa go bak long ples for keepim olketa. Why nao diswan hem important?— Hem help for mekem haos hem stret, and hem savve stopem tu olketa accident. Sapos iu leavim olketa toy bilong iu for stap olobaot long haos, mami maet karem samfala samting and purubutim wanfala toy. Maet hem foldaon and garekil. Maet hem mas go long hospital tu. Datwan bae nogud samting, iaman?— So taem iu putim bak olketa toy long stretfala ples bihaen iu plei, diswan helpem evriwan insaed famili.

 Olketa pikinini garem olketa nara waka tu. Olsem example, skul waka. Long skul iu lane for read. Samfala pikinini laek tumas for read, bat olketa narawan faendem hem hard. Nomata sapos hem hard firstaem, bae iu hapi sapos iu lane for read gud. Sapos iu savve hao for read, iu savve lanem staka interesting samting. Bae iu savve readim tu buk bilong God, Bible. So taem iu duim gud waka bilong iu long skul, iu kasem gud samting, iaman?—

Samfala pipol no laek for waka. Maet iu savve long samwan olsem. Bat from God wakem iumi for waka, iumi need for lanem hao for enjoyim datwan. Waswe, datfala Nambawan Teacher laekem tumas for duim waka bilong hem?— Hem olsem hem kaikaim favorite kaikai bilong hem. And wanem waka nao hem story abaotem?— For story long nara pipol abaotem Jehovah God and hao olketa savve kasem laef olowe.

So, for helpem iu enjoyim waka, askem iuseleva, ‘Why nao mi need for duim disfala waka?’ Taem iu savve why samting hem important, hem moa isi for duim datwan. And nomata datfala waka hem smol or big, duim best bilong iu. Sapos iu duim olsem, iu savve enjoyim waka bilong iu, olsem tu datfala Nambawan Teacher.

Bible savve helpem man for kamap gudfala wakman. Readim wanem hem talem long Proverbs 10:4; 22:29; Ecclesiastes 3:12, 13; and Colossians 3:23.