Skip to content

Skip to table of contents

 CHAPTER 41

Olketa Pikinini wea Mekem God Hapi

Olketa Pikinini wea Mekem God Hapi

LONG tingting bilong iu, hu nao pikinini wea mekem Jehovah hapi winim eni narawan?— Son bilong hem, Jesus. Iumi storyim olketa samting Jesus duim wea mekem Dadi bilong hem long heven hapi.

Famili bilong Jesus stap long ples wea hem samting olsem thrifala day gogo from Jerusalem, wea hem ples temple bilong Jehovah wea barava luk naes hem stap. Jesus kolem datfala temple “haos bilong Dadi bilong mi.” Hem and famili bilong hem go long there evri year for attendim Passover.

Wanfala year, taem Jesus hem 12 year, famili bilong hem start for gogo bak long hom bihaen Passover. Taem olketa kasem ples for rest long naet nao olketa just savve hao Jesus no kam witim olketa relative and fren wea olketa go tugeta. So stretawe Mary and Joseph go bak long Jerusalem for lukaotem Jesus. Long tingting bilong iu, maet hem long wea?—

Tufala faendem Jesus long temple. Hem lisin long olketa teacher, and askem olketa kwestin long olketa. And eni samting olketa askem, hem savve ansarem. Olketa sapraes tumas long olketa gudfala ansa bilong hem. Waswe, iu minim nao why God hapi long Son bilong hem?—

Mary and Joseph hapi for faendem Jesus. Bat Jesus no wari. Hem savve no eni samting bae kasem hem sapos hem stap long temple. So hem ask: “Waswe, iufala no savve hao masbi mi stap long haos bilong Dadi bilong mi?” Hem savve hao temple hem haos bilong God, and hem hapi taem hem stap long there.

 Bihaen, Mary and Joseph tekem Jesus wea 12 year go bak long hom bilong olketa long Nazareth. Hao nao tingting bilong iu, iu tingse Jesus respectim parents bilong hem?— Bible sei hem “gohed for stap anda long tufala.” Long tingting bilong iu, wanem nao diswan hem minim?— Hem minim hem obeyim tufala. Hem duim samting dadi and mami talem hem for duim, nomata smol samting olsem wei for go tekem wata from well tu.—Luke 2:41-52.

Taem Jesus hem pikinini, wanem nao hem duim wea mekem God hapi?

So tingim diswan: Nomata Jesus hem perfect, hem obeyim dadi and mami bilong hem wea no perfect. Waswe, diswan mekem God hapi?— Barava nao, from Word bilong God talem olketa pikinini: “Obeyim parents bilong iufala.” (Ephesians 6:1) Iu tu bae mekem God hapi sapos iu obeyim dadi and mami, olsem Jesus.

Nara samting iu savve duim for mekem God hapi hem for story abaotem hem long nara pipol. Maet samfala pipol sei hem no stret for olketa young pikinini duim diswan. Bat long wanfala taem wea pipol trae stopem olketa young boy for duim olsem, Jesus hem  sei: ‘Waswe, iu no readim diswan long olketa scripture, “From mouth bilong olketa baby and smol pikinini iu mekem praise kamap”?’ (Matthew 21:16) So sapos iumi laek for duim, iumi evriwan savve story abaotem Jehovah long nara pipol and abaotem wei wea hem wanfala nambawan God. And sapos iumi duim olsem, iumi bae mekem God hapi.

Long wea nao iumi lanem olketa samting abaotem God wea iumi savve storyim long nara pipol?— From Bible study bilong iumi long haos. Bat iumi lanem moa samting long ples wea pipol bilong God hipap for study. Bat hao nao bae iumi savve hu nao pipol bilong hem?—

Wanem nao pipol hia duim long olketa meeting? Waswe, olketa barava teachim samting wea stap insaed Bible? Waswe, olketa readim and story raonem datwan? Hem nao hao iumi lisin long God, iaman?— And iumi savve tu hao long olketa Christian meeting iumi bae herem samting wea God talem, iaman?— Bat waswe sapos pipol sei iu no need nomoa for followim samting Bible talem? Waswe, bae iu sei olketa hia pipol bilong God?—

Tingim tu diswan. Bible sei pipol bilong God bae “wanfala pipol for nem bilong hem.” (Acts 15:14) From nem bilong God hem Jehovah, iumi savve askem pipol sapos Jehovah hem God bilong olketa. Sapos ansa bilong olketa hem nomoa, iumi savve olketa no pipol bilong hem. Pipol bilong God bae story tu abaotem Kingdom bilong God long nara pipol. And olketa bae showimaot olketa lovem God long wei for obeyim olketa komandment bilong hem.—1 John 5:3.

Sapos iu savve long pipol wea duim evri samting hia, iu shud hipap witim olketa for worship. Iu shud lisin gud long olketa meeting hia and givim ansa taem olketa askem kwestin. Datwan nao samting Jesus duim taem hem stap insaed haos bilong God. And sapos iu duim olketa samting hia, bae iu mekem God hapi, olsem Jesus duim tu.

 Waswe, iu savve long olketa nara pikinini insaed Bible wea mekem God hapi?— Timothy hem nambawan example long diswan. Dadi bilong hem no biliv long Jehovah. Bat mami bilong hem, Eunice, and granmami bilong hem Lois, tufala biliv. Timothy lisin long tufala and lane abaotem Jehovah.

Nomata dadi bilong hem no biliv long Jehovah, wanem nao Timothy laek for duim?

Taem Timothy hem big lelebet, aposol Paul visitim taon wea hem stap. Hem lukim hao Timothy laekem tumas for servem Jehovah. So hem invaetem Timothy for go witim hem mekem hem savve duim moa samting long waka bilong God. Long evri ples tufala go long hem, tufala talem pipol abaotem Kingdom bilong God and abaotem Jesus.—Acts 16:1-5; 2 Timothy 1:5; 3:14, 15.

Bat waswe, olketa example insaed Bible story nomoa abaotem olketa young boy wea mekem God hapi?— Nomoa. Tingim wanfala young Israelite gele wea mekem God hapi. Long datfala taem, kantri bilong Syria and Israel tufala enemy. Wanday pipol long Syria faetem pipol long Israel and tekem datfala young gele olsem prisoner. Olketa tekem  hem go long haos bilong Naaman wea hem bigman long army. Hem kamap servant bilong waef bilong Naaman.

Naaman garem sik leprosy. No eni doctor savve helpem hem. Bat datfala young gele from Israel feel sure hao wanfala spesol servant bilong God, wanfala profet, savve helpem Naaman. Bat, Naaman and waef bilong hem no worshipim Jehovah. Waswe, datfala young gele shud talem olketa samting wea hem savve long hem? Sapos iu nao hem, wanem nao bae iu duim?—

Hao nao disfala Israelite gele mekem God hapi?

Datfala smol gele hem sei: ‘Sapos Naaman go nomoa long profet bilong Jehovah long Israel, leprosy bilong Naaman bae finis.’ Naaman duim samting wea datfala gele talem, and hem go long profet bilong Jehovah. Taem hem duim samting wea profet talem hem for duim, hem gud nao. Diswan mekem Naaman kamap man wea worshipim tru God.—2 Kings 5:1-15.

Waswe, iu laek helpem samwan lane abaotem Jehovah and abaotem samting hem savve duim, olsem datfala young gele hem duim?— Hu nao iu savve helpem?— Maet firstaem olketa no ting olketa needim help. Bat iu savve storyim olketa gud samting wea Jehovah duim for olketa. And maet olketa lisin. And iu savve feel sure hao diswan bae mekem God hapi.

Samfala nara samting wea bae encouragem olketa young wan for hapi for servem God hem stap long Psalm 122:1; 148:12, 13; Ecclesiastes 12:1; 1 Timothy 4:12; and Hebrews 10:23-25.