Skip to content

Skip to table of contents

 CHAPTER 20

Waswe, Iu Evritaem Laek for First?

Waswe, Iu Evritaem Laek for First?

WASWE, iu savve long eniwan wea laek for first evritaem?— Maet hem pushim aot samwan long laen mekem hem standap first long laen. Waswe, enitaem iu lukim datwan happen?— Datfala Nambawan Teacher lukim hao olketa bigman trae for kasem olketa ples and position wea moa important winim olketa narawan. And hem no laekem datwan. Iumi lukim wanem nao happen.

Waswe, iu lukim pipol wea trae for first?

Bible talem iumi hao Jesus kasem invitation for kaikai long haos bilong wanfala Pharisee, wea hem wanfala important man wea lead long religion. Bihaen Jesus arrive, hem start lukluk long olketa nara man wea kasem invitation olketa kam insaed and chusim olketa best ples.  So hem talem wanfala story long olketa wea kasem invitation. Waswe, iu laek herem?—

Jesus hem sei: ‘Taem samwan invaetem iu long wanfala marit feast, no chusim best ples, or barava important ples.’ Waswe, iu savve why nao Jesus talem datwan?— Hem explainim hao samwan wea moa important maet kasem invitation tu. So, olsem iu lukim long disfala piksa, man wea arrangem datfala feast hem kam and sei: ‘Iu go long there and man hia nao bae sidaon long hia.’ Hao nao datfala man bae feel?— Hem bae shame bikos evri narawan lukim hem muv go long ples wea no important.

Jesus showim hao hem no stret for laekem best ples. So hem sei: ‘Taem olketa invaetem iu for go long wanfala marit feast, go and sidaon long nogud ples. Then man wea invaetem iu maet kam and sei, “Fren, iu go sidaon long gudfala ples.” Iu bae kasem honor front long evri narawan taem iu muv for go sidaon long gudfala ples.’—Luke 14:1, 7-11.

Wanem leson nao Jesus teachim taem hem story abaotem pipol wea laek sidaon long best ples?

Waswe, iu minim samting wea Jesus story abaotem?— Iumi ting raonem wanfala example for lukim sapos iu minim. Tingim sapos iu go insaed wanfala trak wea barava full. Waswe, iu bae kwiktaem faendem ples for sidaon and letem olo man for standap?— Waswe, Jesus bae laekem sapos iu duim datwan?—

Maet samwan sei Jesus no warim nomoa wanem iumi duim. Bat waswe, iu bilivim datwan?— Taem Jesus kaikai long haos bilong datfala Pharisee, hem lukluk taem pipol chusim ples for sidaon. Waswe, iu ting hem interest tu long wanem iumi duim distaem?— From Jesus stap long heven distaem, hem stap long ples wea hem savve lukim iumi gud.

 Taem samwan trae for first, diswan savve kosim problem. Plande taem pipol raoa and kamap kros. Samfala taem diswan happen taem olketa pikinini go for lukim video. Taem olketa go insaed haos, olketa pikinini ran kwiktaem for hu nao first. Olketa laekem gudfala ples for sidaon, klosap long front. Wanem nao savve happen?— Maet olketa start for raoa.

For laek first savve kosim staka trabol. Hem kosim trabol tu midolwan olketa aposol bilong Jesus. Olsem iumi lanem long Chapter 6 long disfala buk, olketa argue midolwan olketa seleva abaotem hu nao nambawan. Wanem nao Jesus duim long datfala taem?— Ia, hem stretem olketa. Bat bihaen olketa argue moa. Iumi lukim hao nao datwan hem start.

Olketa aposol and olketa narawan travel witim Jesus for lastfala taem go long taon bilong Jerusalem. Jesus story abaotem Kingdom bilong hem, so  James and John tingting abaotem wei for rul olsem olketa king witim hem. Tufala storyim diswan go long mami bilong tufala, Salome. (Matthew 27:56; Mark 15:40) So taem olketa gogo for Jerusalem, Salome go long Jesus, baodaon front long hem, and askem hem wanfala samting.

Jesus hem ask: “Wanem nao iu laekem?” Hem sei hem laekem Jesus for mekem tufala son bilong hem sidaon long tufala saed bilong hem insaed Kingdom bilong hem, wanfala long raet saed and narawan long left saed. Long tingting bilong iu, hao nao nara tenfala aposol feel taem olketa herem wanem James and John mekem mami bilong tufala for askem?—

Wanem nao Salome askem Jesus for duim, and wanem nao kamaot from datwan?

Ia, olketa barava kros long James and John. So Jesus givim evri aposol bilong hem samfala gud advaes. Jesus talem hao olketa ruler bilong  olketa nation laekem tumas for garem paoa and for important. Olketa laek garem wanfala hae position wea evriwan obeyim olketa. Bat Jesus talem hao olketa follower bilong hem shud no olsem. Jesus sei: ‘Eniwan wea want for first midolwan long iufala mas kamap slave bilong iufala.’ Tingim datwan!—Matthew 20:20-28.

Waswe, iu savve wanem nao wanfala slave duim?— Hem waka for nara pipol, hem no expectim nara pipol for waka for hem. Hem tekem nogud ples, no first ples. Hem act olsem man wea barava no important. And remember, Jesus sei man wea laek first shud act olsem wanfala slave for nara pipol.

So, wanem nao iu ting datwan hem minim for iumi?— Waswe, slave bae argue witim boss bilong hem saed long hu nao for sidaon long best ples? Or waswe, hem bae argue abaotem hu nao for kaikai firstaem? Wanem nao tingting bilong iu?— Jesus explainim hao slave hem evritaem tingim samting for boss firstaem.—Luke 17:7-10.

So winim wei for trae for first, wanem nao iumi shud duim?— Ia, iumi shud olsem wanfala slave for nara pipol. And datwan minim for putim nara pipol first bifor iumi. Hem minim for tingim hao nara pipol moa important winim iumi. Waswe, iu savve tingim olketa wei wea iu savve putim nara pipol first?— Luk go bak long page 40 and 41 and lukim moa samfala wei wea iu savve putim nara pipol first long wei for servem olketa.

Remember hao datfala Nambawan Teacher putim nara pipol first long hem taem hem servem olketa. Long lastfala evening wea hem stap witim olketa aposol, hem wasim leg bilong olketa. Sapos iumi tu putim nara pipol first long wei for servem olketa, iumi bae mekem datfala Nambawan Teacher and Dadi bilong hem, Jehovah God, hapi.

Iumi readim samfala moa Bible scripture wea encouragem iumi for putim nara pipol first bifor iumi: Luke 9:48; Romans 12:3; and Philippians 2:3, 4.