Skip to content

Skip to table of contents

 CHAPTER 30

Kasem Help for No Fraet

Kasem Help for No Fraet

WASWE, iu faendem hem isi for servem Jehovah?— Datfala Nambawan Teacher sei hem bae no isi. Long naet bifor Jesus dae, hem talem olketa aposol: “Sapos world heitim iufala, iufala savve world hem heitim mi firstaem bifor hem heitim iufala.”—John 15:18.

Peter tok praod taem hem sei hem bae nating lusim Jesus, bat Jesus talem hao Peter bae sei hem no savve long hem thrifala taem long datfala sem naet. And datwan nao samting wea Peter duim! (Matthew 26:31-35, 69-75) Wanem nao savve mekem diswan happen?— Hem bikos Peter fraet, and olketa nara aposol fraet tu.

Waswe, iu savve why nao olketa aposol fraet?— Olketa fail for duim wanfala barava important samting. For lane abaotem diswan savve helpem iumi for duim samting wea Jehovah laekem, nomata man savve talem or duim eni samting long iumi. Bat firstaem, iumi need for storyim moa wanem nao happen long lastfala naet wea Jesus stap witim olketa aposol bilong hem.

Firstfala samting, olketa celebratem Passover tugeta. Passover hem taem for wanfala spesol kaikai wea olketa markem evri year for remindim pipol bilong God abaotem taem olketa kamap free from wei for slave long Egypt. Then Jesus startim nara spesol kaikai witim olketa. Iumi bae storyim diswan long nara chapter bihaen and explainim hao disfala kaikai helpem iumi for rememberim Jesus. Bihaen datfala kaikai and toktok for encouragem olketa aposol, Jesus tekem olketa go long garden bilong Gethsemane. Diswan hem ples wea olketa evritaem laek for go long hem.

 Jesus lusim olketa long wanfala ples long garden and hem go seleva long wanfala kwaet ples klosap for prea. Hem talem tu Peter, James, and John for prea. Bat olketa sleep. Thrifala taem Jesus go seleva for prea, and thrifala taem hem kam bak and lukim Peter and olketa narawan sleep! (Matthew 26:36-47) Waswe, iu savve why olketa shud wekap for prea?— Iumi story abaotem datwan.

Why nao Peter, James, and John shud stap wekap?

Long datfala evening Judas Iscariot stap witim Jesus and olketa nara aposol for datfala Passover. Maet iu rememberim hao Judas kamap man for steal. Distaem hem givim Jesus go long enemy. Hem savve long ples long garden bilong Gethsemane wea Jesus staka taem meet witim olketa aposol. So Judas tekem olketa soldia go long there for arrestim Jesus. Taem olketa arrive, Jesus askem olketa: “Hu nao iufala lukaotem?”

Olketa soldia sei: “Jesus.” Jesus nating fraet, and hem sei: “Mi nao hem.” From olketa soldia sapraes tumas long wei wea Jesus no fraet, olketa muv bak and foldaon long graon. Then Jesus hem sei: ‘Sapos mi nao iufala lukaotem, letem olketa aposol go.’—John 18:1-9.

Taem olketa soldia grabim Jesus and taemap hand bilong hem, olketa aposol fraet and ranawe. Bat Peter and John laek for savve wanem nao bae happen, so tufala followim olketa bat stap farawe lelebet. Gogo, olketa tekem Jesus go long haos bilong Caiaphas, wea hem hae priest. From hae priest savve long John, servant gele long gate letem hem and Peter go insaed long courtyard.

Olketa priest hipap tugeta finis long haos bilong Caiaphas for herem case bilong Jesus. Olketa laek mek sure Jesus mas dae. So olketa tekem kam olketa man for talem laea toktok abaotem hem. Pipol hitim and slapem hem. Taem evri samting hia gohed, Peter stap klosap nomoa.

Servant gele long gate wea letem Peter and John for go insaed luksavve long Peter. Hem sei: “Iu, tu, stap witim Jesus!” Bat Peter sei  hem no savve long Jesus. No longtaem bihaen nara gele luksavve long Peter and sei long pipol wea stap long there: “Disfala man hem stap witim Jesus.” Narataem moa Peter sei hem no savve long hem. Bihaen lelebet taem wanfala grup pipol lukim Peter and sei long hem: “For sure, iu tu wanfala long olketa.” For mek-thri taem Peter sei: “Mi nating savve long datfala man!” Peter barava sei hem talem tru samting, and Jesus tan and luk long hem.—Matthew 26:57-75; Luke 22:54-62; John 18:15-27.

Why nao Peter fraet tumas dastawe hem laea for sei hem no savve long Jesus?

Waswe, iu savve why nao Peter laea?— Ia, hem bikos hem fraet. Bat why nao hem fraet? Wanem nao hem shud duim for mekem hem no fraet? Ting abaotem datwan. Wanem nao Jesus duim wea mekem hem no fraet?— Hem prea long God, and God helpem hem for no fraet. And remember, Jesus talem Peter thrifala taem for prea and stap wekap and gohed for lukaot. Bat wanem nao happen?—

Long thrifala taem hia, Peter sleep. Hem no prea, and hem no gohed lukaot. So hem no redi for disfala samting wea happen taem olketa arrestim Jesus. Bihaen, long datfala kot, taem olketa hitim Jesus  and mekem olketa plan for killim hem dae, Peter start for fraet. Nomata olsem, samfala hour bifor datwan, wanem nao Jesus talem olketa aposol for expectim?— Jesus talem olketa hao long sem wei wea world heitim hem, world bae heitim olketa tu.

Hao nao maet iuseleva kasem samting wea semsem olsem Peter?

Distaem iumi laek ting raonem samting wea maet happen long iumi wea savve olsem samting wea happen long Peter. Tingim sapos iu insaed long classrum taem olketa narawan start for talem olketa nogud samting abaotem pipol wea no salutim flag or no celebratem Christmas. Then hao sapos samwan askem iu: “Waswe, hem tru iu no salutim flag?” Or olketa  narawan sei: “Mifala herem iu no celebratem Christmas tu!” Waswe, bae iu fraet for talem tru samting?— Waswe, iu bae laek for laea olsem Peter?—

Bihaen, Peter sorre tumas from hem sei hem no savve long Jesus. Taem hem luksavve long samting hem duim, hem go aotsaed and krae. Tru nao, hem loyal for followim Jesus moa. (Luke 22:32) Tingim diswan. Wanem nao savve helpem iumi for no fraet and no talem sem samting olsem Peter?— Remember, Peter no prea and gohed for lukaot. So, wanem nao iumi need for duim for kamap follower bilong datfala Nambawan Teacher?—

Iumi barava need for prea long Jehovah for help. Taem Jesus prea, waswe, iu savve wanem nao God duim for hem?— Hem sendem wanfala angel for strongim hem. (Luke 22:43) Waswe, olketa angel bilong God savve helpem iumi?— Bible sei: “Angel bilong Jehovah stap raonem olketa wea fraet long hem, and hem sevem olketa.” (Psalm 34:7) Bat for kasem help from God, iumi need for duim nara samting moa witim prea. Waswe, iu savve wanem moa iumi need for duim?— Jesus talem olketa follower bilong hem for stap wekap and gohed for lukaot. Long tingting bilong iu, wanem nao savve helpem iumi for duim datwan?—

Iumi need for lisin gud long samting iumi herem long olketa Christian meeting and tingting strong long wanem iumi readim from Bible. Bat iumi need tu for prea evritaem long Jehovah and askem hem for helpem iumi for servem hem. Sapos iumi duim olsem, iumi bae kasem help for no fraet. Then iumi bae hapi taem iumi garem chance for story long nara pipol abaotem datfala Nambawan Teacher and Dadi bilong hem.

Olketa scripture hia savve helpem iumi for no letem wei for fraet long pipol stopem iumi for duim stret samting: Proverbs 29:25; Jeremiah 26:12-15, 20-24; and John 12:42, 43.