Skip to content

Skip to table of contents

 CHAPTER 47

Hao Iumi Savve Armageddon Hem Klosap

Hao Iumi Savve Armageddon Hem Klosap

WASWE, iu savve wanem nao wanfala saen?— Long Chapter 46 iumi read abaotem saen wea God givim for showim bae hem no distroem moa world witim flood. And tu, olketa aposol ask for wanfala saen mekem olketa savve long taem wea Jesus kam bak finis and taem wea end bilong world hem klosap.—Matthew 24:3.

From man no savve lukim Jesus long heven, pipol bae need for lukim wanfala saen wea showimaot hem start for rul. So Jesus talem olketa samting wea olketa disaepol shud lukluk for hem hia long earth. Taem olketa samting hia happen, datwan bae showimaot hem kam bak and start for rul long heven olsem King.

For teachim olketa disaepol why hem important for lukaot, Jesus sei long olketa: “Tingim fig tree and evri nara tree: Taem olketa garem niufala  leaf, iufala lukim and savve hao hot season hem klosap nao.” Iu savve long olketa samting wea showimaot hao hot season hem klosap. And iu savve sure Armageddon hem klosap from iu lukim olketa samting wea Jesus story abaotem hem happen.—Luke 21:29, 30.

Wanem leson nao Jesus teachim taem hem story abaotem fig tree?

Long disfala page and next wan, bae iumi lukluk long olketa piksa bilong olketa samting wea Jesus sei bae part long saen for showimaot hao Kingdom bilong God hem klosap. Taem evri samting hia  happen, Kingdom bilong God wea Christ hem Ruler bilong hem bae smasem evri nara gavman, olsem iumi readim finis long Chapter 46.

So lukluk gud long olketa piksa long page 245 and 246, and bae iumi story abaotem datwan. Long Matthew 24:6-14 and Luke 21:9-11, iu savve read abaotem samting wea iu lukim long olketa piksa hia. And tu, lukim namba wea stap long each piksa. Datfala sem namba stap tu long start bilong paragraf wea story abaotem datfala piksa. Iumi laek for lukim sapos plande difren part bilong saen wea Jesus talem hem fulfill distaem.

(1) Jesus sei: “Iufala bae here abaotem olketa war and olketa report abaotem war; . . . nation bae againstim nation and kingdom againstim kingdom.” Waswe, iu herem olketa report abaotem olketa war?— Datfala first world war hem start long 1914 go kasem 1918, and World War II start long 1939 go kasem 1945. No enitaem bifor olketa world war hem kamap! Distaem olketa war gohed evriwea long world. Evritaem iumi herem or read abaotem olketa war long television, radio, and niuspepa.

(2) Jesus sei tu: “Kaikai bae short . . . long staka ples.” Maet iu savve finis, no evriwan garem inaf kaikai. Evri day staka thousand pipol dae bikos olketa no garem inaf kaikai.

(3) Jesus sei moa: ‘Long staka ples nogud sik bae kamap.’ Wanfala nogud sik wea olketa kolem Spanish flu killim dae samting olsem 20 million pipol insaed wanfala year nomoa. Long taem bilong iumi distaem maet winim 20 million pipol bae dae from AIDS. And olketa sik olsem cancer, sik long heart, and olketa nara sik killim dae staka thousand pipol evri year.

(4) Jesus talem nara part bilong saen taem hem sei: “Earthquake bae kamap . . . long staka ples.” Waswe, iu savve wanem nao  earthquake?— Earthquake mekem graon seksek. Hem mekem olketa haos foldaon, and staka taem killim dae pipol. Start long year 1914, evri year staka earthquake kamap. Waswe, iu herem story abaotem olketa earthquake?—

(5) Jesus sei nara part bilong saen nao hem wei wea ‘nogud fasin bae kamap moa big.’ Hem nao why fasin for steal and raf fasin big tumas. Pipol evriwea fraet nogud samwan go steal long haos bilong olketa. Distaem, criminal fasin and raf fasin kamap big evriwea long world winim enitaem bifor.

(6) Jesus talem wanfala barava important part bilong datfala saen taem hem sei: “Olketa bae preachim disfala gud nius bilong kingdom evriwea long earth for givim witness long evri nation; and then end bae kam.” (Matthew 24:14) Sapos iu bilivim “disfala gud nius,” then iu shud story abaotem datwan long nara pipol. Long wei olsem iu share for fulfillim disfala part bilong saen.

Maet samfala pipol talem hao olketa samting Jesus storyim hia kamap evritaem insaed full history bilong olketa man. Bat no enitaem bifor evri samting hia happen long olketa difren ples long world and long semtaem. So waswe, iu savve wanem nao datfala saen minim?— Hem minim taem iumi lukim evri samting hia happen, niu world bilong God hem klosap for changem disfala nogud world wea iumi stap insaed.

Taem Jesus talem disfala saen, hem storyim tu wanfala spesol season bilong year. Hem sei: “Gohed for prea mekem iufala no ranawe long taem bilong cold season.” (Matthew 24:20) Long tingting bilong iu, wanem nao Jesus minim?—

Sapos man mas ranawe from trabol long taem wea weather mekem hem hard or danger for travel, wanem nao savve happen?—  Sapos hem fit for ranawe, bae hem no isi for duim datwan. Sapos samwan dae long cyclone bikos hem busy tumas for duim olketa nara samting and hem no kwiktaem for startim gogo bilong hem, datwan bae sorre samting, iaman?—

Taem Jesus story abaotem wei for ranawe long taem bilong cold season, wanem leson nao hem teachim?

Waswe, iu minim barava important point wea Jesus storyim taem hem tok abaotem wei for no weit bat for ranawe bifor cold season hem kam?— Hem talem iumi hao from iumi savve Armageddon hem klosap, iumi shud no delay for servem God wea bae showimaot iumi lovem hem. Sapos iumi delay, maet iumi missim chance for duim datwan. Bae iumi olsem pipol long taem bilong bigfala Flood wea herem warning bilong Noah bat no go insaed long ark.

Next samting, iumi bae storyim wanem nao bae kamap bihaen long Armageddon. Iumi bae lanem wanem God hem redim for iumi evriwan wea lovem and servem hem distaem.

Long hia hem olketa nara scripture wea showim Armageddon hem klosap: 2 Timothy 3:1-5 and 2 Peter 3:3, 4.