Skip to content

Skip to table of contents

 CHAPTER 5

“Diswan Hem Son Bilong Mi”

“Diswan Hem Son Bilong Mi”

TAEM olketa pikinini duim olketa gud samting, pipol wea lukaftarem olketa hapi. Taem wanfala gele duim gudfala samting, dadi bilong hem hapi for talem nara pipol: “Diswan hem dota bilong mi.” Or sapos wanfala boy duim olketa gud samting, wanfala dadi bae hapi for sei: “Diswan hem son bilong mi.”

Jesus evritaem duim olketa samting wea mekem Dadi bilong hem hapi. Dastawe Dadi bilong hem hapi long hem. Waswe, iu rememberim samting wea Dadi bilong Jesus duim long wanfala taem wea Jesus stap witim thrifala follower bilong hem?— God tok kam from heven for talem olketa follower bilong Jesus: “Diswan hem Son bilong mi, wea mi lovem, wea mi appruvim.”—Matthew 17:5.

Jesus evritaem hapi for duim olketa samting wea mekem Dadi bilong hem hapi. Waswe, iu savve why? Bikos hem barava lovem Dadi bilong hem. Sapos man duim olketa samting only bikos hem mas duim, diswan bae luk olsem hem hard tumas. Bat taem hem willing, datwan hem moa isi. Waswe, iu savve wanem nao hem minim for willing?— Hem minim for barava laek duim samting.

Nomata bifor Jesus kam long earth, hem willing for duim eni samting wea Dadi bilong hem askem hem for duim. Diswan hem bikos hem lovem Dadi bilong hem, Jehovah God. Jesus garem wanfala nambawan ples long heven witim Dadi bilong hem. Bat God garem wanfala spesol waka for Jesus duim. For duim datfala waka, Jesus mas lusim heven. Hem mas born olsem wanfala baby long earth. Jesus willing for duim diswan bikos Jehovah laekem hem for duim.

Wanem nao angel Gabriel talem long Mary?

For born olsem wanfala baby long earth, Jesus mas garem wanfala mami. Waswe, iu savve hu nao mami bilong hem?— Nem bilong  hem Mary. Jehovah sendem angel Gabriel from heven for story witim Mary. Gabriel talem hem bae hem garem wanfala baby boy. Bae olketa nemem datfala baby Jesus. And hu nao bae dadi bilong datfala baby?— Datfala angel sei Dadi bilong datfala baby hem bae Jehovah God. Dastawe Bible kolem Jesus Son bilong God.

Long tingting bilong iu, wanem nao feeling bilong Mary abaotem diswan?— Waswe, hem sei, “Mi no laek kamap mami bilong Jesus”? Nomoa, Mary redi for duim wanem God laekem. Bat hao nao Son bilong God long heven bae born olsem wanfala baby long earth? Hao nao wei wea Jesus born hem difren from wei wea evri nara baby born? Waswe, iu savve?—

God wakem first dadi and mami bilong iumi, Adam and Eve, for tufala savve kam tugeta long wanfala spesol wei. Bihaen datwan, wanfala baby bae start grow insaed long mami bilong hem. Pipol sei diswan hem wanfala mirakol! Mi sure iu ting olsem tu.

God duim wanfala samting wea datwan hem wanfala nambawan mirakol. Hem tekem laef bilong Son bilong hem from heven and putim insaed long Mary. God nating duim diswan bifor, and hem bae no duim moa. From disfala mirakol, Jesus start grow insaed Mary olsem olketa nara baby grow insaed long mami bilong olketa. Bihaen datwan, Mary maritim Joseph.

Long taem for Jesus born, Mary and Joseph go long taon bilong Bethlehem. Bat staka pipol tumas long there. No eni ples for Mary  and Joseph stap, so tufala mas stap long ples for keepim olketa animal. Mary bornem Jesus long there, and putim hem insaed wanfala manger, olsem iu savve lukim long hia. Manger hem wanfala box for putim kaikai bilong olketa buluka and nara animal for kaikaim.

Why nao olketa putim Jesus insaed wanfala manger?

Olketa barava spesol samting happen long naet wea Jesus born. Klosap long Bethlehem, wanfala angel showim hemseleva long samfala shepherd. Hem talem olketa Jesus hem wanfala important man. Datfala angel sei: ‘Mi talem iufala gud nius wea bae mekem pipol hapi. Tuday samwan hem born wea bae sevem pipol.’—Luke 2:10, 11.

Wanem gud nius nao wanfala long olketa angel hia talem long olketa shepherd?

Datfala angel talem olketa shepherd olketa savve faendem Jesus long Bethlehem, insaed wanfala manger. Then, seknomoa, olketa nara angel long heven joinim first angel for praisem God. Olketa angel  sing olsem: ‘Givim glory long God . . .  and long earth, peace midolwan long olketa man wea God hapi long olketa.’—Luke 2:12-14.

Taem olketa angel go, olketa shepherd go long Bethlehem and lukim Jesus. Long there olketa talem Joseph and Mary evri gud samting olketa herem. Waswe, iu savve tingim hapi bilong Mary from hem willing for kamap mami bilong Jesus?

Bihaen, Joseph and Mary tekem Jesus go long taon bilong Nazareth. Jesus growap long there. Taem hem mature, hem startim bigfala waka for teach. Diswan hem part long waka wea Jehovah God laekem Son bilong hem for duim  long earth. Jesus willing for duim datfala waka bikos Jesus lovem tumas Dadi bilong hem wea stap long heven.

Bifor Jesus startim waka olsem datfala Nambawan Teacher, John Baptaesa baptaesim hem long Jordan River. Then wanfala samting wea mekem man sapraes tumas hem happen! Taem Jesus kamaot from wata, Jehovah tok kam from heven, and sei: “Diswan nao Son bilong mi, wea mi lovem, wea mi appruvim.” (Matthew 3:17) Waswe, iu hapi taem dadi and mami talem iu tufala lovem iu?— Iumi sure Jesus hapi tu.

Jesus evritaem duim olketa stretfala samting. Hem no trae for kamap olsem wanfala difren man. Hem no talem pipol hem nao God. Angel Gabriel talem finis long Mary olketa bae kolem Jesus Son bilong God. Jesus seleva sei hem Son bilong God. And hem no talem pipol hem garem moa savve winim Dadi bilong hem. Hem sei: “Father hem winim mi.”—John 14:28.

Nomata long heven tu, taem Dadi bilong Jesus givim hem waka for duim, Jesus duim. Hem no sei bae hem duim and then go duim difren samting. Hem lovem Dadi bilong hem. So hem lisin long wanem Dadi bilong hem talem. Taem Jesus kam long earth, hem duim wanem Dadi bilong hem wea stap long heven sendem hem for duim. Hem no iusim taem bilong hem for duim difren samting. So dastawe Jehovah hapi long Son bilong hem!

Iumi tu laek mekem Jehovah hapi, iaman?— Sapos olsem, iumi mas showim hao iumi barava lisin long God, olsem Jesus duim. God story long iumi thru long Bible. Bae hem no stret for sei iumi lisin long God bat for tingim and duim olketa samting wea no followim Bible, iaman?— And remember, iumi bae hapi for mekem Jehovah hapi sapos iumi barava lovem hem.

Distaem readim olketa nara scripture long Bible wea showim wanem iumi need for savve and bilivim abaotem Jesus: Matthew 7:21-23; John 4:25, 26; and 1 Timothy 2:5, 6.