Skip to content

Skip to table of contents

 LESON 11

Rejectim False Religion!

Rejectim False Religion!

Satan and olketa demon bilong hem no laekem iu for servem God. Olketa laek for tanem evriwan from God sapos olketa savve duim. Hao nao olketa trae for duim diswan? Wanfala wei hem thru long false religion. (2 Corinthians 11:13-15) Wanfala religion hem false sapos hem no teachim truth wea kam from Bible. False religion hem olsem laea selen—hem maet luk olsem tru wan, bat hem iusles. Hem savve kosim planti trabol for iu.

Olketa laea samting bilong religion bae no savve mekem Jehovah hapi, datfala God bilong truth. Taem Jesus stap long earth, wanfala religion nao want for killim hem dae. Olketa tingse wei bilong olketa for worship nao hem stretfala wei. Olketa sei: “Mifala garem wanfala Dadi, hem nao God.” Waswe, Jesus hem agree? Nomoa nao! Hem sei long olketa: “Iufala kam from dadi bilong iufala datfala Devil.” (John 8:41, 44) Tuday planti pipol tingse olketa worshipim God, bat olketa barava servem Satan and olketa demon bilong hem!—1 Corinthians 10:20.

 Olsem wanfala rotten tree hem garem nogud frut, false religion tu garem pipol wea duim olketa nogud samting. World hem fulap witim trabol from nogud samting wea pipol duim. Dirty fasin, faet, steal, hardfala living, murder, and rape. Planti wea duim olketa nogud samting hia garem religion, bat religion bilong olketa no muvim olketa for duim samting wea gud. Olketa savve kamap fren bilong God only sapos olketa finis for duim nogud samting.—Matthew 7:17, 18.

False religion teachim pipol for prea long idol. God talem for no prea long idol. Diswan hem fitim. Waswe, iu laekem sapos samwan nating savve tok long iu bat tok nomoa long piksa bilong iu? Waswe, datfala man hem tru fren bilong iu? Nomoa nao. Jehovah laekem pipol for tok long hem, no long wanfala karving or piksa, wea no laef.—Exodus 20:4, 5.

False religion teachim hao hem olraet nomoa for killim dae narawan long taem bilong war. Jesus talem hao olketa fren bilong God bae garem love midolwan long olketa seleva. Iumi no killim dae pipol wea iumi lovem. (John 13:35) Hem rong for iumi killim dae olketa nogud pipol tu. Taem olketa enemy bilong Jesus kam for arrestim hem, hem nating letem olketa disaepol bilong hem for faet for protectim hem.—Matthew 26:51, 52.

False religion teachim hao olketa wicked pipol bae safa long hellfire. Bat, Bible teachim hao sin hem lead go long dae. (Romans 6:23) Jehovah hem wanfala God bilong love. Waswe, God wea garem love bae mekem pipol safa for olowe? Barava nomoa nao! Long Paradaes, wanfala religion nomoa bae stap, datwan wea Jehovah appruvim. (Revelation 15:4) Evri religion wea bilivim olketa laea bilong Satan bae finis.