Skip to content

Skip to table of contents

 LESON 2

God Nao Best Fren wea Iu Savve Garem

God Nao Best Fren wea Iu Savve Garem

For kamap fren bilong God hem best samting wea savve kasem iu. God bae teachim iu hao for hapi and sef; hem bae mekem iu free from planti rong biliv and nogud fasin. Hem bae lisin long prea bilong iu. Hem bae helpem iu for garem peace and trust insaed long iu. (Psalm 71:5; 73:28) God bae saportim iu long taem bilong trabol. (Psalm 18:18) And God laek for givim iu laef olowe olsem present.—⁠Romans 6:​23.

Taem iu kam klos long God, iu bae kam klos long olketa fren bilong God. Olketa bae kamap fren bilong iu tu. Tru nao, olketa bae olsem brata and sista bilong iu. Olketa bae hapi for teachim iu abaotem God and bae helpem and encouragem iu.

Iumi no semsem witim God. Taem iu trae for fren witim God, iu mas minim wanfala important samting. Wei for fren witim God hem no wanfala wei for fren midolwan tufala wea semsem. Hem barava old and wise and strong winim iumi. Hem nao Wan wea shud rulim iumi. So sapos iumi laek for kamap fren bilong hem, iumi mas lisin long hem and duim wanem hem talem iumi for duim. Diswan bae evritaem helpem iumi.—⁠Isaiah 48:18.