Skip to content

Skip to table of contents

 CHAPTER 15

Hao Nao Bae Iu Luksavve Long Tru Religion?

Hao Nao Bae Iu Luksavve Long Tru Religion?

1. Hu nao fit for talem iumi stretfala wei for worshipim God?

STAKA religion sei olketa teachim truth abaotem God. Bat olketa no teachim sem samting abaotem God, and olketa garem difren tingting tu abaotem hao iumi shud worshipim hem. So hao nao bae iumi luksavve long tru religion? Jehovah nomoa savve talem iumi stretfala wei for worshipim hem.

2. Wanem nao bae helpem iu for savve long stretfala wei for worshipim God?

2 Jehovah givim kam Bible for helpem iumi savve long stretfala wei for worshipim hem. So gohed studyim Bible, and Jehovah bae helpem iu for kasem gud samting from wanem iu lanem. Hem bae duim olsem bikos hem barava lovem iu.—Aesaea 48:17.

3. Wanem nao God laekem iumi for duim?

3 Samfala pipol sei God acceptim evri religion, bat datwan hem difren from wanem Jesus talem. Hem sei: “No evriwan wea sei long mi, ‘Lord, Lord,’ bae go insaed long Kingdom bilong God bat man wea duim wanem Dadi bilong mi long heven laekem nao, bae go insaed.” So hem important for iumi lanem wanem God hem  laekem and then iumi duim datwan. Diswan hem serious samting bikos Jesus sei pipol wea no obeyim God ‘olketa pipol for duim nogud samting’ olsem olketa criminal.—Matthew 7:21-23.

4. Olsem Jesus talem, waswe, bae hem isi for duim wanem God laekem? Explainim.

4 Jesus sei bae hem no isi for duim wanem God laekem. Hem sei: “Go insaed long smolfala gate, bikos narafala road hem stap wea waed and isi for wakabaot long hem and staka pipol wakabaot followim datfala road. Bat taem olketa kasem end long road hia, bae olketa dae. Samfala pipol nomoa faendem datfala gate wea smol and datfala road wea no isi for wakabaot long hem. Bat taem olketa kasem end bilong datfala road, olketa bae kasem laef olowe.” (Matthew 7:13, 14) Datfala road wea no isi for wakabaot long hem, wea minim tru worship, hem nao bae mekem man kasem laef olowe. Datfala road wea waed and isi for wakabaot long hem, wea minim worship wea God no acceptim, hem lead go for dae. Bat Jehovah no laekem eniwan for dae. Hem givim chance long evriwan for lane abaotem hem.—2 Peter 3:9.

HAO NAO BAE IU LUKSAVVE LONG TRU RELIGION?

5. Hao nao bae iu luksavve long tru religion?

5 Jesus sei iumi fit for luksavve long tru religion. For luksavve long tru religion, iumi mas  lukluk long wanem religion hia bilivim and wanem hem duim. Jesus sei: “Iufala bae luksavve long olketa hia from samting wea olketa duim.” Hem storyim tru religion olsem tree wea garem gudfala frut. Hem sei: “Evri gudfala tree bae garem gudfala frut.” (Matthew 7:16, 17) Diswan no minim pipol wea followim tru religion olketa perfect. Nomata olsem, olketa traem best for duim stret samting. Distaem bae iumi storyim olketa samting wea bae helpem iumi for luksavve long tru religion.

6, 7. Why nao tru religion teachim nomoa samting wea kam from Bible? Wanem nao iumi lanem from example bilong Jesus?

6 Teachim samting wea kam from Bible. Bible sei: “Evri toktok insaed long olketa Holy Raeting hem kam from God. Hem savve teachim pipol, showim iumi samting wea no stret, stretem evri samting, and stretem tu tingting bilong pipol followim olketa raeteous mark bilong God. Diswan savve mekem wakaman bilong God barava fit and redi for duim evri gudfala waka.” (2 Timothy 3:16, 17) Aposol Paul sei long olketa Christian: “Taem mifala talemaot message bilong God long iufala, iufala acceptim datwan. Iufala no tingse hem toktok bilong man nomoa, bat iufala savve hem toktok bilong God.” (1 Thessalonica 2:13) Tru religion hem teachim nomoa samting wea kam from Bible. Hem no teachim samting wea followim idea and kastom bilong man, or followim eni nara samting.

 7 Evri samting wea Jesus teachim hem kam from olketa Holy Raeting. (Readim John 17:17.) Staka taem hem savve talem toktok insaed olketa Holy Raeting. (Matthew 4:4, 7, 10) Pipol wea followim tru religion followim example bilong Jesus for evritaem teachim samting wea kam from Bible.

8. Jesus sei hu nomoa iumi shud worshipim?

8 Worshipim Jehovah nomoa. Sams 83:18 sei: “Lod [Jehovah], hemi gud tumas sapos olketa save dat yu nao yu God hu hemi hae tumas, an yu nao yu King ovarem evri pipol long wol.” Jesus laekem pipol for savve hu nao trufala God, and hem talem nem bilong God long olketa. (Readim John 17:6.) Jesus sei: “Iu mas baodaon long God bilong iu Jehovah, and iu mas worshipim hem nomoa.” (Matthew 4:10) So iumi followim example bilong Jesus taem iumi worshipim Jehovah nomoa, iusim nem bilong hem, teachim pipol for savve long nem bilong God, and wanem bae hem duim for iumi.

9, 10. Wanem nao iumi savve duim for showimaot iumi lovem each other?

9 Garem trufala love for each other. Jesus talem olketa disaepol for lovem each other. (Readim John 13:35.) Love wea iumi garem for each other nao shud mekem iumi olsem famili, nomata wea nao iumi kam from, culture bilong iumi, or sapos iumi rich or poor. (Colossae 3:14) So iumi no go faet long war and killim dae  pipol. Bible sei: “Samting wea showimaot sapos man hem pikinini bilong God or hem pikinini bilong Devil, hem olsem: Eniwan wea no gohed for duim stret samting hem no pikinini bilong God. And man wea no lovem brata bilong hem, hem no pikinini bilong God tu.” And Bible sei tu: “Iumi mas lovem iumi evriwan. Iumi mas no olsem Cain wea hem followim wei bilong Devil and wea hem killim dae brata bilong hem.”—1 John 3:10-12; 4:20, 21.

10 Iumi iusim taem, strong, and olketa material samting wea iumi garem for helpem and encouragem each other. (Hebrew 10:24, 25) Iumi “mas duim gudfala samting long evriwan.”—Galatia 6:10.

11. Why nao iumi mas obeyim Jesus?

11 Obeyim Jesus bikos hem nomoa savve sevem iumi. Bible sei: “Hem nomoa man wea savve sevem iumi bikos no eni man moa long earth hem kasem paoa from God for sevem iumi.” (Acts 4:12) Long Chapter 5 iumi lanem Jehovah sendem kam Jesus for peim ransom for sevem olketa man wea obey. (Matthew 20:28) Jehovah markem Jesus for rulim disfala earth. Dastawe Bible sei for iumi mas obeyim Jesus sapos iumi laek for laef olowe.—Readim John 3:36.

12. Why nao iumi no join insaed politik?

12 No join insaed politik. Jesus no join insaed politik. Taem olketa kotem hem, hem sei long Pilate wea hem bigman bilong Rome: “Kingdom  bilong mi hem no bilong disfala world.” (Readim John 18:36.) Iumi followim example bilong Jesus taem iumi sapotim nomoa Kingdom bilong God. Nomata wanem kantri iumi stap long hem, iumi no join insaed gavman bilong datfala ples. Nomata olsem, Bible sei iumi mas obeyim “olketa wea rul,” wea minim olketa gavman. (Rome 13:1) Iumi obeyim olketa law bilong kantri wea iumi stap long hem. Bat sapos wanfala law sei for iumi duim samting wea againstim law bilong God, iumi mas followim example bilong olketa aposol, wea olketa sei: “God nao hem ruler wea mifala mas obeyim, no olketa man.”—Acts 5:29; Mark 12:17.

13. Wanem nao Kingdom bilong God bae duim?

13 Talemaot Kingdom bilong God nomoa savve stretem olketa problem long world. Jesus sei “gud nius abaotem Kingdom” bae olketa talemaot long evri ples long world. (Readim Matthew 24:14.) No eni gavman bilong man savve duim wanem Kingdom bilong God bae duim for iumi olketa man. (Sams 146:3) Jesus teachim iumi for prea for Kingdom bilong God taem hem sei: “Mifala laekem Kingdom bilong iu for kam. Duim samting wea iu laek for duim long earth, olsem iu duim long heven.” (Matthew 6:10) Bible sei Kingdom bilong God bae distroem evri gavman bilong man and hem nomoa bae “hemi stap evritaem olowe.”—Daniel 2:44.

14. Long tingting bilong iu, wanem religion nao hem tru religion?

14 Bihaen iumi storyim olketa samting hia wea  bae helpem iumi for luksavve long tru religion, tingim olketa kwestin hia: ‘Hu nao teachim samting wea kam from Bible? Hu nao talem nem bilong God long pipol? Hu nao garem trufala love for each other and bilivim God sendem kam Jesus for sevem iumi? Hu nao no join insaed politik? Hu nao talemaot Kingdom bilong God nomoa savve stretem olketa problem long world?’ Olketa Jehovah’s Witness nomoa duim evri samting hia.—Aesaea 43:10-12.

WASWE, BAE IU DUIM WANEM GOD TALEM?

15. Wanem nao iumi mas duim sapos iumi laekem God for acceptim worship bilong iumi?

15 For bilivim nomoa God hem stap, hem no inaf. Olketa demon tu bilivim God hem stap, bat olketa no obeyim hem. (James 2:19) Sapos iumi laekem God for acceptim worship bilong iumi, iumi mas bilivim hem stap and duim tu wanem hem talem.

16. Why nao iumi mas lusim false religion?

16 Sapos iumi laekem God for acceptim worship bilong iumi, iumi mas lusim false religion. Profet Isaiah sei: “Yufala mas kamaot from datfala ples an yufala mas kamap klin.” (Aesaea 52:11; 2 Corinth 6:17) So iumi mas lusim eni samting wea join witim false religion.

17, 18. Wanem nao “Bigfala Babylon,” and why nao hem important for lusim?

17 Eni religion wea teachim pipol samting wea againstim Bible, hem false religion. Nem wea  Bible kolem long evri false religion hem “Bigfala Babylon.” (Revelation 17:5) Why nao Bible kolem evri false religion long datfala nem? Olketa teaching wea staka false religion bilivim olketa start long Babylon, bihaen Flood long taem bilong Noah. Olketa false teaching hia spred go kasem evriwea long earth. Olsem example, pipol wea stap long Babylon worshipim olketa god wea garem thrifala god insaed wanfala. Distaem tu, staka religion teachim God hem wanfala Trinity, bat Bible showimaot klia wanfala tru God nomoa hem stap, wea nem bilong hem Jehovah, and Jesus hem Son bilong hem. (John 17:3) Pipol long Babylon bilivim tu bihaen man dae hem go laef samwea and hem savve safa long hellfire tu. Datfala biliv hem no stret.—Lukim Endnote 14, Endnote 17, and Endnote 18.

18 God sei klosap nao evri false religion bae finis. (Revelation 18:8) So waswe, iu luksavve why hem barava important for lusim false religion distaem? Jehovah laekem iu for duim datwan kwiktaem bifor hem leit.—Revelation 18:4.

Taem iu worshipim Jehovah, bae iu insaed wanfala famili wea stap evriwea long world

19. Taem iu disaed for worshipim Jehovah, wanem blessing nao bae iu kasem from Jehovah?

19 Taem iu disaed for lusim false religion and worshipim Jehovah, samfala fren or olketa long famili bilong iu maet no minim why nao iu duim datwan and maet givim iu hard taem tu. Bat Jehovah bae no lusim iu. Bae iu insaed  wanfala famili wea garem staka million pipol insaed wea stap evriwea long world wea lovem each other, and bae iu garem hope for laef olowe insaed niu world wea God promisim. (Mark 10:28-30) And sapos iu no givap, maet bihaen samfala fren or olketa long famili wea givim iu hard taem bae disaed for studyim Bible.

20. Why nao hem important for worshipim God long stretfala wei?

20 Klosap nao God bae finisim evri nogud samting and Kingdom bilong hem bae rul ovarem disfala earth. (2 Peter 3:9, 13) Long datfala taem laef bae hem gud tumas! Evriwan bae worshipim Jehovah long stretfala wei. So hem important for iu disaed distaem for worshipim God long stretfala wei.