Skip to content

Skip to table of contents

 CHAPTER 10

Truth Abaotem Olketa Angel

Truth Abaotem Olketa Angel

1. Why nao Jehovah laekem iumi for savve abaotem olketa angel?

JEHOVAH laekem iumi for savve long olketa insaed famili bilong hem. Olketa angel tu insaed famili bilong God. Bible sei olketa angel “olketa son bilong God.” (Job 38:7, NW) Wanem nao waka bilong olketa angel? Wanem nao olketa angel duim for helpem pipol long bifor? Waswe, olketa savve helpem iumi distaem tu?—Lukim Endnote 8.

2. Hu nao wakem olketa angel, and hao many angel nao hem wakem?

2 Hu nao wakem olketa angel? Colossae 1:16 sei bihaen Jehovah wakem Jesus, hem “wakem evri nara samting long heven and long earth.” So datwan minim Jehovah nao wakem olketa angel. Hao many angel nao Jehovah wakem? Bible sei staka handred million angel nao stap long heven.—Sams 103:20; Revelation 5:11.

3. Olsem Job 38:4-7 talem, hao nao feeling bilong olketa angel taem olketa lukim God wakem earth?

3 Bible sei tu Jehovah wakem olketa angel bifor hem wakem disfala earth. Hao nao feeling bilong olketa angel taem olketa lukim earth? Bible buk Job sei olketa hapi tumas and olketa olsem famili wea fren gud witim each other and wan mind for duim waka bilong Jehovah.—Job 38:4-7.

OLKETA ANGEL HELPEM PIPOL BILONG GOD

4. Hao nao iumi savve olketa angel barava laek for helpem iumi olketa man?

4 Start kam long taem wea God wakem disfala earth,  olketa angel interest tumas long iumi olketa man, and plan bilong God for disfala earth and for iumi olketa man. (Provebs 8:30, 31; 1 Peter 1:11, 12) Masbi olketa sorre tumas taem olketa lukim Adam and Eve bighed and againstim God. Maet distaem olketa barava sorre tu taem olketa lukim staka pipol disobeyim Jehovah. Bat taem eniwan repent and kam bak long God, olketa angel barava hapi tumas. (Luke 15:10) Olketa angel laekem tumas for helpem pipol wea worshipim God. Jehovah iusim olketa angel for helpem and protectim pipol bilong hem long earth. (Hebrew 1:7, 14) Distaem bae iumi storyim samfala example.

“God . . . sendem kam enjel blong hem fo satem maos blong olketa laeon.”—Daniel 6:22

5. Long bifor, wanem nao olketa angel duim for helpem pipol bilong God?

5 Jehovah sendem kam tufala angel for helpem Lot and famili bilong hem taem hem finisim Sodom and Gomorrah. (Jenesis 19:15, 16) Staka handred year bihaen, olketa torowem Daniel long hol bilong lion bat olketa lion no kaikaim hem, bikos “God . . . sendem kam enjel blong hem fo satem maos blong olketa laeon.” (Daniel 6:22) Taem aposol Peter stap long prison, Jehovah sendem kam wanfala angel for mekem hem free. (Acts 12:6-11) Olketa angel helpem Jesus tu taem hem stap long earth. Olsem example, bihaen hem baptaes “olketa angel helpem hem.” (Mark 1:13) Long naet bifor Jesus dae, wanfala angel kam and “strongim hem.”—Luke 22:43.

6. (a) Hao nao iumi savve olketa angel helpem pipol bilong God distaem? (b) Olketa wanem kwestin nao bae iumi storyim distaem?

6 Distaem, iumi olketa man no savve lukim olketa angel olsem pipol long bifor. Bat God iusim yet olketa  angel for helpem pipol bilong hem. Bible sei: “Oltaem Enjel blong [Jehovah] hemi gohed fo gadem olketa wea i tinghae long [Jehovah], an hemi gohed fo sevem olketa from trabol.” (Sams 34:7) Why nao iumi needim olketa angel for protectim iumi? Bikos olketa enemy wea laek for spoelem iumi garem bigfala paoa. Hu nao olketa? Olketa stap long wea? Wanem nao olketa laek  duim for spoelem iumi? For kasem ansa bilong olketa kwestin hia, bae iumi storyim samting wea happen no longtaem bihaen God wakem Adam and Eve.

OLKETA ENEMY WEA IUMI NO SAVVE LUKIM

7. Satan laekem pipol for duim wanem?

7 Long Chapter 3 iumi lanem wanfala angel hem bighed againstim God and laek for rul ovarem olketa narawan. Bible sei nem bilong hem Devil and Satan. (Revelation 12:9) Satan laekem olketa narawan tu for againstim God. Hem laea long Eve and Eve bilivim hem, and kam kasem distaem hem laea long staka pipol tu. Nomata olsem, samfala gohed faithful long Jehovah olsem Abel, Enoch, and Noah.—Hebrew 11:4, 5, 7.

8. (a) Hao nao gogo samfala angel kamap olketa demon? (b) Wanem nao olketa demon hia duim mekem olketa no dae long Flood?

8 Long taem bilong Noah, samfala angel bighed againstim God and lusim heven for kam stap long earth olsem olketa man. Why nao olsem? Bible sei olketa laek for maritim olketa woman long earth. (Readim Jenesis 6:2) Bat olketa brekem law bilong God taem olketa duim datwan. (Jude 6) Staka pipol long datfala taem tu no obeyim God and raf olsem olketa nogud angel hia. So Jehovah mekem bigfala flood for kavarem full earth and finisim olketa nogud pipol hia. Bat hem sevem famili bilong Noah wea faithful long hem. (Jenesis 7:17, 23) From olketa angel no laek for dae, olketa go bak long heven. Bible kolem olketa nogud angel hia olketa demon. From olketa disaed for saedem Satan for againstim God, Devil kamap ruler bilong olketa.—Matthew 9:34.

9. (a) Wanem nao happen long olketa demon taem olketa go bak long heven? (b) Wanem nao bae iumi lanem distaem?

 9 Jehovah no acceptim olketa demon moa insaed famili bilong hem bikos olketa bighed againstim hem. (2 Peter 2:4) Hem no letem olketa demon hia for changem body bilong olketa for kamap olsem olketa man moa. Nomata olsem, olketa gohed “laea long evriwan long earth” kam kasem distaem. (Revelation 12:9; 1 John 5:19) Bae iumi storyim wanem olketa duim for laea long staka pipol distaem.—Readim 2 Corinth 2:11.

WANEM OLKETA DEMON DUIM FOR LAEA LONG PIPOL

10. Wanem nao olketa demon duim for laea long pipol?

10 Olketa demon duim staka samting for laea long pipol. Staka pipol savve go long olketa kastom man, and olketa magic man for story witim olketa demon for olketa. Diswan hem spiritism or eni samting wea join witim devildevil. Bat Bible warnim iumi for stap klia from datwan. (Galatia 5:19-21) Why nao olsem? Olsem man wea hunting hem iusim trap for kasholem olketa animal, olketa demon laea long pipol for trapim and kontrolem olketa.—Lukim Endnote 26.

11. Wanem nao wanfala wei wea olketa demon iusim for trapim pipol?

11 Wanfala wei wea olketa demon iusim for trapim pipol hem for mekem olketa laek faendaot wanem bae happen long future, or for faendaot long eni samting wea olketa laek for savve long hem. Olsem example, for studyim olketa star, readim tarot card, iusim crystal ball, or readim insaed hand bilong man. And tu, sapos samwan sik or dae bae olketa go long kastom man for  faendaot hu nao poisonim hem or sapos eniwan iusim devildevil for killim hem dae. Staka pipol tingse hem stret nomoa for duim olketa samting hia. Bat diswan hem barava rong and hem danger samting tu. Bible sei olketa demon nao iusim olketa kastom man. Long Acts 16:16-18, hem storyim “wanfala gele wea demon stap long hem” and hem “savve talem olketa samting wea no happen yet.” Bihaen aposol Paul raosem demon hia from datfala gele, hem no savve talem nao olketa samting wea bae happen long future.

12. (a) Why nao iumi mas no trae for story witim man wea dae finis? (b) Why nao pipol bilong God mas no followim eni kastom wea join witim devildevil?

12 Olketa demon duim nara samting tu for trapim pipol. Olketa mekem pipol for tingse olketa savve story witim man wea dae finis, and olketa wea dae go stap long nara ples, and savve story witim or spoelem iumi tu. Olsem example, taem wanfala long famili or fren hem dae, olketa savve go long samwan wea olketa sei hem savve story witim man wea dae finis. Hem maet talem samfala samting abaotem datfala man wea dae, and story tu long voice wea here olsem datfala man. (Fas Samuel 28:3-19) Staka kastom wea pipol followim taem olketa berem man wea dae hem followim biliv wea sei man wea dae hem go stap long nara ples. Taem olketa Christian no laek join insaed olketa kastom hia, maet famili or pipol long community againstim and les long olketa. Bat olketa Christian savve man wea dae hem no laef and stap long eni nara ples. Iumi no savve story witim olketa, and olketa no savve spoelem iumi. (Sams 115:17) Iu mas barava careful. Iu mas no trae for  story witim man wea dae finis or witim olketa demon, and no followim eni kastom wea join witim devildevil.—Readim Diutronomi 18:10, 11; Aesaea 8:19.

13. Staka pipol wea fraetem olketa demon bifor, distaem olketa hao?

13 Olketa demon no laea long pipol nomoa bat olketa mekem pipol fraet tu. Distaem, Satan and olketa demon savve olketa “garem lelebet taem nomoa” bifor God finisim olketa, dastawe olketa barava raf winim enitaem bifor. (Revelation 12:12, 17) Nomata olsem, staka thousand pipol wea fraetem olketa demon bifor, distaem olketa no fraetem olketa demon nao. Wanem nao olketa duim for mekem olketa free from olketa demon?

AGAINSTIM AND FREE FROM OLKETA DEMON

14. Sapos iumi laek free from olketa demon, wanem nao iumi mas duim olsem olketa Christian long first century?

14 Bible storyim wanem iumi savve duim for gohed againstim olketa demon and hao for kamap free from olketa. Olsem example, samfala wea stap long Ephesus long first century savve story witim olketa demon bifor olketa lanem truth. Wanem nao olketa duim for free from olketa demon? Bible sei: “Staka wea duim magic tekem kam olketa buk bilong olketa and bonem front long evriwan.” (Acts 19:19) From olketa laek for kamap Christian, olketa bonem evri buk wea storyim olketa magic samting. Iumi tu mas duim sem samting distaem. Eniwan wea laek for worshipim Jehovah mas torowem eni samting wea join witim olketa demon. Maet hem samfala buk, magasin, horoscope, movie, singsing, game, poster, and eni samting wea iumi iusim or keepim for protectim iumi.  And nomata maet iumi barava interest for lukluk, lisin, iusim, or keepim olketa samting hia, iumi mas torowem olketa samting hia bikos olketa join witim demon.—1 Corinth 10:21.

15. Wanem nao iumi mas duim for gohed againstim Satan and olketa demon?

15 Nomata samfala year bihaen olketa long Ephesus bonem olketa buk wea story abaotem olketa magic samting, aposol Paul sei olketa still “insaed wanfala faet” and olketa mas faetem “bigfala sekson bilong olketa demon.” (Ephesus 6:12) Tru nao, nomata olketa bonem finis olketa buk bilong olketa, olketa demon gohed trae for spoelem olketa Christian hia. So wanem nao bae olketa duim? Paul sei long olketa: “Holem datfala big shield wea hem nao faith. Iufala savve iusim diswan for blokem olketa arrow bilong Satan wea laet long fire.” (Ephesus 6:16) Olsem shield savve protectim soldia long taem bilong faet, faith bilong iumi savve protectim iumi. Sapos iumi barava trustim Jehovah for protectim iumi, bae iumi fit for gohed againstim Satan and olketa demon.—Matthew 17:20.

16. Wanem nao iumi savve duim for strongim faith bilong iumi long Jehovah?

16 Wanem nao iumi savve duim for strongim faith bilong iumi long Jehovah? Iumi mas readim Bible evriday mekem iumi strongim trust bilong iumi long Jehovah for protectim iumi. Sapos iumi garem strongfala faith long Jehovah, bae Satan and olketa demon no savve spoelem iumi.—1 John 5:5.

17. Wanem nao nara samting wea iumi savve duim for protectim iumi from olketa demon?

17 Wanem nao nara samting wea olketa Christian  long Ephesus mas duim? Olketa stap insaed long taon wea staka pipol worshipim demon. So Paul sei long olketa: “Gohed evritaem for . . . prea.” (Ephesus 6:18) Olketa mas askem Jehovah for protectim olketa evritaem. Waswe long iumi? Iumi tu stap long world wea staka pipol bilivim devildevil. So iumi tu mas askem Jehovah for protectim iumi and talem nem bilong hem taem iumi prea. (Readim Provebs 18:10.) Sapos iumi gohed askem Jehovah for protectim iumi from Satan, Jehovah bae ansarem olketa prea bilong iumi.—Sams 145:19; Matthew 6:13.

18, 19. (a) Wanem nao iumi savve duim for winim disfala faet againstim Satan and olketa demon? (b) Wanem kwestin nao bae iumi storyim long nextfala chapter?

18 Sapos iumi lusim evri samting wea join witim olketa demon and iumi barava trustim Jehovah for protectim iumi, iumi savve againstim Satan and olketa demon. Iumi no garem eni reason for fraet long olketa. (Readim James 4:7, 8.) Jehovah hem strong winim olketa demon. Hem panisim olketa long taem bilong Noah, and bae hem finisim olketa long future. (Jude 6) No forgetim, Jehovah iusim olketa angel bilong hem for protectim iumi, so iumi no faet seleva. (Mektu Kings 6:15-17) Iumi barava sure iumi fit for winim disfala faet againstim Satan and olketa demon, bikos Jehovah bae helpem iumi.—1 Peter 5:6, 7; 2 Peter 2:9.

19 For longtaem nao Satan and olketa demon mekem staka pipol for safa, so why nao God no distroem olketa? Bae iumi storyim disfala kwestin long nextfala chapter.