Skip to content

Skip to table of contents

 STORY 64

Solomon Buildim Temple

Solomon Buildim Temple

BIFOR David hem dae, hem givim long Solomon olketa plan from God for buildim temple bilong Jehovah. Long mek-foa year long rul bilong hem, Solomon start for buildim temple, and olketa finisim insaed seven and haf year. Plande thousand pipol nao wakem temple, and building hia hem kostim staka selen. Diswan hem from olketa iusim plande gold and silver for buildim.

Temple hia garem tufala main rum, olsem bilong tabernacle. Bat olketa rum hia tu-taems moa big winim olketa rum bilong tabernacle. Solomon putim ark bilong covenant long rum insaed long temple, and olketa narafala samting wea olketa keepim insaed long tabernacle olketa putim long narafala rum.

Taem olketa wakem temple finis, olketa enjoyim wanfala big celebration. Solomon nildaon front long temple and prea, olsem iu savve lukim long piksa. Solomon hem sei long Jehovah: ‘Nomata big bilong full heven, hem no fitim iu for stap insaed, so disfala temple hem barava no fitim iu. Bat, O God bilong mi, plis lisin long pipol bilong iu taem olketa kam long disfala ples.’

Taem Solomon finisim prea bilong hem, fire kam daon from heven. Hem bonem olketa animal sakrifaes wea olketa mekem. And wanfala braet laet from Jehovah hem fulimap temple. Diswan showimaot hao Jehovah hem lisin, and hem hapi witim disfala temple and prea bilong Solomon. So temple nao kamap ples wea pipol bae kam for worship, and no long tabernacle.

For longfala taem, Solomon hem rul long wisefala wei, and olketa pipol hapi. Bat Solomon maritim staka woman from narafala kantri wea no worshipim Jehovah. Waswe, iu savve lukim wanfala long hia wea worshipim idol? Gogo olketa waef bilong hem mekem Solomon for worshipim olketa nara god tu. Waswe, iu savve wanem nao happen taem Solomon duim diswan? Hem no showimaot kaenfala fasin long olketa pipol moa. Hem kamap raf, and olketa pipol no hapi nao.

Diswan mekem Jehovah hem kros long Solomon, and hem sei olsem long hem: ‘Mi bae tekem kingdom awe from iu and givim long narafala man. Mi bae no duim diswan taem iu laef, bat long taem wea son bilong iu hem rul. Bat mi bae no tekem evri pipol bilong kingdom from son bilong iu.’ Bae iumi lukim hao diswan hem happen.

1 Chronicles 28:9-21; 29:1-9; 1 Kings 5:1-18; 2 Chronicles 6:12-42; 7:1-5; 1 Kings 11:9-13.