Skip to content

Skip to table of contents

 LAEF BILONG CHRISTIAN

Iusim Olketa Video for Teachim Bible Study Bilong Iu

Iusim Olketa Video for Teachim Bible Study Bilong Iu

Pipol savve interest for lukim olketa video and piksa and datwan savve helpem olketa for minim and rememberim wanem olketa lanem. Jehovah, wea hem nambawan teacher, iusim olketa samting wea man savve lukim for teachim olketa important leson. (Jenesis 15:5; Jeremaea 18:1-6) Jesus tu iusim wanem pipol savve lukim for teachim olketa. (Mt 18:2-6; 22:19-21) Distaem, olketa video barava helpem iumi for teachim truth long pipol. Waswe, iu iusim olketa video taem iu teachim Bible study bilong iu?

Distaem iumi garem tenfala video wea iumi savve iusim taem iumi studyim Gud Nius From God! brochure witim samwan. Olketa video hia hem join witim olketa leson long datfala brochure. Klosap evri title bilong video hem semsem witim wanfala kwestin long leson wea hem join witim. Online copy bilong datfala brochure hem garem link for remindim iumi for showim olketa video hia. Iumi garem olketa nara video tu wea iumi savve pleim taem iumi iusim olketa nara study pablikeson long Teaching Toolbox.

Waswe, iu studyim wanfala subject witim Bible study bilong iu wea hard for hem minim? Or waswe, Bible study bilong iu feisim hard taem? Lukluk long jw.org® and JW Broadcasting® for faendem video wea savve helpem hem. Maet iu and Bible study bilong iu savve lukim wanfala video hia and then story raonem.

Evri month, iumi kasem olketa niu video. Taem iu lukluk long olketa video hia, tingim hao iu savve iusim olketa for teachim narawan.