Skip to content

BIBLE CHANGEM LAEF BILONG PIPOL

“Mi Tingse Mi Garem Evri Samting wea Mi Laekem”

“Mi Tingse Mi Garem Evri Samting wea Mi Laekem”
  • YEAR HEM BORN: 1962

  • KANTRI HEM KAM FROM: Canada

  • HISTORY: Laef bilong hem olobaot tumas

LAEF BILONG MI BIFOR

Mi born long Montreal, biggest taon long Quebec province long Canada. Mi garem tufala brata and wanfala sista. Dadi and mami lovem mifala and mifala growap long wanfala naes ples long Rosemont. Mifala stap gud and enjoyim laef.

Taem mi smol boy, mi interest long Bible. Mi tingim taem mi 12 year, mi interest tumas for readim Niu Testament wea story abaotem laef bilong Jesus. Mi laekem tumas for olsem hem bikos hem lovem and tingim olketa narawan. Sorre samting nao tingting hia isisi lus taem mi start for big and fren witim pipol wea garem nogud wei.

Dadi bilong mi hem man for pleim saxophone, and hem givim instrument bilong hem for mi, datwan mekem mi for lovem music olsem hem tu. Mi barava laekem tumas music, so mi start for lane for ringim guitar. Gogo, mi startim wanfala rock band witim samfala fren bilong mi and mifala savve plei long olketa show. Samfala famous music producer lukim mi and laek for promotim music bilong mi. Mi saenem contract witim wanfala big recording company. Music bilong mi kamap popular and olketa savve pleim staka taem long radio long Quebec.

Mi tingse mi garem evri samting wea mi laekem. Mi young and mi famous, mi garem staka selen and mi laekem tumas waka wea mi duim. Long daytaem mi go train long gym, duim olketa interview, saenem olketa autograph, and staka taem mi insaed television show. Long naet mi plei long olketa show and joinim staka party. Taem mi young, mi start for drinkim alcohol for mekem mi no fraet taem mi standap front long crowd, then gogo mi start for iusim drug tu. And tu, mi no kea abaotem laef bilong mi and mi olobaot tumas.

Samfala laekem kaen laef wea mi garem bikos luk olsem mi hapi. Bat insaed long mi, mi nating hapi and satisfae nomoa. Mi savve feel olsem especially taem mi stap seleva. Mi savve sorre and wari. Gogo mi barava popular, then seknomoa tufala music producer bilong mi dae from sik AIDS. Mi seke tumas! Nomata mi laekem tumas music, mi barava les nao long kaen laef olsem.

BIBLE CHANGEM LAEF BILONG MI

Nomata mi garem staka gud samting, mi luksavve world hem barava nogud tumas. Why nao staka samting wea no stret hem gohed for happen? Mi ting, why nao God no kwiktaem for duim samting? Staka taem mi prea long God abaotem datwan. Wantaem, taem band bilong mifala no go tour mi start for readim Bible moa. Nomata mi no minim staka samting wea mi readim, mi luksavve masbi end long world hem klosap nao.

Taem mi readim Bible, mi lukim hao wantaem Jesus no kaikai for 40-fala day taem hem stap long wilderness. (Matthew 4:​1, 2) Then mi ting sapos mi duim sem samting, maet God bae showim hemseleva long mi, so mi markem date. Tufala week bifor mi start for no kaikai, tufala Jehovah’s Witness noknok long door, and taem mi invaetem tufala for kam insaed hem olsem mi expectim tufala finis. Mi luk stret long eye bilong wanfala witness wea nem bilong hem Jacques and mi ask olsem, “Hao nao iumi savve iumi stap long olketa last day distaem?” Hem openem Bible and readim 2 Timothy 3:​1-5 for ansarem kwestin bilong mi. Mi askem staka kwestin long tufala and mi hapi tumas taem tufala iusim Bible for ansarem olketa kwestin hia long wei wea klia and wea mekem mi satisfae. Bihaen tufala visitim mi samfala taem moa, mi luksavve mi no need for followim plan bilong mi for stop kaikai.

Mi start for studyim Bible evritaem witim olketa Witness. Gogo, mi katem long hair bilong mi and start for attendim evri meeting long Kingdom hall. Wei wea olketa brata and sista welkamim mi long olketa meeting hia mekem mi for barava sure diswan nao truth.

For followim wanem mi lanem insaed Bible, mi need for mekem samfala big change long laef bilong mi. Wanfala samting, hem nao for stop for iusim olketa drug, and lusim olketa nogud wei bilong mi. Mi need for changem tu wei bilong mi for tingim seleva and mi need for tingim olketa narawan. From mi wanfala singol parent, mi mas lane for tingim feeling bilong tufala pikinini bilong mi and provaedem spiritual need bilong tufala. So mi lusim band bilong mi, and waka nomoa long wanfala factory wea pei bilong hem smol nomoa.

Hem no isi for mekem olketa change olsem. Taem mi traem best for lusim drug, diswan affectim body bilong mi, so samfala taem gogo mi iusim moa olketa drug. (Rome 7:​19, 21-​24) Wanfala main challenge, hem for lusim kaen laef bilong mi wea olobaot tumas. And tu, waka bilong mi long factory savve mekem mi taed tumas, and selen wea mi kasem hem smol fogud. Hem tekem thrifala month for kasem sem selen wea mi savve kasem insaed tufala hour nomoa taem mi pleim music.

Prea helpem mi for no givap for mekem olketa hardfala change hia. And tu, mi luksavve hem important for duim Bible reading evritaem. Wanfala scripture wea encouragem mi tumas hem 2 Corinth 7:1 wea encouragem olketa Christian for klinim olketa seleva from eni samting wea savve mekem body and tingting for no klin. Nara scripture wea helpem mi for luksavve mi fit for lusim olketa nogud wei bilong mi hem nao Philippi 4:​13 wea sei: “Nomata wanem samting hem kasem mi, paoa wea mi kasem from God nao hem strongim mi for gohed.” Jehovah God ansarem olketa prea bilong mi and helpem mi for minim and followim truth insaed long Bible. Diswan muvim mi for dedicatem laef bilong mi long hem. (1 Peter 4:​1, 2) Mi baptaes olsem wanfala Jehovah’s Witness long1997.

GUD SAMTING WEA MI KASEM

Mi barava luksavve sapos mi gohed nomoa for followim laef bilong mi bifor, hard for mi laef distaem. Bat distaem mi barava enjoyim laef bilong mi! Waef bilong mi Elvie, hem wanfala blessing for mi. Mitufala duim full-taem ministry and hapi for teachim Bible long narawan. Diswan barava mekem mi hapi and satisfae. Mi barava thankiu long Jehovah from hem leadim mi go long hem.​—John 6:​44.