Skip to content

Skip to secondary menu

Olketa Jehovah’s Witness

Solomon Islands Pidgin

Why Nao Olketa Jehovah’s Witness No Celebratem Christmas?

Why Nao Olketa Jehovah’s Witness No Celebratem Christmas?

Samfala rong idea wea pipol garem

Rong idea: Olketa Jehovah’s Witness no celebratem Christmas bikos olketa no biliv long Jesus.

Tru samting: Mifala Christian. Mifala bilivim Jesus Christ nomoa savve sevem iumi.—Acts 4:12.

Rong idea: From iufala teachim olketa member for no celebratem Christmas datwan mekem olketa famili no stap gud tugeta.

Tru samting: Mifala barava laekem olketa famili for hapi, and mifala iusim Bible for helpem olketa famili member stap gud tugeta.

Rong idea: Iufala misstim gud samting wea nara pipol kasem long Christmas taem olketa givim samting, mekhae long peace, and duim gud samting for narawan.

Tru samting: Mifala traem best for kaen and stap gud witim narawan evriday. (Proverbs 11:25; Rome 12:18) Olsem example, olketa meeting bilong mifala and wei wea mifala preach hem followim instruction bilong Jesus wea sei: “Samting wea iufala kasem hem free nomoa, so iufala mas no askem selen for samting wea iufala duim.” (Matthew 10:8) Nara samting tu, mifala mekhae long Kingdom bilong God wea hem nomoa bae mekem earth for garem peace.—Matthew 10:7.

Why nao Olketa Jehovah’s Witness no celebratem Christmas?

  • Jesus talem iumi for celebratem dae bilong hem, no taem wea hem born.—Luke 22:19, 20.

  • Olketa aposol and disaepol long taem bilong Jesus no celebratem Christmas. Datfala New Catholic Encyclopedia hem sei pipol start for celebratem Christmas long samting olsem 243 [C.E.], wea hem winim wan handred year bihaen olketa aposol dae.

  • No eni pruv stap wea showimaot Jesus born long December 25. Bible no talem date wea hem born.

  • Long tingting bilong mifala God hem no hapi long Christmas bikos Christmas kam from olketa heathen kastom and celebration.—2 Corinth 6:17.

Why nao iufala duim samting wea mekem pipol ting daonem iufala?

Staka pipol celebratem Christmas nomata olketa savve hem kam from olketa heathen celebration and Bible no sapotim. Maet long tingting bilong olketa hem gud for olketa Christian celebratem Christmas winim for olketa narawan feel nogud long olketa.

Bible sei iumi shud iusim “gudfala tingting” for “luksavve long samting wea God laekem,” no followim nomoa tingting bilong nara pipol. (Rome 12:1, 2) Bible teachim iumi for tinghae long tru samting. (John 4:23, 24) Mifala no laekem nara pipol for garem nogud tingting abaotem mifala. Bat mifala laek for obeyim wanem Bible talem nomata datwan mekem samfala les long mifala.

Nomata mifala chus for no celebratem Christmas, mifala respectim raet bilong each man wanwan for disaed seleva for celebratem or nomoa. Mifala no trae for stopem narawan for celebratem Christmas.