Olketa Jehovah’s Witness no faet long war bikos long olketa reason hia:

  1. Obeyim God. Bible hem sei olketa wea worshipim God bae “hammerim naef for faet for kamap hou” and no “lanem moa hao for faet.”—Isaiah 2:4.

  2. Obeyim Jesus. Jesus sei olsem long aposol Peter: “Iu no duim olsem. Leavim sword ia. Eniwan wea iusim sword for killim dae narawan, bae olketa iusim sword for killim hem dae tu.” (Matthew 26:52) Disfala toktok bilong Jesus showimaot olketa wea followim hem bae no faet long war.

    Olketa disaepol bilong Jesus no teksaed long politik from olketa obeyim komand bilong hem for “no olsem pipol long world.” (John 17:16) Olketa no tok againstim disison bilong gavman for faet long war, and olketa no trae for stopem olketa narawan wea chus for joinim army.

  3. Love for olketa narawan. Jesus talem disfala komand long olketa disaepol bilong hem: “Iufala mas lovem iufala evriwan.” (John 13:34, 35) From olketa disaepol bilong Jesus obeyim datfala komand, evriwan long olketa wan mind nomata long wanem kantri olketa stap long hem, and no eniwan long olketa bae faet againstim spiritual brata or sista bilong olketa long war.—1 John 3:10-12.

  4. Example bilong olketa firstfala Christian. Encyclopedia of Religion and War hem sei: “Olketa firstfala follower bilong Jesus no agree long war and no savve faet long war,” bikos long tingting bilong olketa wei for faet long war “no followim olketa teaching bilong Jesus abaotem love and komand for man lovem olketa enemy bilong hem.” Wanfala savveman from Germany wea nem bilong hem Peter Meinhold storyim olketa firstfala follower bilong Jesus and sei: “Hard for eni Christian kamap soldia.”

Gudfala samting mifala duim long community

Olketa Jehovah’s Witness trae for duim gud samting long narawan and no duim eni samting for spoelem peace bilong kantri wea olketa stap. Mifala respectim paoa bilong gavman, followim tufala komand hia long Bible:

  • “Stap anda long olketa wea rul.”—Rome 13:1.

  • “Givim go bak long King samting wea hem bilong King, and givim go bak long God samting wea hem bilong God.”—Matthew 22:21.

Dastawe mifala obeyim olketa law bilong kantri, peim olketa tax, and followim olketa samting wea gavman talem for helpem pipol long kantri for stap gud.