Skip to content

Skip to secondary menu

Olketa Jehovah’s Witness

Solomon Islands Pidgin

Wanem Nao Wanfala Bible Study?

Wanem Nao Wanfala Bible Study?

Olketa Jehovah’s Witness duim wanfala Bible study program wea ansarem staka kwestin. Samfala kwestin hem:

  • Hu nao God?

  • Waswe, God tingim mi?

  • Hao nao mi savve stap gud witim marit partner bilong mi?

  • Wanem samting nao savve mekem mi hapi?

Long daon iu savve lukim ansa for olketa kwestin wea staka pipol askem abaotem Bible study program bilong mifala.

Hao nao iufala studyim Bible witim man? Mifala chusim eni subject olsem “God” or “marit” and then storyim olketa scripture long Bible abaotem datwan. Wei for duim olsem helpem man for savve long wanem Bible teachim abaotem datfala subject, and long wei olsem, mifala letem Bible nao for explainim datwan.

For helpem mifala studyim Bible witim pipol, mifala iusim buk Wanem Nao Really Samting wea Bible Teachim? Disfala buk storyim plande subject long kliafala wei. Samfala subject hia hem samting wea Bible teachim abaotem God, Jesus, and future bilong iumi.

Waswe, eni kost for datfala Bible study? Bible study hem free nomoa, and mifala no kostim buk wea mifala iusim tu.

Hao long nao each study? Staka pipol savve studyim Bible for wan hour evri week. Bat datwan hem no wanfala rul. Mifala savve change for fitim living bilong man.

Wanem bae happen bihaen mi ask for studyim Bible? Taem iu ask for wanfala Bible study, wanfala Jehovah’s Witness bae visitim iu long taem and ples wea fitim iu. Hem bae spendem tu-thri minute nomoa for showim iu study program bilong mifala. Sapos iu laekem, iu savve gohed long datfala study.

Sapos mi studyim Bible witim iufala, waswe, datwan minim mi mas kamap wanfala Jehovah’s Witness tu? Nomoa. Olketa Jehovah’s Witness laekem tumas for teachim pipol abaotem Bible, bat mifala nating forcem pipol for joinim religion bilong mifala. Mifala storyim nomoa samting wea Bible talem, and luksavve evriwan garem raet for chusim samting wea hem laek for bilivim.—1 Peter 3:15.