Skip to content

Olketa Jehovah’s Witness

Chusim languis Solomon Islands Pidgin

Hao Nao Olketa Jehovah’s Witness Ting Long Science?

Hao Nao Olketa Jehovah’s Witness Ting Long Science?

Mifala tinghae long hard waka bilong science and bilivim olketa samting wea olketa scientist faendem wea garem olketa pruv.

“Science hem for studyim olketa samting wea stap raonem iumi and tu hem savve wea iumi kasem abaotem olketa samting hia.” (Collins Cobuild Advanced Learner’s English Dictionary) Bible hem no wanfala science buk, bat hem encouragem pipol for studyim olketa samting raonem iumi, and for kasem gud samting from wanem olketa scientist faendem. Tingim samfala example:

  • Astronomy: “Luk go ap long skae and tingim, hu nao wakem olketa samting hia? God nao wakem olketa and olketa olsem wanfala army wea obeyim hem. Hem kolem olketa kam followim namba and nem bilong olketa.”​—Isaiah 40:26.

  • Biology: Solomon “savve story abaotem olketa tree, olsem cedar tree long Lebanon and hyssop wea grow long wall. Hem savve story tu abaotem olketa animal, olketa bird, olketa samting wea muv and olketa fish.”​—1 Kings 4:​33.

  • Medicine: “Pipol wea sik nao need for go lukim doctor, no olketa wea strong.”​—Luke 5:​31.

  • Meteorology: “Waswe iu go insaed olketa stoahaos bilong snow, or iu lukim olketa stoahaos bilong hail . . . ? Hao nao wind from east hem spred go aot long earth?”​—Job 38:22-​24.

Olketa pablikeson bilong mifala helpem pipol for tinghae long science. Mifala putim olketa article abaotem science and samfala samting wea olketa faendem insaed olketa buk bilong mifala. Mifala encouragem olketa pikinini for go skul mekem olketa savve long olketa samting raonem olketa. Samfala Jehovah’s Witness duim waka olsem biochemistry, mathematics, and physics tu.

Science no savve givim evri ansa.

Mifala bilivim science no savve ansarem evri kwestin bilong olketa man. * Olsem example, olketa geologist savve wanem nao insaed long earth, and olketa biologist savve hao nao body waka. Bat olketa no savve why earth barava fitim for man stap insaed, and why olketa difren part long body savve waka gud tugeta?

Long tingting bilong mifala Bible nomoa savve givim ansa for olketa kwestin hia wea mekem olketa man for satisfae. (Psalm 139:13-​16; Isaiah 45:18) Mifala bilivim hem gud for lane from science and from Bible.

Samfala taem maet hem luk olsem samting science talem hem difren from Bible. Bat samfala taem diswan hem bikos pipol no minim really samting wea Bible teachim. Olsem example, Bible no sei God wakem earth insaed long sixfala 24-hour day.​—Genesis 1:1; 2:4.

Samfala idea wea kam from science olketa no garem pruv. Samfala scientist wea staka tinghae long olketa, no followim olketa idea hia. Olsem example, staka biologist, chemist, and olketa nara scientist no bilivim olketa samting wea laef kamap seleva. Taem olketa studyim olketa samting long world datwan mekem olketa bilivim God nao designim evri samting hia. Mifala garem sem tingting olsem olketa.

^ par. 10 Wanfala scientist wea nem bilong hem Erwin Schrödinger sei science no savve teachim iumi olketa samting wea “iumi barava laek for savve long hem.” And Albert Einstein hem sei sorre samting wea olketa scientist lanem nao, olketa “no savve stretem olketa problem long laef.”