Skip to content

Skip to secondary menu

Olketa Jehovah’s Witness

Solomon Islands Pidgin

Why Nao Wei wea Olketa Jehovah’s Witness Duim Lord’s Supper Hem Difren From Olketa Nara Religion?

Why Nao Wei wea Olketa Jehovah’s Witness Duim Lord’s Supper Hem Difren From Olketa Nara Religion?

Mifala barava followim samting wea Bible talem saed long wei for celebratem Evening Kaikai Bilong Lord, wea hem nao samfala kolem ‘Lord’s supper,” or Last Supper, or Memorial bilong dae bilong Jesus. (1 Corinth 11:20; King James Version) Bat staka samting wea olketa nara religion bilivim abaotem disfala celebratem and hao olketa duim, no kam from Bible.

Why Iumi Celebratem

Reason why iumi celebratem Evening Kaikai Bilong Lord hem for rememberim Jesus and for showimaot iumi tinghae long sakrifaes wea hem duim for iumi. (Matthew 20:28; 1 Corinth 11:24) Disfala celebration hem no wanfala sacrament or service wea bae mekem God forgivim olketa sin. * Bible sei wei for garem faith long Jesus nomoa savve mekem God forgivim olketa sin bilong iumi.—Rome 3:​25; 1 John 2:​1, 2.

Haomas taem?

Jesus talem olketa disaepol bilong hem for celebratem Evening Kaikai Bilong Lord, bat hem no talem haomas taem nao olketa mas duim datwan. (Luke 22:19) Samfala sei iumi shud duim diswan evri month, bat olketa narawan sei evri week, evriday, tu-thri taem evriday, or enitaem wea man laek for duim. Bat iumi mas tingim samfala important samting abaotem diswan.

Jesus startim Evening Kaikai Bilong Lord long sem day wea olketa Jew celebratem Pasova, and hem dae long datfala day tu. (Matthew 26:​1, 2) Bat reason hem stap for diswan. Bible comparem sakrifaes bilong Jesus witim datfala pikinini sheepsheep wea olketa sakrifaesim long Pasova. (1 Corinth 5:​7, 8) Olketa celebratem Pasova wanfala taem evri year. (Exodus 12:​1-6; Leviticus 23:5) Olsem tu, olketa Christian bifor kam * celebratem Memorial bilong dae bilong Jesus wanfala taem evri year, and Olketa Jehovah’s Witness followim datfala example wea stap insaed Bible.

Date and taem

Samting Jesus duim helpem iumi for savve long haomas taem insaed year iumi shud celebratem Memorial and wanem date and taem nao for duim datwan. Hem introducem diswan bihaen sun hem go daon long Nisan 14, 33 C.E., wea hem nao date long Bible kalenda wea followim moon. (Matthew 26:18-​20, 26) Mifala gohed for celebratem Memorial long disfala date evri year, wea followim nao wanem olketa Christian duim bifor kam. *

Nomata Nisan 14, 33 C.E. hem long wanfala Friday, evri year, Nisan 14 savve kamap long difren day bilong week. For savve long wanem day nao Nisan 14 evri year, mifala no followim kalenda wea olketa Jew followim distaem * bat followim sem samting wea olketa followim long taem bilong Jesus.

Bred and wine

For disfala niu celebration Jesus iusim bred wea no garem yeast and red wine wea olketa iusim finis long Pasova long datfala naet. (Matthew 26:26-​28) So for followim example bilong hem, mifala iusim bred wea no garem yeast or eni nara samting insaed, witim red wine, no grape juice, or wine wea olketa putim sugar insaed or eni nara samting olsem.

Samfala church iusim bred wea garem yeast insaed, bat long Bible staka taem yeast piksarem sin and wei for no perfect. (Luke 12:1; 1 Corinth 5:​6-8; Galatia 5:​7-9) Dastawe bred wea no garem yeast or eni nara samting insaed nomoa hem fitim for piksarem body bilong Christ wea perfect and no garem sin. (1 Peter 2:​22) Nara samting wea no followim Bible hem for iusim grape juice wea no garem yeast insaed for changem wine. Samfala church iusim datwan bikos olketa bigman bilong church tambuim pipol for no drinkim alcohol.​—1 Timothy 5:​23.

Bred and wine, no really body and blood

Long Memorial, bred wea no garem yeast and wine piksarem nomoa body and blood bilong Christ. Long tingting bilong samfala pipol, mirakol happen wea changem bred and wine for kamap really body and blood bilong Jesus. Bat tingim samfala scripture wea pruvim datwan hem no tru.

  • Sapos Jesus komandim olketa disaepol for drinkim blood bilong hem, datwan bae brekem law bilong God for no kaikaim blood. (Genesis 9:4; Acts 15:28, 29) Hard for Jesus talem olketa narawan for brekem law bilong God abaotem blood.​—John 8:​28, 29.

  • Sapos olketa aposol really drinkim blood bilong Jesus long datfala taem, hem bae no sei hem “mas pourimaot” datwan, wea showimaot hem no duim datfala sakrifaes yet.​—Matthew 26:28.

  • Sakrifaes bilong Jesus kamap “wantaem nomoa.” (Hebrews 9:​25, 26) Bat sapos bed and wine change for kamap body and blood bilong hem long taem bilong Evening Kaikai Bilong Lord (Lord’s supper), evritaem wea olketa kaikaim bred and drinkim wine olketa duim moa datfala sakrifaes.

  • Jesus hem sei: ‘Gohed duim diswan for rememberim mi.’ Hem no sei ‘for sakrifaesem mi.’​—1 Corinth 11:24.

Olketa wea bilivim bred and wine change for kamap really body and blood bilong Jesus, tingse samfala verse insaed Bible nao sapotim datwan. Olsem example, staka Bible transleitim toktok bilong Jesus olsem: “Diswan nao blood bilong mi.” (Matthew 26:28) Bat olketa nara wei for transleitim diswan hem olsem: “Diswan hem piksarem blood bilong mi,” “Diswan hem stand for blood bilong mi,” or “Diswan minim blood bilong mi.” * Jesus hem iusim wanfala tokpiksa olsem hem duim staka taem finis.​—Matthew 13:34, 35.

Hu nao shud kaikaim bred and drinkim wine?

Taem olketa Jehovah’s Witness celebratem Evening Kaikai Bilong Lord, smol namba nomoa kaikaim bred and drinkim wine. Why nao olsem?

Blood bilong Jesus startim wanfala “niu agreement” wea changem datfala agreement midolwan Jehovah God and Israel bifor. (Hebrew 8:​10-​13) Evriwan wea insaed datfala niu agreement kaikaim bred and drinkim wine. No evri Christian nao insaed datfala agreement. Olketa insaed diswan hem “olketa wea God chusim” long wanfala spesol wei. (Hebrew 9:​15; Luke 22:20) Olketa hia bae rul long heven witim Christ, and Bible sei 144,000 pipol nomoa kasem datfala privilege.​—Luke 22:28-​30; Revelation 5:​9, 10; 14:​1, 3.

Bible kolem olketa hia wanfala “smol sekson” bat bigfala haf bilong mifala garem hope for insaed datfala “big crowd” wea bae kasem laef olowe long earth. (Luke 12:32; Revelation 7:​9, 10) Olketa wea garem hope for laef olowe long earth no kaikaim bred and drinkim wine, bat mifala evriwan join tugeta for showimaot mifala tinghae and thankiu long sakrifaes wea Jesus duim for mifala.​—1 John 2:2.

^ par. 4 McClintock and Strong’s Cyclopedia, Volume IX, page 212, hem sei: “Datfala word sacrament no stap insaed N[iu] T[estamen]; and datfala Greek word μυστήριον [my·steʹri·on] no join witim baptism or Lord’s supper, or eni nara samting olsem for mekhae long hem.”

^ par. 7 Samfala Bible transleison iusim datfala toktok “long plande taem wea (as often as)” long scripture wea storyim Evening Kaikai Bilong Lord, wea mekem pipol for tingse diswan hem abaotem haomas taem for duim datwan. Bat stretfala wei for transleitim diswan hem “evritaem wea.”​—1 Corinth 11:25, 26; New International Version; Good News Translation.

^ par. 9 Lukim The New Schaff-Herzog Encyclopedia of Religious Knowledge, Volume IV, page 43-​44, and McClintock and Strong’s Cyclopedia, Volume VIII, page 836.

^ par. 10 Lukim The New Cambridge History of the Bible, Volume 1, page 841.

^ par. 20 Kalenda bilong olketa Jew distaem depend long astronomical niu moon for savve long start bilong datfala month Nisan, bat long first century olketa no iusim datwan. Long datfala taem month hem start taem olketa lukim niu moon long Jerusalem, wea savve kamap wan or tufala day bihaen long astonomical niu moon. Diswan nao reason why date wea Olketa Jehovah’s Witness duim Memorial hem no evritaem semsem witim date wea olketa Jew distaem celebratem Pasova.

Lukim A New Translation of the Bible, by James Moffatt; The New Testament​—A Translation in the Language of the People, by Charles B. Williams; and The Original New Testament, by Hugh J. Schonfield.