Olketa Jehovah’s Witness luksavve olketa principle and law long Bible savve helpem iumi for mekem olketa disison wea bae mekem God hapi and wea bae helpem iumi. (Isaiah 48:17, 18) Olketa Jehovah’s Witness no garem olketa rul bilong olketa seleva bat mifala followim olketa principle and law wea God nao talem. Bae iumi storyim samfala principle and law wea bae helpem iumi for luksavve long tingting bilong God abaotem wei for frenim samwan. *

  • Tufala wea marit shud stap tugeta. (Matthew 19:6) Olketa Jehovah’s Witness luksavve wei for frenim samwan bae lead go for marit, so iumi mas tingting gud bifor iumi disaed for frenim samwan.

  • Olketa wea no young tumas shud frenim samwan. Olketa hia “no young tumas” long wei wea olketa winim nao taem wea feeling for laekem sex hem savve strong tumas.​—1 Corinth 7:​36.

  • Olketa wea frenim samwan shud free for marit. Samfala pipol wea divorce, olketa no free for marit moa bikos Bible storyim wanfala reason nomoa wea man or woman savve divorcem marit partner bilong hem, wea hem nao sapos marit partner duim adultery.​—Matthew 19:9.

  • Christian wea laek for marit mas chusim nomoa samwan wea garem sem biliv olsem hem. (1 Corinth 7:​39) Olketa Jehovah’s Witness luksavve disfala komand hem no minim man hia respectim biliv bilong olketa Christian nomoa, bat hem mas baptaes finis and followim wanem Bible talem. (2 Corinth 6:​14) Nomata long taem bilong Bible, God laekem olketa wea worshipim hem for maritim nomoa narawan wea olketa garem sem biliv. (Genesis 24:3; Malachi 2:​11) Samfala savveman luksavve disfala komand hem barava helpem tufala wea marit for stap gud tugeta. *

  • Olketa pikinini shud obeyim dadi and mami bilong olketa. (Proverbs 1:8; Colossae 3:​20) Disfala komand hem for olketa pikinini wea big tu wea stap yet witim dadi and mami. Olketa mas followim disison wea dadi and mami mekem saed long wei for frenim samwan. Tufala savve disaedem wanem age nao boy or gele bilong tufala mas kasem bifor hem savve frenim samwan and wanem nao boy or gele bilong tufala savve duim long datfala taem.

  • Olketa Witness savve disaedem seleva sapos olketa laek frenim narawan and hu nao for frenim, bat olketa mas followim olketa Bible principle saed long diswan. Datwan followim datfala principle wea sei: “Samting wea man seleva mas duim, hem no waka bilong narawan bat hem waka bilong hemseleva nao.” (Galatia 6:5) Nomata olsem, staka wea laek for frenim narawan hapi for kasem advaes from olketa mature Christian wea savve helpem olketa for mekem olketa gud disison.​—Proverbs 1:5.

  • Staka samting wea pipol long world duim taem olketa frenim samwan hem no stret. Olsem example, Bible talem iumi for stap klia long wei for durong. Durong hem minim tufala wea no marit duim sex, and tu, hem savve minim wei for tufala wea no marit holehole long private part bilong narawan or duim sex witim mouth or long ass. (1 Corinth 6:​9-​11) Nomata tufala no duim olketa samting hia, bat tufala tasim body bilong narawan for mekem tufala laek duim sex, long tingting bilong God, datwan hem “no klin.” (Galatia 5:​19-​21) Olketa “rabis toktok” abaotem sex tu hem samting wea God barava no laekem.​Colossae 3:8.

  • Heart bilong man savve laea long hem. (Jeremiah 17:9) Heart savve leadim man for duim olketa samting wea hem savve finis hem no stret for duim. Samting wea bae helpem boy and gele wea fren for no duim eni samting wea no stret, hem for tufala no stap seleva. Maet hem fitim for tufala mas evritaem witim olketa narawan. (Proverbs 28:26) Olketa singol Christian wea laek for marit mas keakea long wei for faendem marit partner long internet, especially wei for frenim samwan wea iumi nating savve long hem.​—Psalm 26:4.

^ par. 2 Long samfala ples hem no culture bilong olketa for boy and gele fren firstaem bifor tufala marit. Bible no talem boy and gele mas fren firstaem bifor tufala marit.

^ par. 6 Olsem example, wanfala article long disfala magasin Marriage & Family Review sei “bihaen olketa studyim staka pipol wea marit olketa luksavve taem tufala wea marit garem sem religion datwan barava helpem tufala for stap gud tugeta for longfala taem.”​—Volume 38, issue 1, page 88 (2005).