Nomoa. Staka million pipol studyim Bible witim mifala bat no kamap Jehovah’s Witness. * Main goal bilong Bible study hem for helpem pipol for savve long wanem Bible teachim. And bihaen datwan olketa seleva savve disaed sapos olketa laek for kamap Witness or nomoa. Mifala luksavve man seleva nao bae disaedem religion wea hem laek for followim.​—Joshua 24:15.

Waswe, mi savve iusim Bible transleison bilong miseleva long taem bilong study?

Ia, iu savve duim olsem. Mifala laek for iusim New World Translation of the Holy Scriptures and Niu World Bible wea stap long Pidgin languis and mifala savve givim iu wanfala free copy sapos iu laekem. Bat hem olraet tu sapos iu laek for iusim Bible bilong iuseleva. Iu savve iusim eni Bible for lane abaotem wei for sev and hope wea God givim iumi.

Why nao iufala studyim Bible witim pipol wea no joinim religion bilong iufala?

  • Mifala study witim pipol bikos mifala lovem Jehovah God, wea laekem olketa Christian for teachim olketa narawan abaotem wanem olketa lanem long Bible. (Matthew 22:37, 38; 28:19, 20) Mifala luksavve hem nambawan privilege for “waka tugeta witim God” for helpem pipol lanem Bible.​—1 Corinth 3:​6-9.

  • And tu, mifala study witim pipol bikos mifala lovem olketa. (Matthew 22:39) Mifala hapi taem mifala teachim pipol abaotem olketa gud samting wea mifala lanem long Bible.​—Acts 20:3

^ par. 2 Olsem example, long 2017 Olketa Jehovah’s Witness conductim 10,071,524 Bible study evri month, and samfala taem tu-thri pipol joinim wanfala Bible study long semtaem. Nomata olsem, 284,212 pipol nomoa baptaes for kamap Olketa Jehovah’s Witness long datfala year.