Skip to content

Skip to secondary menu

Olketa Jehovah’s Witness

Solomon Islands Pidgin

Why Nao Olketa Jehovah’s Witness No Acceptim Blood Transfusion?

Why Nao Olketa Jehovah’s Witness No Acceptim Blood Transfusion?

Samfala rong idea wea pipol garem

Rong idea: Olketa Jehovah’s Witness no lukaotem eni medical treatment bikos olketa tingse olketa doctor no savve helpem olketa.

Tru samting: Mifala laekem best medical treatment for mifala seleva and famili bilong mifala. Taem mifala sik, mifala go long olketa doctor wea savve hao for provaedem medical treatment or duim operation wea no iusim blood. Mifala tinghae long olketa niu samting wea olketa doctor savve duim distaem. Staka pipol long community kasem gud samting distaem from olketa medical treatment wea no iusim blood wea olketa doctor lanem for helpem olketa Witness patient. Long staka kantri distaem, eniwan savve chusim treatment wea no iusim blood transfusion, mekem olketa savve misstim olketa sik and problem wea join witim blood transfusion.

Rong idea: Olketa Jehovah’s Witness bilivim sapos man garem faith datwan bae healim eni sik wea hem garem.

Tru samting: Mifala no duim faith healing.

Rong idea: Olketa medical treatment wea no iusim blood hem expensive tumas.

Tru samting: Kost bilong olketa medical treatment wea no iusim blood hem no hae taem iu comparem witim medical treatment wea iusim blood. *

Rong idea: Evri year staka Witness, and olketa pikinini tu, dae bikos olketa no acceptim blood transfusion.

Tru samting: Datwan hem barava no tru. Olketa doctor duim staka operation wea no isi olsem heart operation, operation long bon, and operation for changem samfala important samting olsem kidney and lung. Olketa no duim blood transfusion taem olketa duim olketa operation hia. * Staka taem olketa patient and pikinini wea no kasem blood transfusion savve kwiktaem for gud bak bihaen long operation winim olketa wea acceptim blood transfusion. * No eniwan fit for sei patient bae dae bikos hem no acceptim blood transfusion, or hem bae laef sapos hem acceptim.

Why nao Olketa Jehovah’s Witness no acceptim blood transfusion?

Olketa Jehovah’s Witness no acceptim blood transfusion bikos long wanem Bible hem talem. Old Testament and Niu Testament sei iumi mas stap klia from blood. (Genesis 9:4; Leviticus 17:10; Deuteronomy 12:23; Acts 15:28, 29) Nara samting tu, God sei blood hem piksarem laef. (Leviticus 17:14) So mifala no acceptim blood transfusion bikos mifala laek obeyim God and showimaot respect long hem from hem givim laef.

Tingting bilong olketa doctor hem change

Olketa doctor no need for duim blood transfusion taem olketa duim olketa operation wea no isi

Long bifor, staka doctor tingse hem krangge samting for duim medical treatment wea no iusim blood, and samfala tingse sapos man no acceptim treatment wea iusim blood hem olsem hem laek suisaed. Bat distaem tingting bilong plande doctor hem change. Olsem example, long 2004, wanfala article long wanfala magasin for lanem olketa doctor hem sei: “staka teknik wea iumi iusim for olketa Jehovah’s Witness patient distaem, iumi bae iusim for evriwan long future.” * Long 2010, wanfala article long datfala magasin Heart, Lung and Circulation hem sei ‘olketa operation wea no iusim blood hem shud no just for Olketa Jehovah’s Witness nomoa, bat hem shud for evriwan.’

Staka thousand doctor raonem world distaem duim olketa operation wea no isi and olketa no duim blood transfusion taem olketa duim operation hia. Olketa doctor hia iusim olketa teknik wea savve mekem patient no lusim tumas blood taem olketa duim operation. Staka pipol wea no Jehovah’s Witness laekem kaen medical treatment olsem wea no iusim blood transfusion, and olketa doctor savve duim diswan long olketa poor kantri tu.

^ par. 8 Lukim Transfusion and Apheresis Science, Volume 33, No. 3, p. 349.

^ par. 10 Lukim The Journal of Thoracic and Cardiovascular Surgery, Volume 134, No. 2, page 287-288; Texas Heart Institute Journal, Volume 38, No. 5, page 563; Basics of Blood Management, page 2; and Continuing Education in Anaesthesia, Critical Care & Pain, Volume 4, No. 2, page 39.

^ par. 10 Lukim The Journal of Thoracic and Cardiovascular Surgery, Volume 89, No. 6, page 918; and Heart, Lung and Circulation, Volume 19, page 658.

^ par. 14 Continuing Education in Anaesthesia, Critical Care & Pain, Volume 4, No. 2, page 39.