Skip to content

Skip to secondary menu

Olketa Jehovah’s Witness

Solomon Islands Pidgin

Wanem Nao Tingting Bilong Olketa Jehovah’s Witness Abaotem Olketa Funeral and Hao Nao Olketa Duim Funeral?

Wanem Nao Tingting Bilong Olketa Jehovah’s Witness Abaotem Olketa Funeral and Hao Nao Olketa Duim Funeral?

Mifala followim nomoa samting wea Bible teachim, wea insaed diswan hem olketa point hia:

  • Hem normal nomoa for sorre taem samwan iumi lovem hem dae. Olketa disaepol bilong Jesus sorre taem olketa wea olketa lovem olketa dae. (John 11:33-​35, 38; Acts 8:2; 9:​39) So mifala no ting long wanfala dae olsem chance for garem party nomoa. (Ecclesiastes 3:​1, 4; 7:​1-4) Mifala ting long dae olsem taem for comfortim narawan.​—Rome 12:15.

  • Olketa wea dae finis no savve long eni samting. Nomata long wanem nao kantri or culture bilong mifala, mifala no duim wanem nara pipol duim wea bilivim man wea dae hem still gohed for laef and savve duim samting long olketa wea laef yet. (Ecclesiastes 9:​5, 6, 10) So mifala no duim kaen samting olsem, expensive celebration and anniversary, sakrifaes for man wea dae, or story witim man wea dae finis and askem samting long hem. Mifala stap klia long olketa kaen samting olsem mekem mifala savve obeyim komand long Bible wea sei: “Iufala mas go aot from olketa . . . No tasim samting wea no klin.”​—2 Corinth 6:​17.

  • Hope hem stap for olketa wea dae finis. Bible hem sei pipol bae laef bak and gogo no eniwan bae dae moa. (Acts 24:15; Revelation 21:4) Disfala hope helpem mifala and olketa first Christian for stap klia long kaen dae wea ova tumas.​—1 Thessalonica 4:​13.

  • Bible tok againstim wei for ova tumas and show-off. (Proverbs 11:2) Long tingting bilong mifala, pipol shud no iusim wanfala dae olsem chance for “show-off” saed long position bilong olketa or samting olketa garem. (1 John 2:​16) Mifala no arrangem kaen funeral wea olsem hapitaem for olketa wea kam or wea famili peim coffin wea expensive tumas and pipol werem barava stael kaleko for show-off long olketa narawan.

  • Mifala no trae forcem narawan for followim tingting bilong mifala abaotem olketa dae. Mifala followim disfala toktok long Bible wea sei: “Iumi evriwan bae ansa long God for samting wea iumi duim and talem.” (Rome 14:12) Bat sapos chance hem kamap, mifala trae for explainim biliv bilong mifala long wei for “hambol and showimaot bigfala respect.”​—1 Peter 3:​15.

Hao Nao Olketa Jehovah’s Witness duim olketa funeral?

Funeral long wea?: Sapos famili disaed for garem wanfala funeral, olketa savve duim long eni ples wea olketa chusim, olsem long Kingdom Hall, haos, or long beregraon.

Service: Olketa givim wanfala tok for comfortim olketa wea kam. Datfala tok hem explainim samting Bible talem abaotem dae and hope wea man garem for laef bak. (John 11:25; Rome 5:​12; 2 Peter 3:​13) Maet olketa storyim olketa gudfala wei and faith bilong datfala man wea dae and hao datwan hem gudfala example wea encouragem olketa narawan.—2 Samuel 1:​17-​27.

Olketa savve singim wanfala song wea abaotem hope long Bible for olketa wea dae. (Colossae 3:​16) Olketa talem wanfala prea long end for comfortim evriwan.​—Philippi 4:​6, 7.

Fee or Kolekson: Mifala no ask selen for eni service olsem funeral, and mifala no duim kolekson long olketa meeting bilong mifala tu.​—Matthew 10:8.

Attendance: Olketa wea no Jehovah’s Witness welkam for attendim funeral long Kingdom Hall. Eniwan nomoa savve kam long funeral or evri nara meeting bilong mifala.

Waswe, Olketa Jehovah’s Witness attendim olketa funeral long olketa nara church?

Each Witness mas disaed seleva. Hem bae disaed followim konsens bilong hem wea hem trainim followim Bible. (1 Timothy 1:​19) Nomata olsem, mifala no share insaed olketa service wea no followim samting wea Bible talem.​—2 Corinth 6:​14-​17.