Skip to content

Skip to secondary menu

Olketa Jehovah’s Witness

Solomon Islands Pidgin

Waswe, Olketa Jehovah’s Witness Divaedem Olketa Famili or Strongim Olketa?

Waswe, Olketa Jehovah’s Witness Divaedem Olketa Famili or Strongim Olketa?

Mifala Olketa Jehovah’s Witness traem best for strongim olketa famili bilong mifala and bilong nara pipol tu. Mifala respectim God wea hem nao startim famili arrangement. (Genesis 2:21-24; Ephesus 3:14, 15) Long Bible, hem talem olketa samting wea helpem pipol evriwea long world for strongim marit bilong olketa and for hapi.

Hao Olketa Jehovah’s Witness Helpem Famili for Strong

Mifala traem best for followim wanem Bible talem, bikos datwan helpem mifala for kamap gudfala hasband, waef, mami, and dadi. (Proverbs 31:10-31; Ephesus 5:22–6:4; 1 Timothy 5:8) Wisdom long Bible helpem evri famili, nomata sapos no evriwan insaed Bible garem sem biliv. (1 Peter 3:1, 2) Tingim toktok bilong samfala man and woman wea marit partner bilong olketa kamap wanfala Jehovah’s Witness:

  • “Bihaen mitufala marit, mitufala savve evritaem raoa and feel nogud. Then bihaen long mek-six year, waef bilong mi, Ivete, kamap wanfala Jehovah’s Witness and hem barava change. Hem savve patient tumas and kaen. Wei wea hem change olsem barava sevem marit bilong mitufala.”—Clauir, from Brazil.

  • “Mi barava feel nogud taem hasband bilong mi, Chansa, start for studyim Bible witim Olketa Jehovah’s Witness, bikos mi tingse olketa Jehovah’s witness savve divaedem famili. Gogo mi start for luksavve hao Bible hem helpem marit bilong mitufala.”—Agness, from Zambia.

Long ministry bilong mifala, mifala showim pipol hao wisdom insaed Bible savve helpem olketa for

  • Chusim gudfala marit partner

  • Hapi insaed firstfala year bilong marit

  • Deal witim olketa in-law

  • Iusim selen long gudfala wei

  • No raoa

  • Forgivim narawan

  • Trainim olketa pikinini

Waswe, marit bae garem problem taem hasband or waef change for kamap Jehovah’s Witness?

For tok stret, samfala taem hem olsem. Olsem example, wanfala report long 1998 from datfala research company Sofres storyim hao 1 long evri 20 marit wea hasband or waef hem Jehovah’s Witness, garem bigfala problem taem datfala hasband or waef kamap Witness.

Jesus hem sei, samfala wea followim olketa teaching bilong hem bae garem problem long famili bilong olketa. (Matthew 10:32-36) Wanfala man for raetem history wea nem bilong hem Will Durant, talem hao long rul bilong Rome bifor, “pipol sei olketa Christian mekem olketa famili for divaed,” * and pipol long distaem tu talem sem samting abaotem samfala Jehovah’s Witness. Bat waswe, datwan minim olketa Witness nao kosim problem?

European Court of Human Rights

European Court of Human Rights sei staka taem hem olketa nara famili member nao wea nating willing for letem datfala Witness followim olketa biliv wea hem garem raet for followim. Datfala Kot hem sei moa: “Kaen problem olsem no affectim olketa Witness nomoa, bat hem affectim staka nara famili tu wea no evriwan insaed famili garem sem biliv.” * Nomata long taem wea olketa famili member againstim narawan long famili wea Jehovah’s Witness, olketa Witness traem best for followim toktok long Bible wea sei: “Sapos eniwan duim nogud samting long iufala, iufala no changem bak. . . . Traem best bilong iufala for stap gud witim olketa narawan.”Rome 12:17, 18.

Why Olketa Jehovah’s Witness no laek maritim samwan long nara religion

Olketa Witness followim instruction long Bible for maritim nomoa samwan wea hem disaepol bilong Christ,” wea minim for maritim samwan wea garem sem biliv. (1 Corinth 7:39) Disfala komand kam from Bible, and hem fitim. Olsem example, wanfala article long Journal of Marriage and Family long 2010 sei: “staka taem olketa wea marit partner bilong olketa hem sem religion, and garem sem biliv, olketa hapi winim olketa narawan wea marit. *

Nomata olsem, Olketa Jehovah’s Witness no encouragem olketa member bilong olketa for separate from marit partner wea garem difren biliv. Bible hem sei: “Sapos waef bilong wanfala brata hem no biliv bat hem hapi for stap witim hem, datfala brata mas no lusim hem. Sapos hasband bilong wanfala woman hem no biliv bat hem hapi for stap witim hem, datfala woman mas no lusim hasband bilong hem.” (1 Corinth 7:12, 13) Olketa Jehovah’s Witness obeyim disfala komand.

^ par. 17 Lukim Caesar and Christ, page 647.

^ par. 18 Lukim disison bilong kot long case bilong Olketa Jehovah’s Witness long Moscow and Olketa Narawan v. Russia, page 26-27, paragraf 111.

^ par. 20 Lukim Journal of Marriage and Family, Volume 72, Namba 4, (August 2010), page 963.