Nomoa. Olketa Jehovah’s Witness biliv God wakem evri samting. Bat mifala no biliv long creationism bikos staka samting wea olketa creationist bilivim hem difren from wanem Bible talem. Tingim tufala example hia:

  1. Sixfala day wea God wakem olketa samting. Samfala wea biliv long creationism sei sixfala day wea God wakem olketa samting hem sixfala 24 hour day nomoa. Bat long samfala scripture insaed Bible, datfala word “day” savve minim staka year.Genesis 2:4; Psalm 90:4.

  2. Haomas year nao earth hem stap? Samfala wea biliv long creationism sei earth hem stap for tu-thri thousand year nomoa. Bat Bible sei earth hem stap bifor long sixfala day wea God wakem olketa samting. (Genesis 1:1) Dastawe olketa Jehovah’s Witness acceptim research bilong olketa savveman wea sei hem luk olsem earth stap for plande billion year finis.

Olketa Jehovah’s Witness biliv God wakem hem evri samting bat datwan no minim olketa ting smol long science. Long tingting bilong mifala, science wea tru and wea olketa pruvim, hem agree witim wanem Bible hem talem.