Nomoa, mifala no duim datwan. Long Wastaoa magasin, wea hem nao main magasin bilong mifala, hem sei hem no stret for forcem pipol for changem biliv bilong olketa * Mifala no duim datwan bikos:

  • Jesus no forcem pipol for acceptim olketa teaching bilong hem. Hem savve no staka pipol bae acceptim message bilong hem. (Matthew 7:​13, 14) Wanfala taem, samfala disaepol bilong hem feel nogud long samting wea hem talem. Hem letem olketa for go. Hem no trae for stopem olketa.​—John 6:​60-​62, 66-​68.

  • Jesus teachim olketa follower bilong hem for no forcem nara pipol for changem biliv bilong olketa. Winim wei for trae forcem pipol for acceptim gud nius abaotem Kingdom, hem talem olketa disaepol for lukaotem pipol wea tinghae long datwan and wea willing for lisin.​—Matthew 10:​7, 11-​14.

  • Hem iusles nomoa for putim hevi long samwan for worshipim God bikos God hem acceptim nomoa worship wea kam from heart bilong man.​—Deuteronomy 6:​4, 5; Matthew 22:37, 38.

Waswe, mifala trae changem biliv bilong pipol?

Mifala preachim message from Bible evriwea long world, and mifala duim datwan long wei for preach long “pablik and long haos tu haos.” (Acts 1:8; 10:42; 20:20) Samfala accusim mifala long sem samting wea olketa accusim long olketa Christian long taem bilong olketa aposol. Olketa sei mifala brekem law taem mifala duim preaching waka. (Acts 18:12, 13) Bat samting olketa accusim long mifala hem no stret. Mifala no forcem pipol for garem sem biliv olsem mifala. Bat mifala luksavve, pipol mas garem chance for kasem moa information mekem olketa savve disaed followim wanem olketa lanem.

Mifala no forcem pipol for changem biliv bilong olketa. Mifala no join insaed politik, and mifala no olsem samfala religion wea iusim religion for haedem wei wea olketa insaed politik, wea datwan hem no mekhae long God. *

Waswe, man garem raet for changem biliv bilong hem?

Profet Abraham lusim religion bilong olketa relative bilong hem

Yes, Bible showimaot pipol garem raet for changem biliv and religion bilong olketa. Hem storyim staka wea chus for no gohed followim biliv bilong olketa relative bilong olketa, mekem olketa savve worshipim tru God. Samfala wea duim olsem hem Abraham, Ruth, samfala pipol long Athens, and aposol Paul. (Joshua 24:2; Ruth 1:​14-​16; Acts 17:22, 30-​34; Galatia 1:​14, 23) Bible showimaot tu man hem garem raet for lusim worship wea God laekem nomata datwan hem krangge samting for duim.​—1 John 2:​19.

Datfala Universal Declaration of Human Rights sapotim raet bilong pipol for changem biliv bilong olketa. United Nations sei datfala Universal Declaration of Human Rights hem “faondeson bilong law wea defendim human raets evriwea long world.” Datfala pepa sei evriwan garem “freedom for changem religion or biliv bilong hem” and “for lukaotem, kasem, or givimaot information and olketa idea,” wea insaed diswan hem olketa idea wea join witim religion tu. * So from iumi garem raet for disaedem biliv bilong iumiseleva, iumi mas respectim tu raet bilong narawan for keepim biliv bilong hem and for no acceptim eni teaching wea hem no agree long hem.

Waswe, man wea changem biliv bilong hem showimaot hem no respectim famili bilong hem?

Nomoa. Bible encouragem iumi for respectim evriwan, nomata olketa garem difren biliv. (1 Peter 2:​17) And tu, Olketa Jehovah’s Witness obeyim komand long Bible for respectim parents bilong olketa, nomata parents garem difren biliv.​—Ephesus 6:​2, 3.

Nomata olsem, no evriwan agree witim samting Bible talem. Wanfala woman wea growap long Zambia hem sei: “Long tingting bilong pipol long community bilong mifala, man wea changem biliv bilong hem no faithful long famili and community bilong hem.” Hem nao hao pipol ting long disfala woman taem hem start for studyim Bible witim olketa Jehovah’s Witness and no longtaem bihaen disaed for changem biliv bilong hem. Hem sei: “Evritaem parents bilong mi sei olketa barava no hapi long samting wea mi duim. Datwan mekem mi feel sorre, bikos mi laekem tumas for mami and dadi hapi long mi. . . . Mi laek for faithful long Jehovah, no long wanfala church. Bat datwan no minim mi no faithful long famili bilong mi.” *

^ par. 2 Lukim Wastaoa bilong January 1, 2002, page 12, paragraf 15.

^ par. 8 Olsem example, Long samting olsem 785 C.E., Charlemagne mekem wanfala law for eniwan wea no willing for kamap Christian and baptaes mas dae. And tu, olketa sekson wea faet againstim each other long Rome bifor saenem datfala Peace of Augsburg agreement long 1555 C.E. Datfala agreement hem sei evri ruler bilong olketa province mas Roman Catholic or Lutheran and evriwan long province wea hem rulim mas followim religion bilong hem. Olketa wea no willing for duim datwan mas go stap long nara kantri.

^ par. 11 Olketa nara toktok wea sapotim olketa raet olsem hem datfala African Charter on Human and Peoples’ Rights, American Declaration of the Rights and Duties of Man, 2004 Arab Charter on Human Rights, ASEAN (Association of Southeast Asian Nations) Human Rights Declaration, European Convention on Human Rights, and International Covenant on Civil and Political Rights. Nomata olsem, staka kantri wea sei olketa sapotim olketa raet hia, no barava strong for duim datwan.

^ par. 14 Jehovah hem nem bilong God olsem Bible talem.