Skip to content

Skip to secondary menu

Olketa Jehovah’s Witness

Solomon Islands Pidgin

Why Nao Olketa Jehovah’s Witness No Celebratem Birthday?

Why Nao Olketa Jehovah’s Witness No Celebratem Birthday?

Olketa Jehovah’s Witness no celebratem olketa birthday bikos long biliv bilong mifala, God no hapi long olketa celebration olsem. Hem tru, Bible no talem eni toktok wea sei no celebratem birthday, bat hem helpem iumi for savve long tingting bilong God abaotem datwan. Tingim fofala reason and samting wea Bible talem abaotem datwan.

  1. Olketa birthday celebration kam from worship bilong olketa heathen bifor. Datfala Funk & Wagnalls Standard Dictionary of Folklore, Mythology, and Legend, storyim diswan. Hem sei, long tingting bilong pipol bifor, olketa devildevil savve attakim man long birthday bilong hem, bat sapos olketa fren bilong hem hipap witim hem and talem olketa wish for hem stap gud, datwan bae help for protectim datfala man. Datfala buk The Lore of Birthdays talem hao long bifor kam, man mas savve long birthday bilong hem for savve long wanem star nao bilong hem (horoscope) wea diswan hem join witim astrology. Disfala buk hem storyim tu hao long biliv bilong pipol bifor, olketa birthday kandol garem magic paoa wea man needim taem hem talem wanfala wish.”

    Bat Bible hem barava againstim wei for iusim magic, or eni samting wea join witim devildevil and kastom.” (Deuteronomy 18:14; Galatia 5:19-21) Hem nao wanfala reason why God judgem olketa long Babylon bifor, bikos olketa savve duim astrology, wea hem nao wei for iusim kastom for savve long wanem bae happen long future. (Isaiah 47:11-15) Olketa Jehovah’s Witness no ova tumas for trae savve long full history bilong evri samting wea pipol celebratem distaem. Nomata olsem, taem Bible hem showimaot klia samting hem no stret, mifala no duim datwan.

  2. Olketa firstfala Christian no celebratem birthday. The World Book Encyclopedia storyim olketa Christian long bifor kam and hem sei “long tingting bilong olketa, wei for celebratem birthday hem wanfala heathen kastom nomoa.” Bible showimaot hao olketa aposol and olketa narawan wea Jesus teachim, olketa nao showimaot example wea evri Christian mas followim.2 Thessalonica 3:6.

  3. Olketa Christian kasem komand for mekhae nomoa long dae bilong Jesus, no day wea hem born. (Luke 22:17-20) Iumi no sapraes long diswan, bikos Bible hem sei, “day wea man dae hem winim day wea hem born.” (Ecclesiastes 7:1) Long end long laef bilong Jesus, God barava tinghae long hem bikos long wei wea hem faithful, wea mekem day wea hem dae hem gud winim day wea hem born.Hebrew 1:4.

  4. No eniwea insaed Bible hem storyim birthday celebration bilong man wea worshipim God. Bible storyim nomoa birthday bilong tufala man wea no worshipim God. Bat long tufala birthday hia, barava nogud samting hem happen.Genesis 40:20-22; Mark 6:21-29.

Waswe, olketa pikinini bilong Olketa Jehovah’s Witness tingse olketa misstim gud samting from olketa no celebratem birthday?

Olsem olketa nara parents wea lovem pikinini bilong olketa, Olketa Jehovah’s Witness olowe duim olketa samting wea showimaot olketa lovem pikinini bilong olketa, wea insaed diswan hem for givim olketa present, and enjoyim wei for hipap tugeta witim olketa narawan for hapitaem. Olketa trae for followim perfect example bilong God, wea givim olketa gudfala samting long iumi long enitaem hem laek duim datwan. (Matthew 7:11) Olketa koment long daon showimaot olketa pikinini bilong Olketa Jehovah’s Witness no misstim gudfala samting:

  • “For kasem wanfala present long taem wea iu no savve iu bae kasem datwan, hem naes tumas.”—Tammy, age 12.

  • “Hem tru, parents bilong mi no givim mi olketa birthday present, bat plande taem olketa savve givim mi present long taem wea mi no savve olketa bae duim datwan. Datwan hem naesfala wei for kasem present.”—Gregory, age 11.

  • “Olketa party wea mifala savve garem hem barava winim nao eni birthday party!”—Eric, age 6.