Skip to content

Skip to secondary menu

Olketa Jehovah’s Witness

Solomon Islands Pidgin

Wanfala Brochure wea Olketa Wakem Long Staka Languis wea Iusim Olketa Piksa for Teach

Wanfala Brochure wea Olketa Wakem Long Staka Languis wea Iusim Olketa Piksa for Teach

Odval hem from Mongolia. Hem no savve long barava age bilong hem, bat hem tingse hem born long samting olsem 1921. Taem hem smol gele hem savve lukaftarem olketa animal bilong parents bilong hem, and hem skul for wanfala year nomoa. Hem no savve read. Nomata olsem, no longtaem go nomoa hem lukim wanfala brochure wea garem olketa naes piksa wea kalakala. Brochure hia helpem hem for savve moa abaotem God and for savve abaotem nambawan future for olketa wea obeyim hem. Information hia hem kasem heart bilong hem.

Olketa Jehovah’s Witness nao wakem datfala brochure long 2011 witim nara brochure wea garem olketa sem piksa bat wea garem moa raeting insaed.

Wan wea garem moa raeting hem garem title, Followim Toktok Bilong God Mekem Iu Laef Olowe. Olketa transleitim long klosap 583 languis finis. Narawan hem garem title, Followim Toktok Bilong God, and hem stap long 483 languis. Iumi savve comparem namba hia witim United Nations Universal Declaration of Human Rights wea olketa transleitim long 413 languis nomoa. And tu, namba bilong olketa brochure hia wea olketa printim finis hem 80 million.

Long Brazil, wanfala olo woman tekem wanfala Followim Toktok Bilong God brochure and hem sei: “Mi hapi for savve pipol stap wea tingim olketa man olsem mi. No enitaem mi tekem olketa magasin bilong iufala bikos mi no savve read. Bat mi laekem tumas for garem disfala brochure.”

Brigitte, wea hem stap long France, hem woman wea no savve read. Hem sei: “Evriday mi lukluk long olketa piksa insaed disfala brochure.”

Wanfala Witness long South Africa hem sei: “Brochure hia hem best samting for explainim truth insaed Bible long olketa Chinese pipol wea stap long hia. Mi iusim diswan for teachim nomata olketa university student wea olketa savve tumas, and pipol wea no savve read tu. Mi savve iusim datfala Followim Toktok Bilong God Mekem Iu Laef Olowe brochure for kwiktaem teachim truth long pipol. Insaed haf hour nomoa mi savve teachim samfala main samting long olketa.”

Tufala Witness long Germany study witim wanfala hasband and waef wea skul gud. Hasband hem barava tinghae long brochure and hem sei: “Hao nao iu weit longtaem bifor iu givim mi brochure hia? Hem mekem hem isi for mi minim olketa scripture and olketa samting wea happen insaed Bible.”

Wanfala woman long Australia wea earpas hem sei: “For staka year mi stap long convent witim olketa nun. Mi savve gud long olketa leader bilong church bilong mifala. Bat no eniwan long olketa explainim Kingdom bilong God long mi. Olketa piksa long disfala brochure helpem mi for savve long really mining bilong Matthew 6:10.”

Olketa long branch office bilong Olketa Jehovah’s Witness long Canada sei: “Staka pipol from Sierra Leone stap long Canada. Bihaen olketa hia readim Followim Toktok Bilong God brochure long languis bilong olketa, staka sei Olketa Jehovah’s Witness barava waka hard for sharem message insaed Bible witim pipol. Samfala sei, ‘Iufala savve tingim pipol, bat staka nara church no tingim pipol.’ ”