Skip to content

Wanfala Spesol Waka wea Sevem Laef Bilong Pipol

Wanfala Spesol Waka wea Sevem Laef Bilong Pipol

Long Tabasco, wanfala State long Mexico, staka pipol nao suisaed. So long 2017, Olketa Jehovah’s Witness organizem wanfala spesol waka for givimaot moa datfala Awake! magasin bilong April 2014 wea garem title “Why Go On?​—Three Reasons to Keep Living.” Disfala waka hem gohed for tufala month and pipol barava tinghae long hem.

Help Long Barava Taem

Wanfala Jehovah’s Witness wea nem bilong hem Faustino, story witim wanfala woman wea wari abaotem son bilong hem. Son bilong hem 22 year. Man hia savve feel sorre tumas and hem trae for suisaed tu. Datfala mami no savve hao for helpem boy bilong hem. Bat taem Faustino showim Awake! magasin long hem, hem sei, “Diswan nao samting wea boy bilong mi needim tumas.” Long next day, Faustino visitim son bilong datfala woman and tufala storyim advaes insaed disfala Awake! magasin. Bihaen long tu-thri taem wea Faustino visitim datfala boy, tingting bilong hem barava change. Faustino hem sei, “Distaem hem no wari tumas, and hem hapi.” Datfala boy storyim samting wea hem lanem tu witim brata bilong hem wea savve feel sorre tumas olsem hem.

Karla wea stap long Huimanguillo, wanfala taon long Tobasco. Hem iusim datfala magasin for helpem wanfala skulfren. Karla hem sei: “Mi lukim wanfala gele long class bilong mi, wea hem 14 year, hem savve luk sorre. Mi story witim hem, and hem talem mi abaotem samting wea gohed long famili bilong hem. Mi lukim hem garem samfala scar long left hand bilong hem.” Datfala gele savve katem skin long hand and long leg. Long tingting bilong hem, hem no luk naes, and hem no garem eni reason for gohed laef. Karla showim hem datfala Awake! magasin. Bihaen datfala gele readim magasin, hem story long Karla and sei hem olsem man wea raetem datwan tingim hem taem hem raetem. Hem smile big and sei hem laek for gohed laef moa.

Long narafala taon, Villahermosa, wanfala man hem warim staka samting. Hem finis from waka, waef bilong hem lusim hem, and hem nao mas gohed lukaftarem olketa pikinini bilong tufala. Hem prea long God for help, bat hem gohed wari and hem tingse hem no wei nao. Datwan mekem hem ting for suisaed. Semtaem nomoa tufala Witness, Martín and Miguel noknok long door bilong hem. Tufala givim datfala Awake! magasin long hem. Taem hem lukim title bilong Awake!, hem tingse God ansarem prea bilong hem. Martín and Miguel storyim samfala samting from Bible for comfortim hem. Thrifala day bihaen, tufala go bak for visitim hem moa and tufala lukim datfala man hem no wari and hem luk hapi. Distaem, tufala studyim Bible witim hem tufala taem evri week.

Olketa Prisoner Herem Gud Nius

Olketa Witness visitim samfala prison long Tabasco and iusim Bible for helpem olketa prisoner for tinghae long laef. Olketa Witness redyim wanfala presentation wea garem wanfala Bible tok, olketa video, and iusim Awake! for storyim olketa reason why man shud laek gohed laef. Olketa prisoner and olketa wea waka long prison tinghae long diswan. Olsem example, wanfala prisoner hem sei: “Thrifala taem nao mi trae for suisaed. Samfala man talem mi God hem tingim mi, bat olketa no iusim Bible for pruvim datwan. Samting wea iu talem mi hem barava encouragem mi.”

Staka nara pipol tinghae long datfala spesol waka tu. Wanfala bigman long gavman wea waka long Health Department talem thankiu long olketa Witness for waka wea olketa duim for helpem community. Wanfala niuspepa raetem article abaotem datwan, wea title bilong hem, “Olketa Witness Helpem Pipol wea Laek Suisaed.”