Long 2014, Hugo wea ten year, kasem prize from wanfala charity long Britain from hem helpem olketa nara young wan long skul bilong hem for deal witim olketa bully.

Hugo sei: “DatfaIa whiteboard video Beat a Bully Without Using Your Fists nao helpem mi. Mi fit for helpem olketa narawan for deal witim datfala problem bikos long wanem mi lanem long datfala video wea stap long jw.org.”

“Wei for bullyim olketa pikinini happen long world evri day . . . , bat . . . wei hem stap for deal witim.” (Wanfala toktok from Beat a Bully Without Using Your Fists)

Firstaem Hugo showim datfala video long olketa teacher bilong hem. Olketa teacher laekem datfala video so olketa arrange for evriwan long skul savve lukim datfala jw.org website. Staka wea age bilong olketa 8 go kasem 10 iusim datfala website olowe nao. Olketa sei hem no helpem olketa for deal witim olketa bully nomoa, bat olketa faendim ansa tu for olketa kwestin wea olketa garem, olsem example, Hao nao mi savve garem olketa gudfala fren?

Gudfala Plan for Helpem Olketa Young Wan

Long nara British skul, Elijah wea 8 year olketa narawan savve bullyim hem. So hem and famili bilong hem lukluk moa long datfala video Beat a Bully. Olketa story raonem wanem nao hem savve talem and duim taem olketa nara young wan bullyim hem. Diswan helpem hem for no fraet for deal witim disfala problem. Long wanfala week wea datfala skul duim spesol waka for deal witim wei for bully, wanfala teacher long skul bilong Elijah showim datfala video long evriwan long skul.

Wei for bullyim narawan hem no problem long Britain nomoa. Hem samting wea happen evriwea long world, and disfala whiteboard video hem helpem staka young wan.

Long United States, wanfala gele wea nem bilong Ivie fraetem wanfala gele wea sem class witim hem, bikos gele hia savve bullyim hem. Bihaen hem lukim datfala video Beat a Bully, Ivie no fraetem nao datfala gele. Hem story long teacher for helpem hem. Datfala gele sei sorre long Ivie and tufala stap gud tugeta nao.

Olketa Jehovah’s Witness tingim olketa young wan. Mifala bae gohed for givim olketa advaes for helpem olketa deal witim olketa problem wea olketa kasem evriday, wea wanfala nao hem wei for bullyim narawan.