Evri year, staka thousand pipol nao go tour long olketa building bilong United States branch office and world hedquarter bilong Olketa Jehovah’s Witness long New York State. Tufala ples hia garem nem Bethel, wea hem wanfala Hebrew word wea minim “Haos bilong God.” Pipol kam from staka difren ples and kantri for lanem hao waka bilong mifala hem organize, for lukim wanem olketa duim for printim literature, and for lukim olketa fren bilong olketa wea waka long there. Wanfala man laekem tumas for go visit long ples hia bat hem mas plan gud for duim datwan.

Datfala man hem Marcellus, wea hem wanfala Jehovah’s Witness wea stap long Anchorage, Alaska, U.S.A. Hem kasem sik stroke and datwan mekem hem savve talem tu-thri word nomoa. * Hem mas iusim wheelchair and olketa narawan nao mas helpem hem for duim samting. Nomata laef bilong hem no isi, hem laekem tumas for visit long Bethel. Gogo, hem go visit long Bethel nao.

Corey, fren bilong Marcellus wea helpem hem for planim gogo bilong hem sei: “Marcellus hem garem strong tingting for hem mas go. Hem evritaem ringim mi for savve hao nao evri samting hem gohed. Main samting hem savve talem hem ‘Ia’ and ‘Nomoa,’ so taem hem ringim mi, mi mas askem hem staka kwestin for savve wanem hem laekem. Mitufala savve story olsem:

‘Iu laekem mi for kam?’

‘Nomoa.’

‘Hao, iu feel sik?’

‘Nomoa.’

‘Iu laek for savve abaotem datfala plan for visit long Bethel?’

‘Ia.’

Then mi bae gohed storyim wanem nao mi duim finis for gogo bilong hem. Mi hapi tumas taem hem kasem goal bilong hem.”

Marcellus mas duim staka samting mekem hem savve go. From New York hem farawe from ples bilong hem (5,400 kilometer) hem mas sevem selen for tufala year mekem hem fit for go. Nara samting, from hem stroke hem mas faendem eniwan for go witim hem. And tu, doctor bilong hem mas saenem wanfala pepa wea sei hem fit for go long plane. Hem kasem datwan tu-thri day nomoa bifor hem shud go long New York.

Taem Marcellus kasem New York, hem tour long olketa building long Brooklyn, Patterson, and Wallkill. Hem lukim olketa big printing press wea olketa printim olketa buk and Bible, and hem lanem staka samting abaotem hao waka bilong mifala hem organize. Hem lukim samfala information wea olketa garem abaotem “Bible and Nem Bilong God” and “Pipol wea Garem Nem Bilong Jehovah.” Taem hem tour, staka pipol barava kaen and laek hello long hem. Tru nao, hem wanfala gogo wea hem bae no forgetim!

Staka pipol wea visitim Bethel finis sei olketa tinghae tumas long datfala ples. Bat from Marcellus no savve talem staka samting, taem olketa askem sapos hem hapi hem visitim Bethel, hem sei nomoa: “Ia. Ia. Ia!”

Sapos iu and famili bilong iu savve go visit long Bethel, iufala bae kasem encouragement from datwan, olsem Marcellus. Mifala garem olketa branch office long staka kantri long world and mifala welkamim eniwan wea laek for kam visit. Mifala bae hapi for lukim iufala.

^ par. 3 Marcellus hem dae long May 19, 2014, taem mifala gohed redyim disfala article.