Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 13

Tunemese Lujingu

Tunemese Lujingu

1. Nanyi watuhanele lujingu?

YEHOWA ‘udi Nzambi wa monyo.’ (Yelemiya 10:10) Muene Mufugi wetu, watuhanele lujingu. Biblia yazuela egi: “Aye wafugile ima yagasue, mu gutshigina guaye ima inyi yafugiwe hene idi guene.” (Yatuwuwe 4:11) Yadiago, Yehowa watshiginyile egi tujinge. Lujingu ludi kado ya ndando yatuhanele Yehowa.Tanga Ngimbo 36:9.

2. Itshi tuajiya gukalagala ha gukhala nu lujingu lua gusuanguluga?

2 Yehowa wana gutuhana ima tudi naye funu ha gukhala nu lujingu, gifua ima ya gudia nu meya. (Makalegelo 17:28) Wana gutshigina luko egi tusuanguluge nu lujingu. (Makalegelo 14:15-17) Ha gukhala nu lujingu lua gusuanguluga, tudi naye gutumagela mikhuala ya Nzambi.Yeshaya 48:17, 18.

LUHOLO NZAMBI WANA GUTADILA LUJINGU

3. Tangua Gaino washiyile Abele Yehowa wakadigile itshi?

3 Biblia yana gumonesa egi Yehowa wana guzula lujingu lua muthu wagasue nu ndando yavula. Havile Gaino jikhabu jiabala mukunda nu galenge genji Abele, Yehowa wamutemesele ha gubemba khabu jienji. Uvi Gaino watunyile guvila Nzambi, wavile khabu jiabala, hene “wabuidile phanji’enji Abele, wamushiyile.” (Gisendeselo 4:3-8) Yehowa wahanele Gaino ndola mukunda nu gufua gua Abele. (Gisendeselo 4:9-11) Ndaga yene yamonesa egi Khabu nu umbalagaji jidi ndaga jiabola, mukunda jiajiya gutubuisa mbundudi nga enya shidi. Muthu wana gutshigina makalegelo ene mbagahetshigo lujingu lua ivo nu ivo. (Tanga 1 Yone 3:15.) Gila tuatshigina gusuanguluisa Yehowa, tudi naye guzumba athu agasue.1 Yone 3:11, 12.

4. Mukhuala umoshi mukatshi dia mikhuala Yehowa wahanele enya Isalele, watulongesa itshi mukunda nu lujingu?

 4 Ivo yavula gungima, Yehowa wahanele Moise mikhuala kumi (10), mikhuala yene yamonesele egi wana gutadila lujingu nu ndando yavula. Mu mikhuala yene, umoshi wazuela egi: “Ushiyigo muthu.” (Mikhuala 5:17) Muthu wagasue wakhadile gushiya muthu na muko, muene nji wakhadile naye gushiyiwa.

5. Luholo lutshi Nzambi wana gutadila mulonga wa guzola vumo?

5 Luholo lutshi Nzambi ana gutadila mulonga wa guzola vumo? Lujingu lua mona udi mu vumo ludi nu ndando gu meso a Yehowa. Mu mikhuala Yehowa wahanele enya Isalele, wazuelele egi gila muthu wanamenesa mukhetu udi gu vumo, gila ndaga yene yakalagala egi mona udi mu vumo afue, muthu muene wajiyile nji gushiyiwa. (Tanga Guzoga 21:22, 23; Ngimbo 127:3.) Ndaga yene idi gutumonesa egi guzola vumo gudi mulonga wabola.—Tala longo 28 gu gisugishilo gia mukanda.

6, 7. Luholo lutshi tuajiya gumonesa Yehowa egi tuana guzula lujingu nu ndando yavula?

6 Luholo lutshi tuajiya gumonesa Yehowa egi tuana guzula lujingu luetu nu lua athu ako nu ndando yavula? Gila tushiko mukalagala ndaga jidi gusha lujingu luetu nga lua athu ako mu gigonza (kitsulo). Hakiene, tuajiyileko gunua makaya nga gukadigila ima iko yajiya gubolesa lujingu nga gushiya muthu.

7 Nzambi watuhanele lujingu nu muila tudi nawo, hene tudi naye guyikalegela luholo muene wana gutshigina. Tudi naye gubamba muila wetu muabonga. Gila tuawubambelego muabonga, Nzambi mbawutumona gifua athu a usala. (Lomo 6:19; 12:1; 2 Kolinto 7:1) Gila tushigo guzula lujingu nu ndando yavula, tuajiyileko gukombelela Yehowa watuhanele naluo. Gubemba makalegelo abola gushiko ndaga yaleba, uvi gila tuahaga ngolo ha guzula lujingu nu ndando yavula, Yehowa mbawutukuatesa.

8. Gima gitshi tuajiya gukalagala ha gula tumbigo lujingu luetu nga lua athu ako mu gingonza?

 8 Tuamona egi lujingu ludi kado imoshi ya ndando yavula yatuhanele Yehowa. Yehowa wana gusha mutshima egi mbatukalagala ngolo ha gubamba muabonga lujingu luetu nu lua athu ako. Tuana guyimonesa mu luholo luetu lua guwendesa gamiyo (mashinyi), moto, nga gima giko. Tuanago gubalegesa tangua nga gukena mu luholo luajiya guhaga lujingu mu gingonza. (Ngimbo 11:5) Tudi naye gusha ngolo ha gula inzo yetu nga fundo tudi, ikhadigo gingonza. Yehowa wawambelele enya Isalele egi: “Hawatunga inzo iheihe, uteme, holu dia yangi utunge luphango mu khulo ha gula muthu gabuigo, gafui, na mahatshi enji gakhadi ha muila waye.”Mikhuala 22:8.

9. Khadilo dia luholo lutshi tudi naye gumonesa ha mulonga nu shithu?

9 Yehowa wana gutadila luko khadilo dietu ha mulonga nu shitu. Wana gutuhana njila ya gushiya shitu mukunda nu guheta ima ya gudia nga gudisudigisa; tuajiya luko gushiya shitu gila idi gusha lujingu luetu mu gingonza. (Gisendeselo 3:21; 9:3; Guzoga 21:28) Uvi tuajiyilego gumonesa shitu lamba nga gujishiya phamba mukunda nu gudikenesa.Ishima 12:10.

NEMESA LUJINGU HANDAGA LUDI GIMA GIA GIJILA

10. Luholo lutshi tuajiya egi mahatshi ana gumonesa lujingu?

10 Yehowa wana gutadila mahatshi gifua gima gia gijila, handaga mahatshi ana gumonesa lujingu. Hashiyile Gaino phangi’enji Abele, Yehowa wawambelele Gaino egi: “Mahatshi a phanji’aye wawa mukologoga mu mavu uu nu gu meso ami.” (Gisendeselo 4:10) Mahatshi a Abele akhadile gumonesa lujingu luenji, hene Yehowa wahanele Gaino ndola handaga washiyile Abele. Hanogele mvula yavula mu sungi ya Nowa, gungima dienji, Yehowa wamonesele luko egi mahatshi ana gumonesa lujingu. Yehowa wahanele Nowa nu fami yenji njila ya gushiya shitu ha gudia saba. Wazuelele  egi: “Luenyelu muajiya gudia ima yagasue idi nu monyo gifua mu muanadia gale ivunza. Ngudi mumihua n’ayo yagasue ha gudia.” Uvi guakhadile nu gima gimoshi Yehowa waatunyishile ha gudia, wazuelele egi: ‘Muajiyilego gudia saba hangoshi nu mahatshi ayo ndaga ya mahatshi adi lujingu luayo.’Gisendeselo 1:29; 9:3, 4.

11. Mukhuala utshi Nzambi wahanele gifutshi gia Isalele mukunda nu mahatshi?

11 Hazuelele Yehowa egi Nowa adigo mahatshi, ivo 800 gu ngima, Yehowa wahanele luko akombeledi enji mukhuala egi: “Gula muenya Isalele nga muenyi wanakhala mukatshi dia enya Isalele waya mu usungu, muene washiya shitu nga ganjila gajiya gudiwa, muthu ou udi n’ayo guvumbiga mahatshi a gima giashiyi muene mu mavu.” Wazuelele egi: “Gudia ndo mahatshi.” (Levi 17:13, 14) Uu nu mu sungi yene, Yehowa wakhadile gutshigina egi akombeledi enji ajiye egi mahatshi adi gima gia gijila. Akhadile naye gudia saba uvi mahatshi ndo. Tangua akhadile gushiya shitu ha gudia, akhadile naye guvumbiga mahatshi a shitu yene mu mavu.

12. Luholo lutshi Aklisto ana gutadila mahatshi?

12 Ivo yazonda gungima dia gufua gua Yesu, apostolo adibungishile nu akulu a mu hungu dia Uklisto gu Yelusalema, ha gutomba mukatshi dia Mikhuala yahanewe gua enya Isalele, mikhuala itshi Aklisto akhadile naye gutumagela. (Tanga Makalegelo 15:28, 29; 21:25.) Yehowa waakuatesele ha gukotelesa egi uu nu mu tangua diene, mahatshi akhadile nu ndando yavula gu meso enji, Aklisto akhadile naye guatadila gifua gima gia gijila. Aklisto a tangua dia thomo akhadilego gudia nga gunua mahatshi, luko akhadilego gudia saba gula yazolewego mahatshi muabonga. Gushiya mukhuala wene guakhadile ndaga yabola luholo lumoshi nu gukombelela isongo, nu gukalagala uthambi. Sendese tangua diene uu nu mangino, Aklisto a giamatshidia ana gutuna gudia nga gunua mahatshi. Mangino mukhuala wene udi nu ndando ba? Ai, uu nu mangino, Yehowa wana gutshigina egi tutadile mahatshi gifua gima gia gijila.

13. Mukunda natshi Aklisto ana gutuna gumbiwa mahatshi?

 13 Ndaga yene yamonesa egi Aklisto adi naye gutuna gumbiwa mahatshi ba? Ai, idi ngenyi. Yehowa watuwambelele egi tushigo naye gudia nga gunua mahatshi. Hagufezegesa, gila munganga mumoshi waguwambela egi ushigo naye gunua matombe adi nu gabondo (alcool), wajiya guditobola nawo mu muila ba? Ata hazonda ndo! Idi luholo lumoshi, mukhuala wagutuna gudia nu gunua mahatshi wakotelesa egi tuajiyilego ndo gutshigina gumbiwa mahatshi mu muila.—Tala longo 29 gu gisugishilo gia mukanda.

14, 15. Gutumagela Yehowa nu gunemesa lujingu gudi nu ndando itshi mukunda nu Muklisto?

14 Itshi wajiya gukalagala gila munganga waguwambela egi gula watuna gumbiwa mahatshi umufua? Muthu nu muthu udi naye gudizudila desizio dia gutumagela nga ndo mukhuala wa Nzambi mukunda nu mahatshi. Aklisto ana gunemesa lujingu muavula, hene, tuana gukamba egi atusage mu maluholo ako ashigo gutoga mahatshi; uvi tuajiyilego gutshigina egi tumbiwe mahatshi.

15 Tuana gukalagala ngolo ha gukhala nu sante yabonga, uvi luholo lujingu ludi nu ndando yavula gu meso a Nzambi, tuajiyilego gutshigina egi atumbe mahatshi. Gutumagela Nzambi gudi nu ndando yavula, tushiko naye gushiya mukhuala wenji ha gulehesa lujingu luetu. Yesu wazuelele egi: “Muthu watshigina guhuluisa monyo wenji, mbawuwutotesa. Uvi muthu yago watotesa monyo wenji ha ndaga yami, muene mbawuwuheta luko.” (Matayo 16:25) Tuana gutshigina gutumagela Yehowa handaga tuana gumuzumba. Yehowa wana gujiya ndaga yajiya gutusuanguluisa, luholo lumoshi nu muene, tuana gutadila lujingu gifua gima gimoshi gia ndando nu gia gijila.Hebelu 11:6.

16. Mukunda natshi akombeledi a Nzambi ana gumutumagela?

16 Akombeledi a gutshigina a Nzambi ana guzula desizio dia gutumagela mukhuala wenji mukunda nu mahatshi. Ana gutuna gudia nu gunua mahatshi, ana gutuna gumbiwa  mahatshi. * Uvi, ha gula akhale nu sante yabonga, ana gutshigina maluholo ako agusagewa. Ana gutshigina nu mutshima umoshi egi Mufugi wa lujingu nu mahatshi, wana gujiya ndaga yajiya guasuanguluisa. Aye nji wana gutshigina egi Nzambi wajiya ndaga yajiya gugusuanguluisa ba?

LUHOLO YEHOWA WANA GUTSHIGINA EGI TUKADIGILE MAHATSHI

17. Mu sungi ya enya Isalele, luholo lutshi, phamba lumoshi, Yehowa waawambelele ha gukadigila mahatshi?

17 Mukatshi dia mikhuala Nzambi wahanele Moise, Yehowa wawambelele enya Isalele egi: “Monyo wa gima giagasue giafugiwe udi mu mahatshi. Hene ngudi gumiwambela egi mudi n’ayo ya gumba mahatshi holu dia giwotshielo mukunda nu guheta gutotesewa gua gubola guenu. Monyo wana khala mu mahatshi, hene mahatshi adi muhana njila ha guheta gutotesewa gua gubola.” (Levi 17:11) Tangua enya Isalele akhadile gukalagala gubola, ha gutoga gutotesewa gua gubola guawo gudi Yehowa, akhadile guhana milambu ya shitu, nganga-Nzambi wakhadile gumba ndambo ya mahatshi a shitu yene holu dia giwotshielo gia tempelo. Luene luholo phamba lumoshi Yehowa wahanele enya Isalele njila ya gukadigila mahatshi.

18. Gibawu gia Yesu giatuhana njila ya guheta itshi?

18 Hajile Yesu ha mavu, ha fundo dia guhana milambu ya shitu, muene wahanele lujingu luenji, mahatshi enji, ha gula gubola guetu gutotesewe. (Matayo 20:28; Hebelu 10:1) Lujingu lua Yesu luakhadile nu ndando yavula, hene, tangua Yehowa wafuzumuishile Yesu ha guya mu dilu, Yehowa wahanele athu agasue luendu lua gujinga ivo nu ivo.Yone 3:16; Hebelu 9:11, 12; 1 Phetelo 1:18, 19.

Luholo tshi wajiya gumonesa egi wana gunemesa lujingu nu mahatshi?

19. Itshi tudi naye gukalagala ha gula ‘mahatshi a athu akhadigo ha muila wetu’?

19 Tudi naye guhana Yehowa mersi yavula mukunda nu  lujingu atuhanele! Hakiene, tudi naye luko guwambela athu ako egi gila amonesa gutshigina guawo gudi Yesu, ajiya gujinga ivo nu ivo. Tuana gutshigina athu, hene tuana gusha ngolo ha gualongesa ndaga ajiya gukalagala ha guheta lujingu. (Ezekiele 3:17-21) Gungima dienji, tuajiya guzuela gifua mupostolo Pholo egi: “Ngudi mumiwambela egi gula muku’enu mumoshi watota, mahatshi enji gakhadigo ha muila wami. Ndaga ya ngamiwambelele matangi agasue a Nzambi, ngamisuegelego n’awo, nga hazonda.” (Makalegelo 20:26, 27) Yadiago, ha gumonesa egi tuana gunemasa lume lujingu nu mahatshi, tudi naye guwambela athu n’akuetu mbimbi ya Yehowa, nu guakotelesela egi muene wana guzula lujingu nu mahatshi nu ndando yavula.

^ par. 16 Ha gujiya ndaga jiko jiatadila gumbiwa mahatshi, tala mayiji 77-79 a mukanda “ Gardez-vous dans l’amour de Dieu, ” wasonegewe gudi Matemue a Yehowa.