Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 11

Mukunda Natshi Malamba adi Avula Gubalega?

Mukunda Natshi Malamba adi Avula Gubalega?

1, 2. Muhu utshi athu avula ana gudihula?

FUNJI yakola yabolesa dimbo. Muthu mumoshi waloza athu mu ekelezia (Église) athu avula afua, ako anamana. Misongo ya Kanser yashiya mama mumoshi, uvi an’enji mutano asala nu lujingu.

2 Tangua malamba a luholo lulu ana gubua, athu avula ana gudihula egi, “Mukunda natshi?” Avula ana gutshigina gujiya gishina mavu adi aguzala nu umbalagaji nu malamba. Wadihudile gale muhu wene ba?

3, 4. (a) Mihu itshi Habakuka wahudile? (b) Mvutu itshi Yehowa wamuhanele?

3 Mu Biblia mudi mene jia athu avula akhadile nu gutshigina guakola gudi Nzambi, uvi athu ene adihudile nji mihu ya luholo luene. Hagufezegesa, tuzuelele profete Habakuka. Wahudile Yehowa egi: ‘Mukunda natshi aye udi mungumonesa ndaga jiabola? Muho’tshi aye udi mutshigina gutala gusagesewa gu’athu? Gusagesewa nu umbundudi gudi mungujeta. Gumana nu gulua guabua mua gasue.’Habakuka 1:3.

4 Mukanda wa Habakuka 2:2, 3, udi gumonesa mvutu Nzambi wahanele gu mihu ya profete Habakuka nu laji dienji dia gusugisa ndaga jiakhadile gusagesa Habakuka. Yehowa wana guzumba akombeledi enji muavula. Biblia yazuela egi: “Muene wana bata ginemo gienu.” (1 Phetelo 5:7) Nzambi anago gutshigina malamba, gubalega luholo tuana guatuna. (Yeshaya 55:8, 9) Hakiene, tuzuelele muhu wene: Mukunda natshi malamba adi avula ha mavu?

 MUKUNDA NATSHI MALAMBA ADI AVULA GUBALEGA?

5. Ndaga jitshi alongeshi avula a mangumba ana gulongesa mukunda nu malamba? Itshi Biblia yana gulongesa?

5 Matangua ako bapaster, miphe (abbé) nu alongeshi ako a mangumba ana gulongesa egi Nzambi wana gutshigina egi athu amone malamba. Ako ajiya guzuela egi Nzambi walondele gale mualeha ndaga jiagasue mbajibuila muthu nu muthu, ikhale malamba. Ana guzuela luko egi tuajiyileko gujiya gishina gia ndaga jiene. Athu ako ajiya guzuela egi gila muthu wafua, ikhale mona wazonda, wana guya mujinga nu Nzambi mu dilu. Uvi ndaga jiene jiagasue jishigo jia giamatshidia. Yehowa ajiyilego gukhala ha gishina gia ndaga jiabola. Biblia yazuela egi: ‘Nzambi gajiyilego gutshita ndaga yabola, Nzambi Wangolo jiagasue ganatshitago milonga idi ishigo handuedi.’Yobo 34:10.

6. Mukunda natshi athu avula ana guhana Nzambi fote gu malamba agasue adi mubua ha mavu?

6 Athu ana guhana Nzambi fote gu malamba agasue adi gubua mukunda ana gutangiza egi Nzambi wana gutuameza mavu. Uvi luholo tualongugile mu Mukhapho 3, Satana Diabulu udi diago mutuameji wa mavu.

7, 8. Mukunda natshi mavu adi nu malamba avula gubalega?

7 Biblia yana gutuwambela egi “mavu agasue adi mu uhinyinyi wa muthu wabola.” (1 Yone 5:19) Satana wana guhinyina mavu, wakhala muenya khuta (shidi) nu muenya ndaga jiabola. Muene “muhuigi wa athu agasue a ha mavu.” (Yatuwuwe 12:9) Athu avula ana gulandula khadilo dienji. Giene gishina giathomo mavu adi aguzala nu enya mambo, enya umbalagaji wakola, nu enya mitshima yabola.

8 Gudi ndaga jiko jiana gukalagala egi malamba akhale avula ha mavu. Gulumbuga gua Adama nu Eva, guakalegele egi anawo avualewe nu masumu. Masumu ene ana gutuma athu ha gubatela athu n’ako malamba. Tangua diko athu ana gudizula nu ndando gubalega athu n’ako.  Ana gudiluisa, ana guya gu ita enji ana gusagesa akuakuawo. (Mulongeshi 4:1; 8:9) Matangua ako athu ana gumona lamba mukunda nu “luendu luabola.” (Mulongeshi 9:11) Lamba diajiya gubuila muthu gila muthu muene udi ha fundo diabola mu tangua diabola.

9. Mukunda natshi tuajiya gutshigina egi gudi nu mulonga umoshi wana gukalagala egi Nzambi ahane njila egi malamba abue?

9 Yehowa ajiyilego gukhala ha gishina gia malamba. Ita, umbundudi nu malamba tuana gumona ishigo fote y’enji. Nzambi ashigo ha gishina gia malamba gifua gudigita gua mavu, funji yakola (kimvudi), nga guzala gua mita. Uvi wajiya gudihula egi: ‘Gila Yehowa udi muenya ngolo jiagasue, mukunda natshi ajiyilego gusugisa ndaga jiabola?’ Tuana gujiya egi Nzambi wana gututangiza muavula, hakiene guajiya gukhala nu mulonga umoshi wana gukalagala egi Nzambi a hane njila egi malamba abue.1 Yone 4:8.

MUKUNDA NATSHI NZAMBI WANA GUHANA NJILA EGI MALAMBA ABUE

10. Luholo lutshi Satana washile giphapha gua Yehowa?

10 Mu dihia dia Edene Satana wadimbile Adama nu Eva. Satana wazuelele egi Nzambi udi Mutuameji wabola. Wazuelele egi Nzambi wakhadile gumina Adama nu Eva gima gimoshi giabonga. Satana watshiginyile egi Adama nu Eva amone gifua muene mbawukhala mutuameji wabonga gubalega Yehowa, watshiginyile luko guamonesa gifua akhadilego nu funu ya Nzambi mu lujingu luawo.Gisendeselo 3:2-5; tala longo 27 gu gisugishilo gia mukanda.

11. Mvutu ya muhu utshi tudi nayo funu?

11 Adama nu Eva atunyile gutumagela Yehowa, amulumbugidile. Ene atangijile egi akhadile nu ufumu wa gudizudila desizio dia gutomba ndaga itshi idi yabonga nga yabola. Itshi Yehowa wakhadile naye gukalagala ha gumonesa egi Adama nu Eva akhadile gudidimba? Luholo lutshi Yehowa wajiyile gumonesa egi muene wajiya muabonga ndaga jiajiya gutusuanguluisa?

12, 13. (a) Halumbugile Adama nu Eva mukunda natshi Yehowa gaashiyilego tangua diene? (b) Mukunda natshi Yehowa wahanele njila egi Satana ahinyine mavu, nu egi athu akalagale maguvernema awo akhawo?

 12 Halumbugile Adama nu Eva Yehowa gaashiyilego tangua diene. Hafundo dia guashiya, waabembelele tangua dia guvuala ana. Yehowa wahanele ana a Adama nu Eva luendu lua guditombela mutuameji. Felela dia Yehowa diakhadile egi mavu azale nu athu a gutagana, gushigo nu mulonga nga umoshi wa Satana wajiyile gubalumuna felela diene dia Yehowa.Gisendeselo 1:28; Yeshaya 55:10, 11.

13 Inunu yavula y’anjelo yamonele luholo Satana washile giphapha (maya) gudi Yehowa. (Yobo 38:7; Danyele 7:10) Yehowa wabembelele Satana tangua dia gumonesa gula ndaga azuelele yakhadile ya giamatshidia. Yehowa wahanele luko njila egi athu akalagale maguvernema awo mu utuameji wa Satana, ha gutala gula ajiya gukhala muabonga, luholo atunyile Nzambi.

14. Hagutadila milonga ya ha mavu awa, itshi tuajiya guzuela mukunda nu uhinyinyi wa Satana?

14 Sendese mualeha, athu ana guphaga gudituameza, uvi ashigo mujiya luholo lua gudituameza muabonga. Satana wamonegele diago egi udi muenya mbambo. Athu adi nu funu ya ukuateshi wa Nzambi. Profete Yelemiya wazuelele giamatshidia tangua wasonegele egi: ‘Ai, Yehowa! Ngajiya etshi, njila ya muthu ishigo mu mago enji. Hadi muthu muwenda, gashigo nu ufumu wa gutuameza idiatelo yenji.’Yelemiya 10:23.

MUKUNDA NATSHI YEHOWA WANA GUNENGENENA MATANGUA AVULA

15, 16. (a) Mukunda natshi Yehowa wabembele egi malamba akhale uu nu mangino? (b) Mukunda natshi ashiko gusugisa ndaga jiabola, jiana gutuzolela Satana?

15 Mukunda natshi Yehowa abembele egi malamba akhale uu nu mangino? Mukunda natshi ashiko gusugisa ndaga  jiabola, hagula jitubuilago? Tangua diavula diabalegele hagukotelesa egi utuameji wa Satana udi wabola. Athu alolele gale maluholo agasue abaguvernema, uvi ashiko gujiya luholo lua gudituameza. Athu atshitshile gale ima yavula ya gushimana mu ndaga jia sianse. Ana gukalagala luko mashinyi nu ima iko ya luholo nu luholo, uvi mu mafundo agasue ha mavu mudi ndaga jiabola, uphutu, umbundudi nu ita gubalega sungi jiko. Tuajiyilego gudituameza muabonga, gila Nzambi atukuateselego.

16 Uvi, Yehowa anago gusugisa ndaga jiabola jiana gutuzolela Satana. Gila Yehowa wajisugisa, yajiya gumonesa gifua muene wana gukuatesa Satana. Uvi jiya egi Yehowa ajiyilego gukuatesa Satana. Yajiya luko gutuma athu atangize egi ene ajiya gudituameza muabonga hakhawo, luholo Satana wazuelele. Uvi ndaga yazuelele Satana idi ya mambo, hakiene, Yehowa ajiyilego gudinginyisa mu mambo a luholo luene. Muene ajiyilego gumba mambo.Hebelu 6:18.

17, 18. Itshi Yehowa mbaakalagala gu gubola guagasue Satana wana gutuzolela?

17 Yehowa wajiya gusugisa ndaga jiagasue jiabola jiana gutubuila mukunda nu ulumbugi wa Satana nu athu ba? Ai. Gushigo nu mulonga wakola gudi Nzambi. Yehowa wana gujiya tangua dia guhana mvutu gu iphapha ya Satana. Gungima dienji, Yehowa mbawutaganyisa felela dienji dia gubuisa mavu phaladiso. Athu agasue adi mu “ndumba” mbaafuzumuga. (Yone 5:28, 29) Athu mbashigo gukata luko nu mbashigo gufua. Yesu mbawukatula gubola guagasue Satana wana guzola. Yehowa mbawukadigila Yesu ha ‘gubolesa midimo ya Diabulu.’ (1 Yone 3:8) Tuasuanguluga mukunda nu guhuiminyina gua Yehowa, handaga tuaheta luendu lua gumujiya nu lua guzula desizio egi akhale Mutuameji wetu. (Tanga 2 Phetelo 3:9, 10.) Tangua tuana gumona malamba Yehowa wana gutukuatesa hagula egi tukolesele.Yone 4:23; tanga 1 Kolinto 10:13.

18 Yehowa anako gututuma gungolo ha gumutomba  akhale Mutuameji wetu. Wahanele athu luendu lua guditombela. Tutadile luholo luendu luene lua guditombela luajiya gutubatela gubonga mu lujingu luetu.

LUHOLO LUTSHI MBAWUKALEGELA LUENDU LUA GUDITOMBELA?

19. Gima gitshi giandando Yehowa watuhanele? Mukunda natshi tudi nayo guhana mersi mukunda nu gima giene?

19 Yehowa watuhanele gima gimoshi giandando, luendu lua guditombela. Luana gukalagala egi tukhale ya gudisha nu shitu. Shitu jishiko nu luendu luene lua guditombela, uvi esue tuajiya gutomba luholo lua gutuameza lujingu luetu, nga guzula desizio dia gusuanguluisa Yehowa. (Ishima 30:24) Luko, tushigo gifua mashinyi ha gukalagala phamba ndaga eyi muthu waakadigile watshiginyile. Tuajiiya guditombela luholo lua muthu tuajiya gubua, akuatshi ajiya gukhala mafuta etu, nga ndaga mbatukalagala mu lujingu luetu. Yehowa wana gutshigina egi tukhale nu lujingu lua gusuanguluga.

20, 21. Ndaga itshi yabonga wajiya gutomba ha gukalagala mangino?

20 Yehowa wana gutshigina egi tumuzumbe. (Matayo 22:37, 38) Udi gifua tata mumoshi wavua munenji udi gumuleza egi “Ngana guguzumba” tata muene mbawusuanguluga gila mbimbi jiene jiazoga diago mu mutshima wa mun’enji. Yehowa watuhanele njila ya gutomba gila tuatshigina gumukombelela nga ndo. Satana, Adama, nu Eva atombele gutuna utuameji wa Yehowa. Aye giwa, luholo lutshi wana gukadigila luendu luaye lua guditombela?

21 Kadigila luendu luaye lua guditombela ha gukombelela Yehowa. Gudi nu athu avula azudile gale desizo dia gusuanguluisa Nzambi, nu dia gutuna Satana. (Ishima 27:11) Mangino, itshi wajiya gukalagala ha gujinga ha mavu ahe-ahe tangua Nzambi mbawukatula malamba agasue? Mukhapho walandula mbawuhana mvutu gu muhu wene.