Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 15

Luholo Luabonga Lua Gukombelela Nzambi

Luholo Luabonga Lua Gukombelela Nzambi

1. Nanyi udi naye gutuwambela luholo luabonga lua gukombelela Nzambi?

MANGUMBA avula ana guzuela egi ana gulongesa giamatshidia giatadila Nzambi. Uvi ndaga yene ishigo yadiago handaga ana gulongesa malongo agudisha mukunda nu umuthu wa Nzambi nu luholo tudi naye gumukombelela. Luholo lutshi tuajiya gujiya luholo luabonga lua gukombelela Nzambi? Yehowa hakhenji wajiya gutuwambela luholo lua gumukombelela.

2. Itshi yajiya gugukuatesa ha gujiya luholo luabonga lua gukombelela Nzambi?

2 Yehowa watuhanele Biblia ha gula tulonguge luholo luabonga lua gumukombelela. Longuga Biblia, hagula Yehowa agukuatese uhete gubonga gudi mukatuga mu malongo enji handaga muene wana gugutangiza muavula.Yeshaya 48:17.

3. Nzambi wana gutshigina egi tukalagale itshi?

3 Athu ako ana guzuela egi Nzambi wana gutshigina mangumba agasue, uvi Yesu atulezelego ngenyi. Wazuelele egi: ‘Ishigo muthu wagasue udi mungutamega egi Fumu, Fumu, mbawungina mu Ufumu wa mu dilu, uvi phamba owu wana gukalagala gutshigina gua Tata.’ Hakiene tudi naye gulonguga ndaga yana gutshigina Nzambi, gungima dienji, tudi naye gujikalagala. Gukalagala ndaga jiene gudi nu ndando yavula handaga Yesu wazuelele egi athu anago gutumagela Nzambi adi gifua mbundudi, “akalagadi a ndaga jiabola.”Matayo 7:21-23.

4. Yesu wazuelele itshi mukunda nu gukalagala gutshigina gua Nzambi?

 4 Yesu watuwambelele egi mbatumona malamba ha gukalagala gutshigina gua Nzambi. Wazuelele egi: “Mungine gu mufulo wazonda, ndaga ya njila idi muya gu gukuluga idi yakoma, mufulo wayo udi wadibembeleela, athu adi mungina muene adi avula. Uvi njila idi muya gu lujingu idi yazonda, mufulo wayo udi wakama, athu tumisala tumisala adi mungina muene.” (Matayo 7:13, 14) Njila yazonda idi luholo luabonga lua gukombelela Nzambi, yana gutuameza gu lujingu lua ivo nu ivo. Njila yakoma idi luholo luabola lua gukombelela Nzambi, yana gutuameza gu gufua. Uvi Yehowa anago gutshigina egi muthu afue. Wana guhana muthu wagasue luendu lua gulonguga ndaga jidi gumutadila.2 Phetelo 3:9.

LUHOLO LUABONGA LUA GUKOMBELELA NZAMBI

5. Luholo lutshi wajiya gujiya athu ana gukombelela Nzambi luholo luabonga?

5 Yesu wazuelele egi tuajiya gujiya athu adi gukombelela Nzambi mu luholo luabonga. Tuana guajiya gu malongo nu makalegelo awo. Wazuelele luko egi: ‘Mbamuakotelesa gu ndaga jidi ene mutshita.’ Wazuelele luko gamba: “Mutshi wagasue wabonga udi muyima mabundu abonga.” (Matayo 7:16, 17) Ndaga yene yakoteleselego egi athu ene ana gukombelela Nzambi ajiyilego gukalagala gubola. Uvi akombeledi a Nzambi ana gukalagala yagasue ha gutshita ndaga jiabonga. Tuzuelele giwa ndaga jiajiya gutukuatesa hagujiya athu ana gukombelela Nzambi luholo luabonga.

6, 7. Mukunda natshi gukombelela gua giamatshidia gudi naye gukatuga mu Biblia? Longo ditshi tuazula mu luholo lua Yesu lua gulongesa?

6 Luholo luetu lua gukombelela ludi naye gukatuga mu Biblia. Biblia yazuela egi: “Mbimbi jiagasue jia mu mukanda wa Nzambi, jiafundjishiwe gudi Nzambi, nu jidi jiatagana ha gulongesa giamatshidia, ha gutungununa  gujimbila gua athu, nu ha gubela, nu ha gutemesa athu ha gukhala mu giamatshia gia Nzambi.” (2 Timote 3:16, 17) Mupostolo Pholo wafundjile gudi Aklisto egi: “Ha tuamijiyishile mbimbi ya Nzambi, muayitegelelego nu muayitshiginyilego, gifua mbimbi ya muthu. Uvi gifua mbimbi ya Nzambi, gifua mudi yene diago.” (1 Tesalonike 2:13) Luholo luabonga lua gukombelela ludi naye gukatuga mu mbimbi ya Nzambi, Biblia. Lushigo naye gukatuga mu matangi nu mishambo y’athu, nga mu gima giko.

7 Ndaga jiagasue Yesu akhadile gulongesa jiakhadile gukatuga mu mbimbi ya Nzambi. (Tanga Yone 17:17.) Wakhadile gutanga baverse a Biblia tangua diagasue. (Matayo 4:4, 7, 10) Akombeledi a giamatshidia a Nzambi ana gulandula gifezegeselo gia Yesu, ndaga jiagasue ana gulongesa jiana gukatuga mu Biblia.

8. Ndaga itshi Yesu watulongesele mukunda nu gukombelela Yehowa?

8 Tudi naye gukombelela phamba Yehowa. Ngimbo 83:18 yazuela egi: ‘Aye, udi Yehowa, aye hakhaye Nzambi wagudinyinyiga ha mavu.’ Yesu watshiginyile egi athu ajiye muabonga Nzambi wa giamatshidia, hene waawambelele jina dia Nzambi. (Tanga Yone 17:6.) Yesu wazuelele egi: ‘Ukombelele Yehowa Nzambi waye, umutshitshile khuta muene hakhenji mudimo.’ (Matayo 4:10) Hakiene, luholo tudi akombeledi a Nzambi, tuana gulandula gifezegeselo gia Yesu. Tuana gukombelela phamba Yehowa, tuana gukalegela jina dienji, tuana guwambela athu ako jina diene nu ndaga Nzambi mbawututshitshila.

9, 10. Luholo lutshi tuajiya gudimonesela guzumba?

9 Tudi naye gukhala nu guzumba guakola gudi athu. Yesu walongesele alandudi enji egi adizumbe. (Tanga Yone 13:35.) Guzumba guene guanago gutadila fundo tudi, luholo luetu lua gukalagala ndaga, umonyi nga uphutu wetu. Gudizumba guetu gudi naye gutubungisa gifua aphangi a mala nu a akhetu. (Kolosai 3:14) Tushigo naye  gulua ita nga gushiya athu. Biblia yazuela egi: “Gima gidi mumikhaphumuna an’a Nzambi nu an’ a Diabulu ginyegi: Muthu udi gashigo mutshita idi ha nduedi nu udi gashigo muzumba phanjenji gashigo mun’a Nzambi.” Yazuela luko egi: ‘Tudizumbienu; tukhadigo gifua Gaino wakatugile gua Muthu wabola, washiyile phanji’enji.’1 Yone 3:10-12; 4:20, 21.

10 Tuana gukalegela tangua dietu, ngolo jietu nu umonyi wetu ha gukuatesa nu gukolesa athu ako. (Hebelu 10:24, 25) Tuana ‘gutshitshila athu agasue ndaga jiabonga.’Galatiya 6:10.

11. Mukunda natshi tuana gutshigina egi Yesu udi njila yana gutuameza gudi Nzambi?

11 Tudi naye gutumagela Yesu handaka muene udi njila ya guya gudi Nzambi. Biblia yazuela egi: ‘Guhuluga gushigo muhetewa gudi muthu muko. Ndaga ya, ha mavu a mudidi, gushigo muthu muko yahanene Nzambi gudi athu, udi mujiya gutuhuluisa.’ (Makalegelo 4:12) Mu Mukhapho wa 5 wa mukanda ou, tualongugile egi Yehowa watumine Yesu ha guhana lujingu luenji gifua gibawu mukunda nu athu ana gumutumagela. (Matayo 20:28) Yehowa watombele Yesu gifua Fumu ha gutuameza mavu. Giene gishina Biblia yana gutuwambela egi ha gujinga ivo nu ivo tudi naye gutumagela Yesu.Tanga Yone 3:36.

12. Mukunda natshi tuana gutuna gudinginyisa mu politike?

12 Tushigo naye gudinginyisa mu ndaga jia politike. Yesu anginyilego mu politike. Tangua akhadile gumusophesa, Yesu wawambelele Pilate egi: “Ufumu wami ushigo wa ha mavu awa.” (Tanga Yone 18:36.) Luholo lumoshi nu Yesu, tuana gutshigina nu mutshima wagasue Ufumu wa Nzambi wa mu dilu, gishina giene, mu mafundo agasue tuana gujinga, tuanago gudinginyisa mu ndaga jia politike. Uvi, Biblia yana gututoga egi tutumagele “Ahinyinyi a mbula-matadi adi muhinyina,” adi mu maguvernema. (Lomo 13:1) Tuana gutumagela mikhuala ya gifutshi tuana  gujinga. Uvi gila mukhuala wa gifutshi wa divilego nu mikhuala ya Nzambi, tudi naye gulandula apostolo, tangua azuelele egi: “Tudi naye ya gutumagela Nzambi, uvi athu ndo.”Makalegelo 5:29; Mako 12:17.

13. Ndaga itshi tuana gulongesa mukunda nu Ufumu wa Nzambi?

13 Tudi nu felela egi phamba Ufumu wa Nzambi mbawumanesela malamba a ha mavu. Yesu wazuelele egi “lukuma luabonga lua Ufumu” mbalulongesewa gu songi jiagasue jia mavu. (Tanga Matayo 24:14.) Gushigo nga guvernema umoshi wa an’athu wajiya gukalagala ndaga Ufumu wa Nzambi mbawutukalegela. (Ngimbo 146:3) Yesu watuwambelele ha gukombelela mukunda nu Ufumu wa Nzambi ha zuelezele muene egi: “Ufumu waye uze, gutshigina guaye gutshitshiwe ha mavu, gifua mu gudi mutshitshiwa mu dilu.” (Matayo 6:10) Biblia yatuwambela egi Ufumu wa Nzambi mbawushiya mawufumu agasue a an’athu, ‘wene mbosala ivo nu ivo.’Danyele 2:44.

14. Wana gumona egi akhuatshi ana gukombelela Nzambi mu luholo luabonga?

14 Gungima dia gulonguga ndag’eji, dihule gamba: ‘Akhuatshi ana gulongesa ndaga jiana gukatuga mu Biblia? Akhuatshi ana guwambela athu n’ako jina dia Nzambi? Akhuatshi ana gudimonesela guzumba gua diago, ana gutshigina egi Nzambi watumine Yesu ha gutuhuluisa? Akhuatshi anago gudinginyisa mu politike? Akhuatshi ana gulongesa egi phamba Ufumu wa Nzambi wajiya gumanesa malamba etu?’ Phamba Matemue a Yehowa.Yeshaya 43:10-12.

ITSHI MBAWUKALAGALA?

15. Gila tuatshigina egi Nzambi ategelele gukombelela guetu itshi tudi naye gukalagala?

15 Tuajiyilego gusuga phamba ha gutshigina egi Nzambi udi guene. Handaga bademo nji ana gutshigina egi Nzambi udi guene uvi anago gumutumagela. (Yakoba 2:19) Gila tuatshigina egi Nzambi ategelele gukombelela guetu,  tushigo naye phamba gutshigina egi udi guene, uvi tudi naye gukalagala ndaga yana gutuwambela muene.

16. Mukunda natshi tudi naye gutuna ikombelelo ya mambo?

16 Hagula Nzambi atshigine gukombelela guetu, tudi naye gutuna ikombelelo ya mambo. Profete Yeshaya wasonegele egi: “Muzoge mukatshi dia dimbo dinyi. Mudibongese.” (Yeshaya 52:11; 2 Kolinto 6:17) Giene gishina tudi naye gutuna ndaga jiagasue jia ikombelelo ya mambo.

17, 18. “Babilona Diakoma” didi itshi? Mukunda natshi tudi naye guzoga muene mu phushi?

17 Gikombelelo gia mambo gidi itshi? Gidi gikombelelo giagasue giana gulongesa athu ha gukombelela Nzambi luholo lushigo gudivua nu Mbimbi yenji. Biblia yana gutamega ikombelelo yagasue ya mambo egi “Babilona Diakoma.” (Yatuwuwe 17:5) Mukunda natshi? Handaga, hanogele mvula mu masugu a Nowa, gungima dienji, malongo avula a ikombelelo ya mambo asendesele mu dimbo dia Babilona. Malongo ene a mambo amuangunugine ha mavu agasue. Athu ajingile mu dimbo dia Babilona akhadile gukombelela nzambi jitatu. Mangino nji, mangumba avula ana gulongesa egi Nzambi udi utatu, uvi Biblia yana gulongesa diago egi Nzambi wa giamatshidia udi phamba mumoshi, jina dienji Yehowa, Yesu udi mun’enji. (Yone 17:3) Athu akhadile gujinga mu dimbo dia Babilona akhadile luko gutshigina egi gila muthu wafua gitshinyi gienji giko giana gulandula gujinga gu ngima dia gufua gua muila wenji; gitshinyi giene gia muila giajiya gumona lamba mu milungi. Uvi ishigo ndaga ya giamatshidia ndo.—Tala malongo 1417, nu 18 gu gisugishilo gia mukanda.

18 Nzambi walayile egi gualeha ndo mboshiya ikombelelo yagasue ya mambo. (Yatuwuwe 18:8) Wakotelesa gishina athu adi naye guzoga mu gikombelelo giamambo muphushi? Yehowa Nzambi watshigina egi uzoge muphushi.Yatuwuwe 18:4.

Gila udi mukombelela Yehowa nu akombeledi enji, mbawungina mu fami yenji ya ha mavu agasue

19. Gula wazula desizio dia gukombelela Yehowa, luholo lutshi muene mbawugukuatesa?

 19 Gila wazula desizio dia guzoga mu gikombelelo giamambo ha gukombelela Yehowa, tangua diko mafuta aye nga enya fami yaye mbaashigo gukotelesa desizio diaye, ajiya gugumonesa lamba. Uvi Yehowa mbawugukuatesa. Aye mbawungina mu fami yakoma ya bamilio a athu ana gudizumba diago mu mavu agasue. Luko, mbawukhala nu felela dia gujinga ivo nu ivo ha mavu ahe-ahe a Nzambi. (Mako 10:28-30) Tangua diko masugu adi muza, mafuta aye nga enya fami ene atunyine egi ukombelelago Yehowa, mbaazula desizio dia gulonguga Biblia.

20. Mukunda natshi idi nu ndando gukombelela Nzambi mu luholo luabonga?

20 Gualeha ndo, Nzambi mbawushiya athu agasue abola, gungima muene mbawuhinyina mavu agasue. (2 Phetelo 3:9, 13) Mbayikhala sungi yabonga diago! Muthu wagasue mbawukombelela luholo Yehowa wana gutshigina egi tumukombelele. Ndaga yene yamonesa gamba idi nu ndando egi uzule desizio dia gukombelela Nzambi mu luholo luabonga sendese mangino.