Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 14

Fami Yaye Yajiya Gusuanguluga

Fami Yaye Yajiya Gusuanguluga

1, 2. Yehowa wana gutshigina egi fami jikhale luholo lutshi?

YEHOWA NZAMBI, muene wasendesele gubungisa athu mu ulo. Biblia yatuwambela egi hafugile muene mukhetu wathomo “wamuhanele gudi yala.” Adama wasuangulugile muavula hene azuelele egi: ‘Aa you udi gifiya gia ifiya yami, musunyi wa misunyi yami.’ (Gisendeselo 2:22, 23) Ndaga yene yatumonesa egi Yehowa wana gutshigina egi yala nu mukhetu asuanguluge mu ulo.

2 Idi lamba gumona luholo athu avula ashigo nu gusuanguluga mu fami jiawo. Uvi, mu Biblia mudi malongo avula ajiya gukuatesa muthu wagasue mu fami, ha gulondega lujingu lua fami yenji nu ha gusuanguluga nu enya fami yenji.Luka 11:28.

NDAGA YANA GUTOGA NZAMBI GUDI MALA

3, 4. (a) Luholo lutshi yala adi naye gukalegela mukaji’enji ndaga? (b) Mukunda natshi yala nu mukhetu adi naye guditotesela gubola guawo?

3 Biblia yazuela egi yala wabonga udi naye guzumba nu gunemesa mukaj’enji. Tanga Efeso 5:25-29. Tangua diagasue, yala udi naye gutshitshila mukaj’enji ndaga nu guzumba guagasue. Udi naye luko gumubamba hagula ndaga yabola imubuilago, gashigo naye gutshita ndaga yajiya gubatela mukaji’enji malamba.

4 Uvi itshi yala adi naye gukalagala gula mukaj’enji watshita ndaga jiabola? Awambela mala egi: “Muzumbe akaji’enu, muatshitshilago ndaga jiakola jia guasagesa.” (Kolosai 3:19) Mala, mujimbilago egi enue nji muana gukalagala ndaga jiabola. Hakiene, gila muatshigina egi  Nzambi amitotesele, mudi naye gutotesela akajienu. (Matayo 6:12, 14, 15) Gila yala nu mukhetu adi guditotesela gubola guawo, mbaasuanguluga mu ulo.

5. Mukunda natshi yala udi naye gunemesa mukaji’enji?

5 Yehowa wana gutoga egi yala anemese mukaji’enji. Yala udi naye gutangiza muavula ha gujiya ndaga mukaji’enji adi najio funu. Mulonga wene udi nu ndando yavula. Gula yala gashigo gukalegela mukaji’enji ndaga mu luholo luabonga, Yehowa wajiya gutuna gutegelela gukombelela guenji. (1 Phetelo 3:7) Hagula muthu akhale nu ndando gu meso a Yehowa, muthu muene udi naye gumuzumba. Yehowa anago guzumba mala gubalega akhetu.

6. Guzuela egi yala nu mukaji’enji adi “muthu mumoshi” yakotelesa itshi?

6 Yesu wakotelesele egi yala nu mukaji’enji “gashigo luko athu muyadi, uvi adi muthu mumonshi.” (Matayo 19:6) Adi naye gukhala nu gudijinginyina mukatshi diawo, ajiyilego gudihuiga mu ulo. (Ishima 5:15-21; Hebelu 13:4) Mala nu akaji’awo adi naye gudihana nu mutshima umoshi gu ndaga yatadila gubungisa muila. (1 Kolinto 7:3-5) Yala udi naye guwunguluga egi “gushigo nu muthu udi nu muila wenji umbalagaji, uvi udi muwubamba.” Hakiene, yala udi naye guzumba mukaji’enji. Handaga mukhetu wagasue wana gutshigina muavula egi mulumi’enji amusuanguluise nu amuzumbe.Efeso 5:29.

NDAGA YANA GUTOGA NZAMBI GUDI AKHETU

7. Mukunda natshi fami idi naye gukhala nu mutuameji?

7 Mu fami jiagasue mudi naye gukhala nu fumu (muto) wajiya gutuameza athu, ha gula fami yagasue ikalagale ndaga hamoshi. Biblia yazuela mu mukanda wa 1 Kolinto 11:3 egi: “Klisto udi muto wa yala diagasue, yala udi muto wa mukaji’enji, Nzambi udi muto wa Klisto.”

8. Luholo lutshi mukhetu wajiya gunemesa mulumi’enji muavula?

8 Yala wagasue wajiya gukalagala ndaga jiabola. Uvi  gila mukhetu watshigina badesizio a mulumi’enji, ha gukalagala ndaga mukuta (khungi), fami yagasue mbayisuanguluga. (1 Phetelo 3:1-6) Bibia yazuela egi: ‘Mukhetu adihane ha gunemesa mulumi’enji muavula.’ (Efeso 5:33) Ndaga itshi mukhetu udi naye gukalagala gila mulumi’enji wana gukombelela mu gikombelelo giko? Mukhetu udi naye kaka gumunemesa. Biblia yazuela egi: “Enue akhetu, mutumagele alumi’enu. Ngenyi gula mukatshi diawo ako wawa khenji gatshigina gale go Nzambi, ene atshigine gu makalegelo enu. Mbamukhadigo nu ndaga ya guzuela ndo. Ndaga ya ene mbamona muho udi makalegelo enu abonga.” (1 Phetelo 3:1, 2) Makalegelo abonga a mukhetu ajiya gukuatesa mulumi’enji akotelese nu anemese malongo a Biblia.

9. (a) Ndaga itshi mukhetu wajiya gukalagala gila adivilego nu mulumi’enji gu mulonga umoshi? (b) Mukanda wa Tito 2:4, 5 wahana akhetu longo ditshi?

9 Ndaga itshi mukhetu wajiya gukalagala gila adivilego nu mulumi’enji gu mulonga umoshi? Mukhetu wajiya guhana matangi enji nu gudibulumuisa guagasue. Ndaga yene yamonesewa mu lumene lua Sala, wazuelele mulonga  umoshi, mulonga wene wasagesele Abalahama, uvi Yehowa wamuwambelele egi: ‘Tshita yagasue idi guguwambela Sala.’ (Gisendeselo 21:9-12) Mukhetu udi naye guvuila mulumi’enji wa Muklisto handaga, idi lamba ha gumona yala udi Muklisto azule desizio dishigo gudivua nu Biblia. (Makalegelo 5:29; Efeso 5:24) Mukhetu wabonga udi naye gukalagala mudimo wabonga mu fami yenji. (Tanga Tito 2:4, 5.) Tangua mulumi’enji nu an’enji mbaamona luholo adi gukalagala mudimo muavula, mbaamuzumba muavula, mbaamunemesa nji.Ishima 31:10, 28.

Lumene lua Sala luajiya gutulongesa gima gitshi?

10. Itshi Biblia yana gulongesa ha mulonga nu gudikhaphumuna mu ulo nga gushiya ulo?

10 Mala ako nu akaji’awo ana guzula muphushi desizio dia gudikhaphumuna nga dia gushiya ulo. Uvi, Biblia yana guzuela egi “Mukhetu gadikhaphumunago gudi mulumi’enji” luko egi “Yala nji gashigo n’ayo ya gubemba mukaji’enji.” (1 Kolinto 7:10, 11) Uvi gudi nu milonga iko yakola yajiya gukalagala egi yala nu mukhetu adikhaphumune mu ulo. Guzula desizio dia luholo luene gushigo mulonga waleba. Itshi tuajiya guzuela mukunda nu gushiya ulo? Biblia yamonesa egi ndaga phamba imoshi yajiya gutuma athu ha gushiya ulo idi gila yala nga mukhetu wakalagala uthambi.Matayo 19:9.

NDAGA YANA GUTOGA NZAMBI GUDI MVUAJI

Yesu wahanele gifezegeselo giabonga mukunda nu muthu wagasue wa mu fami

11. Anenu adi nu funu yavula ya itshi?

11 Mvuaji, khadienu gubalegesa tangua diavula nu anenu. Anenu adi nu funu yenu, adi nu funu yavula egi mualongese ndaga jiatadila Yehowa.Mikhuala 6:4-9.

12. Mvuaji diji naye gukalagala gima gitshi ha gubamba anawo?

12 Mavu a Satana adi mubola tangua diagasue, hakiene, gudi nu athu ajiya gukamba luholo lua gukalagala ana azonda gubola, yajiya gukhala egi athu ene anubungisa muila nu ana. Mvuaji jiko jiana guvua sonyi ha guwambela anawo ndaga jiatadila gubungisa muila. Uvi  mvuaji jidi naye gutemesa an’awo mukunda nu athu ene abola, jidi naye luko guwambela an’awo luholo lua gulenga athu ene. Enue mvuaji, mudi naye gubamba an’enu. *1 Phetelo 5:8.

13. Luholo lutshi mvuaji jidi naye gulongesa anawo?

13 Mvuaji jidi naye gulongesa anawo luholo lua gukhala nu makalegelo abonga. Luholo lutshi muajiya gulongesa anenu? Mudi naye guhana anenu formasio, muajiya nji guahana ndola, uvi ndola yene ishigo naye gubalegesa gubala. (Yelemiya 30:11) Muhanyigo anenu  ndola tangua mudi nu khabu jiavula. Utshiginago egi mbimbi jiaye jikhale gifua “phogo yakhusa” jikhale gunamenesa anaye. (Ishima 12:18) Longesa anaye ha gukotelesa gishina adi naye gugunemesa.Efeso 6:4; Hebelu 12:9-11; tala longo 30 gu gisugishilo gia mukanda.

NDAGA YANA GUTOGA NZAMBI GUDI ANA

14, 15. Mukunda natshi ana adi naye gutumagela mvuaji jiawo?

14 Yesu wakhadile gutumagela shi’enji tangua diagasue, ikhale mu tangua dialamba. (Luka 22:42; Yone 8:28, 29) Yehowa nji wana gutshigina egi ana atumagele mvuaji jiawo.Efeso 6:1-3.

15 Enue ana, yajiya gukhala lamba ha gutumagela mvuaji jienu, uvi mujimbilago egi gutumaga guenu guajiya gusuanguluisa Yehowa nu mvuaji jienu. *Ishima 1:8; 6:20; 23:22-25.

Gula mavuala atshigina gukalagala ndaga yabola, gima gitshi giajiya guakuatesa akhale agujinginyina gudi Nzambi?

16. (a) Luholo lutshi Satana wana gutuma mavuala ha gukalagala ndaga jiabola? (b) Mukunda natshi gukhala nu mafuta ana guzumba Yehowa gudi mulonga wabonga?

16 Diabulu wajiya gukalegela mafuta aye nga mavuala ako ha gugutuma utshite ndaga jiabola. Diabulu umujiya egi yajiya gukhala lamba ha gutuna ndaga jidi guguwambela mafuta aye. Tuzuelele lumene lumoshi. Dina, mun’a Yakoba wa mukhetu, wakhadile nu mafuta akhadilego guzumba Yehowa. Ndaga yene yamubatele muene nu fami yenji lamba. (Gisendeselo 34:1, 2) Gila mafuta aye anago guzumba Yehowa, ajiya gugutuma ukalagale ndaga imoshi idi gushiya mukhuala wa Yehowa, ndaga yene yajiya gugubatela lamba diavula, enya fami yaye nu Yehowa mbaavua gikenene gu mutshima. (Ishima 17:21, 25) Giene gishina, gukhala nu mafuta ana guzumba Yehowa gudi mulonga wabonga.1 Kolinto 15:33.

 FAMI YAYE YAJIYA GUSUANGULUGA

17. Muthu wagasue wa mu fami udi naye gukalagala gima gitshi?

17 Gula enya fami imoshi adi gunemesa mikhuala ya Nzambi, yajiya guakuatesa ha gulenga matululu nu ndaga jiko jiana gubata malamba. Hakiene gila udi yala zumba mukaji’aye, mutshitshile ndaga nu guzumba guagasue. Gila udi mukhetu, nemesa mulumi’aye, mutumagele luholo lumoshi nu mukhetu wazuelewa mu mukanda wa Ishima 31:10-31. Gila udi mvuaji, longesa anaye ha guzumba Nzambi. (Ishima 22:6) Gila udi tata, tuameza fami yaye “muabonga.” (1 Timote 3:4, 5; 5:8) Enue ana, khadienu gutumagela mvuaji jienu. (Kolosai 3:20) Wungulugenu egi muthu wagasue mu fami wajiya gukalagala ndaga imoshi yabola. Hakiene, khadienu gudibulumuisa, enji khadienu guditoga pardo. Yadiago, malongo a Yehowa adi mu Biblia ajiya gutuameza muthu wagasue mu fami.

^ par. 12 Wajiya guheta malongo avula atadila luholo lua gubamba ana mu mukapho 32 wa mukanda Écoute le grand Enseignant (Tegelela Mulongeshi wakoma), wasonegewe gua Matemue a Yehowa.

^ par. 15 Gila mvuaji jiawambela mona egi akalagale ndaga idi gushiya mukhuala wa Nzambi, mona gashigo naye guatumagela.Makalegelo 5:29.