Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 6

Gila Tuafua Tuana Guya Guma Gutshi?

Gila Tuafua Tuana Guya Guma Gutshi?

1-3. Mihu itshi athu ana gudihula mukunda nu gufua? Mvutu jitshi mangumba ana guhana gu mihu yene?

BIBLIA yatulaya egi gudi nu lusugu “gufua mbagukhadigo luko.” (Yatuwuwe 21:4) Mu Mukhapho wa 5, tuamonyi egi gibawu giana gutuhana njila ya guheta lujingu lua ivo nu ivo. Uvi, uu nu mangino athu ana gufua. (Mulongeshi 9:5) Hakiene, muhu wandando tuana gudihula udi egi: Gufua guakotelesa itshi?

2 Mvutu gu muhu wene yajiya gutukuatesa tangua tuafisa muthu tuana guzumba muavula. Tuajiya gudihula egi: ‘Muthu muene wayi guma gutshi? Udi gutubamba ba? Wajiya gutukuatesa? Mbatumumona luko ba?’

3 Mangumba ana guhana mvutu jialuholo nu luholo gu mihu yene. Gudi mangumba ana gulongesa egi, gila udi muthu wabonga mbawuya mu dilu, uvi gila udi muthu wabola mbawuhia tshuya mu milungi (enfer). Mangumba ako ana gulongesa egi, gula muthu wafua wana gubua nyuma, wana guya musanga akhakh’enji afile gale. Uvi, ako ana gulongesa egi gungima dia gufua, muthu wana gusophesewa, gungima wana guvualewa luko nu muila wekhela, wajiya guvualewa muthu nga shitu.

4. Matangi atshi amoshi mangumba ana gulongesa mukunda nu athu agufua?

4 Wajiya gumona gifua mangumba ene ana gulongesa ndaga jia gudisha. Uvi malongo awo ana guzola matangi amoshi. Ana gulongesa egi gila muthu wafua, gudi nu gitshinyi gienji giko giana gusala nu lujingu. Idi ya giamatshidia ba?

 GILA TUAFUA TUANA GUYA GUMA GUTSHI?

5, 6. Gila tuafua tuana guya guma gutshi?

5 Yehowa wana gujiya muabonga gila gufua gudi gima gitshi. Watuwambela egi gula muthu wafua, lujingu luenji luana gusuga. Hakiene, gula muthu wafua, matangi enji anako guya fundo diko. * Gila muthu wafua, ganago gumona, guvua, nga gutangiza luko.

6 Salomo wasonegele egi ‘athu agufua ashigo mujiya gima.’ Athu agufua ajiyilego guzumba nga gukhala nu umbalagaji, ‘gushigo midimo nga gumba gua matangi nga gujiya nga ndunge mu mavu a athu agufua.’ (Tanga Mulongeshi 9:5, 6, 10.) Mu mukanda wa Ngimbo 146:4, Biblia yana gutuwambela egi gila muthu wafua, ‘milonga’ yagasue akhadile gutangiza yana gusuga.

NDAGA YAZUELELE YESU MUKUNDA NU GUFUA

Yehowa wafugile athu ha gula ajinge ivo nu ivo ha mavu

7. Yesu wazuelele itshi mukunda nu gufua?

7 Hafile futa dienji Lazalo, Yesu wawambelele alandudi enji egi: “futa dietu Lazalo wabandji gale tulo.” Yesu atshiginyilego guzuela egi Lazalo wakhadile gubanda tulo ha guhuimisa muila. Gungima Yesu wazuelele egi: “Lazalo wafui.” (Yone 11:11-14) Yesu wafuanesele gufua nu tulo. Muene gazuelelego egi Lazalo wayile mu dilu nga wayile musanga akhakh’enji afile gale. Yesu azuelelego luko egi Lazalo wakhadile gumona lamba mu milungi, nga wakhadile guvualewa luyadi gifua muthu muko nga shitu. Ishigo luholo luene, yakhalele gifua Lazalo wakhadile gu tulo tuakola. Lusugu luko Yesu wafuanesele gufua nu tulo. Hafile mun’a Yayilo (Jairus), Yesu wazuelele etshi, “udi mubanda tulo.”—Luka 8:52.

8. Luholo lutshi tuajiya egi Nzambi afugilego athu hagula egi afue?

 8 Nzambi wafugile Adama nu Eva hagula afue ba? Ndo! Yehowa waafugile hagula asuanguluge nu lujingu luatagana ivo nu ivo. (Mulongeshi 3:11) Mvuaji jianago gutshigina egi an’awo akule gungima afue, Yehowa nji wana guvua luholo luene mukunda nu athu. Uvi gila Nzambi watufugile ha gujinga ivo nu ivo, mukunda natshi tuana gufua?

MUKUNDA NATSHI TUANA GUFUA?

9. Mukunda natshi mukhuala Yehowa wahanele Adama nu Eva wakhadilego wakola?

9 Mu gilanga gia Edene, Yehowa wawambelele Adama  egi: “Wajiya gudia gaye mabundu agasue a mitshi idi mu dihia. Uvi udigo ndo mabundu a mutshi udi muhana ndunge jia gujiyila ndaga jiabonga nu jiabola, ndaga ya gula waadia, lusugu luene aye mbawufua gaye diago.” (Gisendeselo 2:9, 16, 17) Mukhuala wene wakhadilego wakola ha gunemesa, Yehowa wakhadile nu ufumu wa guwambela Adama nu Eva ndaga itshi idi yabonga nga yabola. Gila atumagele mukhuala wa Yehowa, nga amumonesele egi ana gunemesa ufumu wenji, nga amumonesele luko egi ana gusuanguluga mukunda nu ima yagasue muene waahanele.

10, 11. (a) Luholo lutshi Satana adimbile Adama nu Eva? (b) Mukunda natshi gushigo luholo luaguvila Adama nu Eva khenda gu mulonga akalegele?

10 Uvi, Adama nu Eva atunyile gutumagela Yehowa. Satana wawambelele Eva egi: “Ya diago Nzambi wamiwambelele egi mudigo mabundu a mitshi yagasue idi mu dihia edi ba?” Eva wavutuile egi: “Tuajiya gudia mabundu a mitshi yagasue ya mu dihia, uvi mabundu a mutshi udi hakatshi dia dihia tuajiyilego gudia, Nzambi wazuelele egi: ‘Mudigo mabundu a mutshi unu, muababatago koko hagula mufuigo.’”—Gisendeselo 3:1-3.

11 Hene, Satana wazuelele luko egi: “Mbamufuigo. Nzambi wazuelele ngenyi ndaga ya muene udi mujiya egi ha mudi mudia mabundu anyi, meso enu mbaatuwuga, mbamubua gifua muene Nzambi, mbamujiya ndaga jiabonga nu jiabola.” (Gisendeselo 3:4-6) Satana wakhadile gutshigina egi Eva atangize egi wakhadile nu ufumu waguditombela ndaga idi yabonga nu yabola. Uvi Satana amuwambelego ndaga mbayiabuila gila atuna gutumagela Nzambi. Satana wawambelele Eva egi mbaashigo gufua, hene Eva adile bundu diene, gungima wadihanele mulumi’enji. Adama nu Eva akhadile gujiya egi Yehowa waawambelele egi adigo bundu  diene. Hadile Adama nu Eva bundu diene, atunyile gutumaga gu mukhuala umoshi waleba. Tangua adile bundu diene, amonesele egi anago gunemesa Sh’awo wa guzumba wa mu dilu. Gushigo luholo lua guavila khenda gu mulonga akalegele!

12. Mukunda natshi idi lamba gumona luholo Adama nu Eva atunyile gunemesa Yehowa?

12 Idi lamba diavula ha gumona luholo mvuaji jietu jia thomo jiatunyile gunemesa Mufugi wawo! Luholo lutshi wajiya gudivua, gila wakalagala ngolo ha gusasa mona, gungima mona muene wagulumbugila, wakalagala ndaga wamutunyishile? Yajiyilego gugukatesa mutshima ba?

Adama wakatugile mu fuluguta dia mavu, wavutugile nji mu fuluguta dia mavu

13. Itshi Yehowa watshiginyile gukotelesa hazuelele egi “mbawuvutuga luko mu fuluguta dia mavu”?

13 Hatunyile Adama nu Eva gunemesa Yehowa, atotesele felela dia lujingu lua ivo nu ivo. Yehowa wawambelele Adama egi: “Aye udi fuluguta dia mavu, mbawuvutuga luko mu fuluguta dia mavu.” (Tanga Gisendeselo 3:19.) Yakotelesa egi Adama mbawuvutuga luko fuluguta dia mavu, gifua tangua wakhadile khenji gafugiwa ndo. (Gisendeselo 2:7) Hasumugile Adama, gungima wafuile, gakhadilego luko mujinga.

14. Mukunda natshi tuana gufua?

14 Gila Adama nu Eva atumagele Nzambi, nga ana gujinga uu nu mangino. Uvi tangua atunyile gumutumagela, asumugile, hene afuile. Disumu didi gifua misongo  imoshi yakola tuazanguile gua mvuaji jietu jiathomo. Mukut’etu agasue tuana guvualewa nu masumu, hene tuana gufua. (Lomo 5:12) Uvi ishigo ndo felela dia Nzambi mukunda nu athu. Nzambi anago gutshigina nga hazonda egi athu afue, Biblia yana guzuela egi gufua gudi ‘mbalagaji.’—1 Kolinto 15:26.

GIAMATSHIDIA GIANA GUTUKATULA MU UHIGA

15. Luholo lutshi gujiya giamatshidia giatadila gufua guana gutukatula mu uhiga?

15 Gujiya giamatshidia giatadila gufua guana gutukatula mu uhiga wa matangi avula a mambo. Biblia yana gulongesa egi athu agufua anago gumona lamba nga guvua gikenene. Tuajiyilego guzuela nawo, ene nji ajiyilego gutuzuelesa. Tuajiyilego guakuatesa, ene nji ajiyilego gutukuatesa. Ajiyilego gutukalagala gubola, hakiene, tushigo naye guavua woma. Uvi, mangumba avula ana guzuela egi athu agufua ana gujinga fundo diko, egi tuajiya guakuatesa gula tuahana makuta gua nganga Nzambi nga gua mafumu ako a mangumba. Uvi gila tuajiya giamatshidia giatadila gufua, tuajiyilego gudimbiwa mu luholo luene.

16. Ndaga jitshi jia mambo mangumba ana gulongesa mukunda nu athu agufua?

16 Satana wana gukadikila mangumba a mambo ha gutudimba nu gututuma ha gutangiza egi athu agufua ana gujinga luko. Tufezegese, gudi mangumba ana gulongesa egi gula tuafua, gitshinyi gietu giko giana gusala nu lujingu. Mu gikombelelo gienu ana gumilongesa luholo luene, nga ana gumilongesa ndaga Biblia yana guzuela mukunda nu athu agufua? Satana wana gukadikila mambo ha gutukhaphumuna nu Yehowa.

17. Mukunda natshi malongo a guhia tshuya mu milungi ana gushingisa Yehowa?

17 Malongo a mangumba avula ana gusagesa. Gudi  mangumba ana gulongesa egi athu abola mbaahia tshuya ivo nu ivo mu milungi. Longo diene dia mambo diana gushingisa Yehowa. Muene ajiyilego gutshigina egi athu amone lamba luholo luene! (Tanga 1 Yone 4:8.) Luholo lutshi wajiya gudivua gila muthu mumoshi wahaga koko dia mona ha jigo dia tshuya, ha gumuhana ndola? Wajiya gumona egi muthu muene udi nu mutshima wabola. Luko, wajiyilego gubua futa dia muthu muene. Satana wana gutshigina egi tumone Yehowa luholo luene!

18. Mukunda natshi tushigo naye guvila athu afile gale woma?

18 Mangumba ako ana gulongesa egi gila athu afua, ana gubua nyuma. Mangumba ene ana gulongesa egi tudi naye gunemesa nyuma, tudi naye nji gujivila woma handaka jiajiya gutukalagala gubonga nga gubola. Athu avula ana gutshigina mambo ene. Ana guvila athu afile gale woma, hene ana guakombelela ha fundo dia gukombelela Yehowa. Ujimbilago egi athu agufua ajiyilego gutegelela nga gutangiza, hakiene tushigo naye guavila woma. Yehowa udi mufugi wetu. Muene Nzambi wa giamatshidia, tudi naye gukombelela phamba muene.—Yatuwuwe 4:11.

19. Luholo lutshi gujiya giamatshidia giatadila athu agufua giajiya gutukuatesa?

19 Gujiya giamatshidia giatadila gufua guana gutukatula mu uhiga wa malongo a mangumba a mambo. Giamatshidia giatadila gufua giajiya gutukuatesa ha gujiya ndaga jiabonga jiatendelele Yehowa mukunda nu lujingu luetu mu masugu adi muza.

20. Itshi mbatulonguga mu mukhapho walandula?

20 Sendese mualeha, Yobo wahudile muhu egi: “Gula muthu wafua muene wajiya guzuga gu gufua ba?” (Yobo 14:14) Muthu wafuile gale wajiya lume gujinga luko ba? Mvutu idi Nzambi gutuhana mu Biblia yana gusuanguluisa muavula. Mbatuzuelela mvutu yene mu mukhapho walandula.

^ par. 5 Athu ako ana gutangiza egi gila muthu wafua, monyo nga nyuma yenji yanako kufua. Hagujiya luko ndaga jiavula, gumulonga wene, tala longo 17 nu 18 gu gisugishilo gia mukanda.