Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 19

Khala Hehi nu Yehowa

Khala Hehi nu Yehowa

1, 2. Fundo ditshi tuajiya guheta ubambi Mangin’owu?

TANGIZA gale gila udi muwenda lusugu lua gikudi. Dilu diabuita, mvula yasendesa gukuma nu guhenya. Gungima, mvula yavula yasendesa gunoga. Umukamba fundo dia gudisuega. Wasuanguluga ha gumona fundo dimoshi diabonga wajiya gudisuega!

2 Mangino nji tumumona ndaga jia luholo lumoshi. Ndaga jia ha mavu wawa jidi mubola muavula. Wajiya gudihula egi: ‘Fundo ditshi ngajiya guheta ubambi?’ Mu Biblia, musonegi wa mukanda wa ngimbo wazuelele egi: “Muene awambele Yehowa egi: ‘Aye udi muluidi wami nu mubambi wami. Aye udi Nzambi wami ungudi muzegemena.’” (Ngimbo 91:2) Mangino Jehowa wajiya gutukuatesa gu malamba adi gutubuila, enji wana gutuhana felela diabonga mukunda nu masugu adi muza.

3. Luholo lutshi Yehowa wajiya gukhala mubambi wetu?

3 Yehowa wajiya gutubamba luholo lutshi? Wajiya gutukuatesa ha gulua nu mulonga wagasue udi gutusagesa, muene udi nu ngolo jiavula gubalega muthu wagasue wajiya gukamba gutukalagala gubola. Ndaga yabola yajiya gutubuila mangino, uvi tuajiya gudi felela egi mu masugu adi muza, Yehowa mbawusugisa ndaga yene. Biblia yatuwambela egi: “Mudibambe mu guzumba gua Nzambi.” (Yuda 21) Ha guheta ukuateshi mu matangua a malamba, tudi naye gukhala hehi nu Yehowa. Uvi luholo lutshi tuajiya guyikalagala?

TSHIGINA GUZUMBA GUA NZAMBI

4, 5. Luholo lutshi Yehowa wamonesele guzumba guenji gudi esue?

4 Ha gusuena hehi nu Yehowa, tudi naye thomo gujiya luholo muene wana gutuzumba. Tangiza gale ndaga  jiagasue jiakalegele Yehowa mukunda nu esue. Watuhanele mavu, wafugile shitu nu mitshi ha mavu ene. Watuhanele nji ima yavula ya gudia nu meya a gunua. Nzambi watuwambelele jina dienji nu makalegelo enji abonga mu Biblia. Luko, watumonesele guzumba guenji luholo atumine Munenji Yesu, ha mavu, ha guhana lujingu luenji mukunda nu esue. (Yone 3:16) Mulambu wene wa Yesu, wana gutuhana felela diabonga mukunda nu masugu adi muza.

5 Yehowa wahagele Ufumu wa Masiya mu dilu, ufumu wene mbawusugisa malamba agasue, mbawubuisa mavu agasue phaladiso, athu agasue mbaakhala ha mavu ene, mbaakhala nu guhuima nu gusuanguluga ivo nu ivo. (Ngimbo 37:29) Yehowa wana gutumonesela luko guzumba guenji luholo wana gutuwambela ndaga tuajiya gukalagala ha gusuanguluga nu lujingu sendese mangino. Watuhana njila ya gumukombelela, tangua diagasue tuatshigina, wana gututegelela. Yehowa wamonesele lume egi wana guzumba muthu wagasue.

6. Itshi wajiya gukalagala mukunda nu guzumba guagumonesele Yehowa?

6 Itshi wajiya gukalagala mukunda nu guzumba Yehowa agumonesele? Mumonese egi wana gusuanguluga gu ndaga jiagasue jiakalegele muene mukunda nu aye. Mangino idi lume lamba ha gumona luholo athu avula ashiko guhana Yehowa mersi mukunda nu guzumba guenji. Hakhadile Yesu ha mavu, athu avula akhadile nji nu khadilo diene diabola. Lusugu lumoshi, Yesu wahuluishile athu kumi akhadile nu misongo ya hute, uvi muthu phamba mumoshi wavutugile ha guhana mersi. (Luka 17:12-17) Tudi naye gukalagala luholo lumoshi nu muthu muene wavutugile ha guhana Yesu mersi. Tuana gutshigina guhana Yehowa mersi tangua diagasue.

7. Luholo lutshi tudi naye gumonesa Yehowa egi tuana gumuzumba muavula?

7 Tudi naye nji gumonesa Yehowa egi tuana gumutshigina. Yezu wawambelele alandudi enji egi adi naye guzumba  Yehowa nu mitshima yawo yagasue, nu monyo wawo wagasue, nu jindunge jiawo jiagasue. (Tanga Matayo 22:37.) Yakotelesa itshi?

8, 9. Luholo lutshi tuajiya gumonesa Yehowa egi tuana gumuzumba?

8 Ndaga yene yamonesa egi tuajiya gusuga phamba ha guzuela egi tuana guzumba Yehowa ba? Ndo. Gila tuana guzumba Yehowa nu mutshima wetu wagasue, nu monyo wetu wagasue nu jindunge jietu jiagasue, mbatuyimonesa mu makalegelo etu. (Matayo 7:16-20) Biblia yana gumonesa haphelo egi gila tudi muzumba Yehowa, tudi naye gunemesa mikhuala yenji. Idi mulonga wakola ba? Ndo, handaga “mikhuala yenji ishigo mutukolela.”Tanga 1 Yone 5:3.

9 Gila tuatumagela Yehowa, mbatukhala nu lujingu luagusuanguluga nu luabonga. (Yeshaya 48:17, 18) Uvi, itshi yajiya gutukuatesa ha gukhala hehi nu Yehowa? Tuyizuelele gale.

LANDULA GUSUENA HEHI NU YEHOWA

10. Mukunda natshi udi naye gulandula gulonguga ndaga jiatadila Yehowa?

10 Luholo lutshi wabuile futa dia Yehowa? Tangua wasendesele gulonguga Biblia, wajiyile ndaga jiavula jiatadila Yehowa, hene wasendesele gukudisa ufuta waye nu muene. Ufuta wene udi gifua umulemesa tshuya. Ha gulemesa tshuya udi naye guhaga khunyi ha jigo, ha gukolesa ufuta waye nu Yehowa udi naye gulandula gulonguga ndaga jidi gumutalela.Ishima 2:1-5.

Luholo lumoshi nu tshuya, guzumba guaye gudi Yehowa gudi nu funu ya khunyi ha gula guzumba guene gujimigo

11. Luholo lutshi malongo a Biblia ajiya gugukuata?

11 Gila walandula gulonguga Biblia, mbawujiya ndaga mbajikuata diago mutshima waye. Tala luholo alandudi muyadi a Yesu adivile tangua muene akhadile guakotelesa profesie jia Biblia. Azuelele egi: ‘Mitshima yetu yakhalele mulema tshuya mu thulo jietu hakhalele muene mutuwambela milonga mu njila nu gutukoteleseela mukanda wa Nzambi.’Luka 24:32.

12, 13. (a) Guzumba guetu gudi Yehowa guajiya gubua luholo lutshi? (b) Itshi tuajiya gukalagala ha gula guzumba guene gulebigo?

 12 Hakotelesele alandudi gishina gia malongo a Biblia, mitshima yawo yasuangulugile muavula, yajiya gukhala egi aye nji wasuangulugile muavula tangua wasendesele gukotelesa malongo a Biblia. Ndaga yene yagukuatesele ha gujiya Yehowa nu ha gumuzumba. Wajiyilego gutshigina ndo egi guzumba guene gulebe.Matayo 24:12.

13 Gila wabua futa dia Nzambi, udi naye gukalagala ngolo ha gulandula gukolesa ufuta waye nu muene. Udi naye gulandula gulonguga ndaga jidi gumutadila muene Yehowa nu Yesu; udi naye nji gutangiza ndaga wana gulonguga nu luholo wajiya gujikalegela mu lujingu luaye. (Yone 17:3) Tangua udi mutanga nu gulonguga Biblia dihule egi: ‘Ndaga jiene jiangulongesa itshi mukunda nu Yehowa Nzambi? Mukunda natshi ngudi naye gumuzumba nu mutshima wami nu monyo wami wagasue?’1 Timote 4:15.

14. Luholo lutshi gisambu giajiya gutukuatesa ha gukolesa guzumba guetu gua Yehowa?

 14 Gila udi nu futa diaye wamutshima, guta n’enji maga tangua diagasue guajiya gukolesa ufuta wenu. Luholo lumoshi nji, guzuela nu Yehowa mu gisambu tangua diagasue, guajiya gukalagala egi umuzumbe muavula. (Tanga 1 Tesalonike 5:17.) Gisambu gidi gima gimoshi giandando giatuhanele Tata wetu wa mu dilu. Tudi naye guzuela n’enji tangua diagasue mu gisambu. (Ngimbo 62:8) Tangua tudi gukalagala gisambu, tudi naye gumuwambela ndaga tudi najio mu mutshima, uvi ishiko muabonga ha guvutugila mbimbi jimoshi ndo. Yadiago, gila tualandula gulonguga Biblia nu gukombelela nu mutshima wetu wagasue, guzumba guetu gudi Yehowa mbagukola.

WAMBELA ATHU AKO NDAGA JIATADILA YEHOWA

15, 16. Luholo lutshi wana gutadila mudimo wa gulongesa mbimbi ya Nzambi?

15 Gila tuatshigina gukhala hehi nu Yehowa, tudi naye nji guwambela athu ako ndaga jiatadila gutshigina guetu. Guwambela athu ako ndaga jia Yehowa gudi mulonga umoshi wandando yavula. (Luka 1:74) Yesu wazuelele egi Aklisto agasue a giamatshidia adi naye gukalagala mudimo wene. Muthu wagasue mukatshi dietu udi naye gulongesa lukuma luabonga lua Ufumu wa Nzambi. Wana gukalagala mudimo wene ba?Matayo 24:14; 28:19, 20.

16 Mupostolo Pholo wamonele egi mudimo wa gulongesa mbimbi ya Nzambi udi nu ndando yavula gubalega; wawutamegele egi “gibambelo giamonyo.” (2 Kolinto 4:7) Guwambela athu ako ndaga jiatadila Yehowa nu felela dienji gudi mulonga wabonga wagukalagala. Gudi luholo lua gumonesa egi wana gutumbuisa Yehowa, muene nji wana gusuanguluga gumona egi udi gumukalegela mudimo wene. (Hebelu 6:10) Gulongesa mbimbi ya Nzambi guajiya gugukuatesa aye nu athu wana gulongesa, handaga guajiya gukalagala egi musuene hehi nu Yehowa nu muhete  monyo wa ivo nu ivo. (Tanga 1 Kolinto 15:58.) Gudi nu mudimo uko wajiya gugusuanguluisa muavula gubalega gulongesa mbimbi ya Nzambi ba?

17. Mukunda natshi mudimo wa gulongesa udi naye gukalegewa phushi phushi?

17 Mudimo wagulongesa udi naye gukalegewa phushi phushi. Tudi naye ‘gulongesa athu mbimbi ya Nzambi’ luko tudi naye guyikalagala nu “gufubidila” guagasue. (2 Timote 4:2) Athu adi naye gutegelela ndaga yatadila Ufumu wa Nzambi. Biblia yazuela egi: ‘Lusugu luakoma lua khabu jia Yehowa luasuena. Luene ludi muza mu pushi!’ Gisugishilo ‘mbagifungulugago!’ (Sefanya 1:14; Habakuka 2:3) Yadiago, gualeha ndo, Yehowa mbawubolesa ulondegi wa Satana. Uvi athu adi naye thomo gulongesewa ha guheta luholo luagutomba gukalegela Yehowa.

18. Mukunda natshi tudi naye gukombelela hamoshi nu Aklisto ako a giamatshidia?

18 Yehowa wana gutshigina egi tumukombelele hamoshi nu Aklisto ako a giamatshidia. Biblia yana guzuela egi: “Tudiwungulugienu mukunda nu gudikolesa ha gutema gudizumba muabonga nu ha gutshita ndaga jiabonga. Tubembigo gifua athu ako adi nu luholo lua gutuna gudibungisa. Tudikolesenu tubalege gutshita ngenyi gifua mumudi mumona lusugu lua Fumu ludi gale musuena hehi.” (Hebelu 10:24, 25) Tudi naye gukalagala ngolo ha guya gudibungisa mu hungu tangua diagasue. Hatuana gudibungisa mu hungu, tuana guheta luendu lua gudikolesa mukatshi dietu.

19. Itshi yajiya gutukuatesa ha guzumba aphangi Aklisto a mala nu a akhetu?

19 Gila udi muya gudibungisa mu hungu, mbawuheta mafuta abonga ajiya gugukuatesa ha gukombelela Yehowa. Mbawumona aphangi a akhetu nu a mala a luholo nu luholo, adi mukalagala ngolo ha gukombelela Yehowa, gifua aye. Mbawumona luko egi ashigo athu agutagana, ajiya gukalagala gubola. Gila akalagala ndaga imoshi ya gusuanguluishilego, atotesele. (Tanga Kolosai 3:13.) Hafundo dia gumona  phamba gubola gua aphangi Aklisto a mala nu a akhetu, khala gutadila makalegelo awo abonga, gutshita ngenyi mbagugukuatesa ha guazumba nu ha gusuena hehi nu Yehowa.

LUJINGU LUATAGANA

20, 21. “Lujingu lua tagana” ludi itshi?

20 Yehowa wana gutshigina egi mafut’enji agasue akhale nu lujingu luabalega gubonga. Biblia yana gulongesa egi masugu adi muza lujingu luetu mbalukhala luagudisha nu lujingu tudi naluo mangino.

Yehowa watshigina usuanguluge nu “lujingu lua ivo nu ivo.” Yagusuanguluisa ba?

21 Mumasugu adi guza mbatujinga ivo nu ivo, uvi mbatujingigo ivo 70 nga 80. Mbatusuanguluga nu “lujingu lua ivo nu ivo” nu muila watagana, mu guhuima mu phaladiso. Biblia ya tamega ndaga jiene egi “lujingu luatagana.” Yehowa walayele egi mbotuhana lujingu luatagana, uvi tudi naye gukalagala yagasue ha “gujinginyina” lujingu lua ivo nu ivo.1 Timote 6:12, 19.

22. (a) Luholo lutshi tuajiya ‘guheta lujingu lua gutagana’? (b) Mukunda natshi tuajiyilego guheta lujingu lua ivo nu ivo mu ngolo jietu?

22 Luholo lutshi tuajiya ‘guheta lujingu lua giamatshidia’? Tudi naye “gutshita ndaga jiabonga” ha “gukhala amonyi mu midimo yabonga.” (1 Timote 6:18) Ndaga yene yakotelesa egi tudi naye gutshita ndaga tuana gulonguga mu Biblia. Uvi, lujingu luene lua ivo nu ivo tuajiyilego guluheta mu ngolo jietu. Luholo tudi ajigulu a Adama, tushigo nu luendu lua guheta lujingu lua ivo nu ivo. Uvi mu “khenda” jienji, Yehowa wahana akombeledi enji agutshigina lujingu luene. (Lomo 5:15) Tata wetu wa mu dilu watshigina diago guhana akombeledi enji agutshigina kado yene.

23. Mukunda natshi udi naye guzula desizio diabonga mangino?

23 Dihule egi, ‘Ngana gukombelela Nzambi luholo ana gutshigina ba?’ Gila wamona egi udi naye gubalumuna khadilo diaye, itshite muphushi idi ndaga yabonga diago. Gila tuashila Yehowa mutshima, luko gila tudi gukalagala ngolo ha gumutumagela, Yehowa mbawukhala fundo  dietu dia gulengela. Yehowa mbawubamba akombeledi enji agutshigina mu masugu agisugishilo a ulondegi wabola wa Satana. Yehowa watuhana felela dia monyo wa ivo nu ivo mu phaladiso, luholo ayilayele. Yadiago, wajiya guheta lujingu lua tagana gila wazula desizio diabonga mangino!