Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 9

Gisugishilo gia Mavu Gidi Hehi ba?

Gisugishilo gia Mavu Gidi Hehi ba?

1. Fundo ditshi tuajiya gulonguga ndaga jiatadila masugu adi muza?

WATEGELELE gale ndaga jidi muzuelewa mu radio gungima wazuela egi ‘Mavu abola lume’ ba? Luholo itumba idi muluiwa khanda jiavula nu luholo ndaga jiko jiabola jidi mutshitshiwa, athu avula ana guzuela egi gisugishilo gia mavu gidi hehi. Ndaga yene idi ya giamatshidia ba? Gudi luholo luagujiya ndaga mbajibua masugu adi muza ba? Ai. Athu ajiyilego gujiya ndaga mbajibua masugu adi muza, uvi Yehowa Nzambi wana gujiya. Mu Biblia Nzambi wana gutuwambela ndaga jiatadila masugu adi muza.—Yeshaya 46:10; Yakoba 4:14.

2, 3. Ndaga itshi alandudi a Yesu akhadile gutshigina gujiya? Uvi Yesu waahanele mvutu itshi?

2 Tangua Biblia yana guzuelela gisugishilo gia mavu, yanago gukotelesa gisugishilo gia mavu awa tuana gudiata, uvi yana gukotelesa gisugishilo gia gubola. Yesu walongesele athu egi Ufumu wa Nzambi mbawuhinyina mavu. (Luka 4:43) Alandudi enji atshiginyile gujiya tangua ditshi Ufumu wene wa Nzambi mbawuza, hene ahudile Yesu egi: “Gijiyilo gia guza guaye nu gia gisugishilo gia gindongo egi mbagikhala gutshi?” (Matayo 24:3) Yesu awambelelego alandudi enji lusugu gisugishilo gia mavu mbagiza, uvi waawambelele ndaga mbajibua hehi nu gisugishilo giene. Ndaga jiazuelele Yesu, jiene jidi mutagana mangino.

3 Mu mukhapho ou, mbatuzuelela ndaga jidi mumonesa egi tudi mu masugu a gisugishilo gia mavu awa. Hagula  tujiye gishina gubola gudi guavula ha mavu, tudi naye thomo guzuelela ita imoshi yaluiwe mu dilu.

ITA MU DILU

4, 5. (a) Habuile Yesu Fumu, gungima ndaga itshi yabuile mu dilu? (b) Hagutadila mukanda wa Yatuwuwe 12:12, ndaga jitshi jiakhadile naye gubua ha mavu gungima dia gubishidiwa gua Satana?

4 Mu Mukhapho wa 8 tuamonele egi Yesu wabuile fumu mu dilu mu givo 1914. (Danyele 7:13, 14) Mukanda wa Yatuwuwe wana gutuwambela egi: “Ita yazugile mu dilu, Mikaele [yakotelesa egi Yesu] nu anjelo enji akhalele mulua ita nu delago [Satana], delago nu anjelo enji akhalele mulua n’awo.” * Satana nu bademo enji abishidiwe ha mavu. Tangiza luholo anjelo asuangulugile! Uvi itshi tuajiya guzuela mukunda nu athu a ha mavu? Biblia yazuela egi mbayikhala tangua dimoshi dia lamba mukunda nu athu. Mukunda natshi? Handaga Diabulu udi nu khabu jiabala mukunda “wajiya gamba: Kumbi diami diasala diazonda.”Yatuwuwe 12:7, 9, 12.

5 Satana udi hagishina gia malamba avula ha mavu. Muene udi nu jikhabu mukunda wasala nu “kumbi . . . diazonda”. Nzambi udi naye guza gumukatula. Tutale ndaga yazuelele Yesu mukunda nu masugu a gisugishilo.—Tala longo dia 24 gu gisugishilo gia mukanda.

MASUGU A GISUGISHILO

6, 7. Itshi tuajiya guzuela mangino mukunda nu ita nu nzala?

6 Ita. Yesu wazuelele egi: “Gifutshi giko mbagiluisa giko, ufumu uko mbawuluisa ufumu uko.” (Matayo 24:7) Mu sungi yetu, athu ana gushiyiwa muavula mu ita gubalega sungi jiko. Rapor imoshi ya athu ana gulonguga ndaga jia ha mavu (Worldwatch Institute) yamonesa egi  sendesa mu givo 1914, ita yashiyile gale athu gubalega inunu 100. Athu afile mu ita sendesa givo 1900 uu nu givo 2000 abalega guvula mahugo thathu, gua athu afile sendesa givo 1 gia sungi yetu uu nu mu givo 1 900 ya sungi yetu. Tangiza gikenene nu malamba inunu ya athu yana guvua mukunda nu ita!

7 Nzala. Yesu wazuelele egi: “Nzala yabala mbayikhala.” (Matayo 24:7) Mu sungi yetu, mbuto jidi jiavula gubalega sungi jiko, uvi athu avula anako gudia muabonga. Mukunda natshi? Handaga ashiko nu falanga jiatagana jia gusumbila ima yagudia. Athu gubalega milio imoshi anago guheta makuta avula a gusumba ima ya gudia lusugu nu lusugu. Ulondegi wana gutadila ndaga ya sante ha mavu (Organisation mondiale de la santé) wana guzuela egi ana azonda avula ana gufua ivo yagasue mukunda nu gudia gua lamba.

8, 9. Itshi yamonesa egi ndaga jiatendelele Yesu hamulonga nu gudigita gua mavu nu misongo jiana gutagana mangino?

8 Gudigita gua mavu. Yesu watendelele egi: “Mavu mbadigita mangololo.” (Luka 21:11)  Ivo yagasue, mavu ana gudigita mangololo. Sendese mu givo 1900, gudigita gua mavu guashiyile gale athu gubalega milio 2. Enya sianse ana gukalagala ngolo hagujiya gutuama egi mavu mbaadigita, uvi gudigita gua mavu guana gushiya athu uu nu mangino.

9 Misongo. Yesu wadiangele guzuela egi mbagukhala “misongo yabala.” Misongo yabola mbayimuangunuga muphushi, mbayishiya athu avula. (Luka 21:11) Mangino minganga yalongugile gale luholo lua gusaga misongo ya luholo nu luholo, uvi gudi misongo iko yajiyilego gusagewa. Rapor imoshi yamonesele egi misongo gifua misongo ya mu thulo (tuberculose), malaria, nu phuluphulu ya mahatshi (choléra), yana gushiya athu ivo yagasue. Gudi misongo iko 30 minganga yamonele gale, uvi ishigo nu gihemba ndo.

LUHOLO ATHU MBAABUA MU MASUGU A GISUGISHILO

10. Luholo lutshi mukanda wa 2 Timote 3:1-5 wana gutagana mangino?

10 Mu mukanda wa 2 Timote 3:1-5, Biblia yazuela egi: “Mu masugu a gisugishilo ndaga  jiakola mbajikhala.” Mupostolo Pholo wamonesele luholo makalegelo a athu mbaakhala mu masugu a gisugishilo. Wazuelele egi athu mbaakhala

  • guditanga ene hakhawo

  • azumba mbongo

  • alumbugila mvuaji jiawo

  • aseguludi a ima ya gijila

  • a sasamana

  • anyamigishi a ako

  • enya nguma, enya khuta

  • mbalagaji jia ndaga jiabonga

  • gifua ana guzumba Nzambi uvi mbatuna gumunemesa

11. Luholo mukanda wa Ngimbo 92:8 wana guyimonesa, ndaga itshi mbayibuila athu abola?

11 Fundo udi mujinga athu avula adi nu makalegelo a luholo luene ba? Mu ifutshi yagasue mudi athu adi nu makalegelo ene. Uvi Nzambi mbawulondega ndaga jiene. Wahanele laji egi: “Athu abola adi mukula gifua muangu wabola, atshitshi a milonga yabola adi mukula nu guzela muila, uvi gukuluga guogu muanenga.”Ngimbo 92:8.

 NDAGA JIA GUSUANGULUISA MU MASUGU A GISUGISHILO

12, 13. Malongo atshi Yehowa wana gutuhana mu masugu a gisugishilo?

12 Biblia yadiangele guzuela egi mu masugu a gisugishilo mavu mbaazala nu malamba. Uvi Biblia yazuelele luko egi mbagukhala nji nu ndaga jiabonga.

“Lukuma olu luabonga lua Ufumu mbalulongesewa gu songi jiagasue jia mavu.”Matayo 24:14

13 Gukotelesa Biblia. Profete Danyele wasonegele ndaga jidi mutadila masugu a gisugishilo. Wazuelele egi: ‘Athu avula mbaajiya giamatshidia.’ (Danyele 12:4) Nzambi mbawukuatesa athu enji ha gukotelesa Biblia muabonga gubalega sungi jiko. Yehowa wakalegele ndaga yene sendese mu givo 1914. Watumonesele ndando ya gukadikila jina dienji, ya gujiya felela dienji mukunda nu mavu, ya gujiya giamatshidia giatadila gibawu, nu ya gukotelesa giamatshidia giatadila gufua nu gufuzumuga. Tualongugile egi Ufumu wa Nzambi mbawukatula malamba agasue. Tualongugile luko luholo lua guheta gusuanguluga nu luholo lua gusuanguluisa Nzambi. Uvi ndaga jiagasue jialongugile akombeledi a Nzambi, itshi ana gujikalegela? Gudi nu profesi yiko yana guhana mvutu gu muhu ou.—Tala longo 21 nu 25 gu gisugishilo gia mukanda.

14. Lukuma luabonga lua Ufumu luana gulongesewa guma gutshi? Akuatshi ana gulongesa lukuma luene?

14 Mudimo wa Gulongesa mu Mavu Agasue. Yesu wazuelele mukunda nu masugu a gisugishilo egi: “Lukuma olu luabonga mbalulongesewa gu songi jiagasue jia mavu.” (Matayo 24:3, 14) Lukuma luabonga lua Ufumu luana gulongesewa mu ifutshi gubalega 230 mu mazuelelo gubalega 700. Yadiago, Matemue a Yehowa a ‘ifutshi yagasue nu iphuta yagasue’ ana gukuatesa athu akotelese Ufumu wa Nzambi, nu ndaga Ufumu wene mbawukalagala mukunda nu  athu. (Yatuwuwe 7:9) Anago gutoga athu makuta ha gualongesa. Athu avula anago gutshigina Matemue a Yehowa, ako ana guamonesa lamba, uvi luholo Yesu walayile, gushigo nu gima giajiya gusugisa mudimo wa gulongesa mbimbi ya Nzambi.Luka 21:17.

GIMA GITSHI MBAWUKALAGALA?

15. (a) Wana gutshigina egi tudi mujinga mu masugu a misugishilo ba? Mukunda natshi? (b) Ndaga jitshi mbajibuila athu ana gutumagela Yehowa, nu anyi anago gumutumagela?

15 Wana gutshigina egi tudi mujinga mu masugu agisugishilo ba? Profesi jiavula jia Biblia jiana guzuelela masugu a gisugishilo, jidi mutagana mangino. Gualeha ndo, Yehowa mbawuzula desizio dia gusugisa mudimo wa gulongesa lukuma luabonga, hakiene “gisugishilo” mbagiza. (Matayo 24:14) Gisugishilo giene gidi itshi? Gidi ita ya Halemagedona, tangua Nzambi mbawukatula gubola guagasue. Yehowa mbawutuma Yesu nu anjielo enji ha gushiya muthu wagasue ganago gumutumagela muene, nu Mun’enji. (2 Tesalonike 1:6-9) Gungima dienji, Satana nu bademo enji mbaashigo luko gudimba athu. Mutangua diene, athu agasue ana gutumagela Nzambi nu ana gutshigina Ufumu wenji mbaamona gutagana gua malaji enji agasue.Yatuwuwe 20:1-3; 21:3-5.

16. Luholo gisugishilo gidi hehi, itshi udi naye gukalagala?

16 Gualeha ndo, mavu wawa Satana wana gutuameza mbaasugishiwa. Hakiene, tudi naye gudihula egi ‘Itshi ngudi naye gukalagala?’ Yehowa wana gutshigina egi ulonguge Biblia mu luholo luatagana. Udi naye gujiya egi gulonguga guene gudi nu ndando yavula. (Yone 17:3) Phoso jiagasue, Matemue a Yehowa ana gudibungisa mu mahungu awo ha gukuatesa athu akotelese Biblia. Mahugo agasue khala muya gudibungisa nawo.  (Tanga Hebelu 10:24, 25.) Gila wamona egi udi naye gubalumuna makalegelo aye ako, uvigo woma ha guabalumuna. Gila watshita luholo luene, ufuta waye nu Yehowa mbawukola.—Yakoba 4:8.

17. Tangua gisugishilo mbagiza, mukunda natshi athu avula mbaasagumuga?

17 Mupostolo Pholo wazuelele egi gufua gua athu abola mbaguza mu tangua athu avula ashigo gunengenena, ‘gifua nzangi mu phipha.’ (1 Tesalonike 5:2) Yesu watendelele egi athu avula mbaashigo mutshigina egi tudi mujinga mu masugu agisugishilo. Wazuelele egi: ‘Guza gua Mun’a Muthu [masugu a gisugishilo] mbagukhala gifua muakhalele ndaga mu masugu a Nowa. Mu masugu anyi mvula yakhalele khenji inoga galego, athu akhalele mudia nu munua, akhalele gudizula mu ulo uu nu lusugu luanginyine Nowa mu wato wakoma. Ene gajiyilego ndaga uu nu hazalele meya avula, akuluile agasue. Guza gua Mun’a Muthu mbagukhala nji ngenyi.’Matayo 24:37-39.

18. Yesu watuhanele longo ditshi?

18 Yesu wahanele longo egi mubuitshigo mitshima ‘nu gubalegesa gudia, nu gubalegesa gunua matombe, nu gikenene gia lujingu.’ Wazuelele egi gisugishilo mbagiza mu gisagumuisa, “gifua muheto.” Wazuelele luko egi ‘mbagiza gudi athu a ha mavu agasue.’ Wazuelele luko egi: “Mukhale gikolekole, mukombelele mahugo agasue ha enue mukhale nu ngolo jia gusutumuga mu ndaga eji jiagasue mbajiza nu jiagumagana gumeso a Mun’a Muthu.” (Luka 21:34-36) Mukunda natshi gukalegela ndaga jiazuelele Yesu gudi nu ndando? Mukunda gualeha ndo mavu wawa a Satana mbaashiyiwa. Athu ana gutumagela Yehowa nu Yesu, ene mbaajinga ivo nu ivo ha mavu ahe-ahe.Yone 3:16; 2 Phetelo 3:13.

^ par. 4 Mikaele jina diko dia Yezu Klisto. Hagujiya ndaga jiko, tala longo dia 23 gu gisugishilo gia mukanda.