Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Itshi Biblia Yajiya Gutulongesa?

 MUKHAPHO 10

Giamatshidia Giatadila Anjelo

Giamatshidia Giatadila Anjelo

1. Mukunda natshi tudi naye gulonguga ndaga jiatadila anjelo?

YEHOWA wana gutshigina egi tujiye fami yenji. Anjelo adi enya fami ya Nzambi. Mudimo utshi anjelo ana gukalagala? Luholo lutshi akhadile mukuatesa athu mu tangua diathomo? Luholo lutshi ajiya gutukuatesa mangino?—Tala longo 8 gu gisugishilo gia mukanda.

2. Anjelo akatugile guma gutshi? Afugiwe guvula gutshi?

2 Tudi nu funu ya gujiya fundo diakatugile anjelo. Kolosai 1:16 yatuwambela egi tangua Yehowa wafugile Yesu, gungima dienji “ima yagasue yafugiwe mu dilu nu ha mavu.” Anjelo nji adi mukatshi dia ima yene yafugiwe. Anjelo afugiwe guvula gutshi? Biblia yazuela egi adi inunu nu inunu.Ngimbo 103:20; Yatuwuwe 5:11.

3. Ndaga jitshi mukanda wa Yobo 38:4-7 watuwambela mukunda nu anjelo?

3 Biblia yatulongesa luko egi Yehowa wafugile anjelo gutuama dia gufuga mavu. Luholo lutshi adivile tangua amonele mavu? Mukanda wa Yobo watuwambela egi asuangulugile muavula. Akhadile gukalagala mudimo wa Yehowa hamoshi gifua fami.Yobo 38:4-7.

ANJELO ANA GUKUATESA AKOMBELEDI A NZAMBI

4. Luholo lutshi tuajiya egi anjelo ana gusuanguluga nu athu?

4 Sendese mualeha, anjelo ana gusuanguluga nu athu, ana gusuanguluga luko nu felela dia Yehowa mukunda nu mavu nu athu. (Ishima 8:30, 31; 1 Phetelo 1:11, 12) Yajiya gukhala egi anjelo avile gikenene giavula tangua Adama nu Eva alumbugile. Mangino nji yajiya gukhala egi ana guvua gikenene giavula ha gumona luholo athu adi mulumbugila Yehowa. Uvi gula muthu  mumoshi wabalumuna mutshima, wavutugila Nzambi, anjelo ana gusuanguluga. (Luka 15:10) Anjelo ana gusuanguluga muavula nu akombeledi a Nzambi. Yehowa wana gukalegela anjelo ha gukuatesa nu gubamba akombeledi enji ha mavu. (Hebelu 1:7, 14) Tutalele mene jidi mumonesa luholo anjelo akuatesele athu.

“Nzambi wami watumi muanjelo wenji, muene wabategele makano a shitu jia khoshi.”Danyele 6:23

5. Mu tangua dikulu, luholo lutshi anjelo akuatesele akombeledi a Nzambi?

5 Yehowa watumine anjelo mbadi ha gukuatesa Lota nu fami yenji ha gulenga, tangua membo a Sodoma  nu Gomola ashiyiwe. (Gisendeselo 19:15, 16) Ivo yavula gungima, profete Danyele wabishidiwe mu wina dia khoshi, uvi jiamushiyilego handaga ‘Nzambi watumine muanjelo wenji, ha gubatega makano a khoshi.’ (Danyele 6:22) Luko, tangua mupostolo Phetelo wakhadile mu bologo, Yehowa watumine muanjelo wenji ha gumuzola. (Makalegelo 12:6-11) Anjelo akuatesele nji Yesu tangua wakhadile ha mavu. Gungima dia gubatshijiwa gua Yesu, ‘anjelo akhadile gumukalegela.’ (Mako 1:13) Gutuama dia gushiyiwa gua Yesu, muanjelo mumoshi “wamukolesele.”Luka 22:43.

6. (a) Luholo lutshi tuajiya egi mangino anjelo ana gukuatesa akombeledi a Nzambi? (b) Mvutu jia mihu itshi mbatukamba?

6 Mangino, anjelo anago gusudiga luko muila wa gimuthu. Uvi Nzambi wana gutuma anjelo akuatese akombeledi enji. Biblia yazuela egi: ‘Muanjelo wa Yehowa wanabamba adi mutumagela Yehowa, muene wanaahuluisa gu ndaga jiakola.’ (Ngimbo 34:8) Mukunda natshi tudi nu funu ya ubambi? Handaga tudi nu mbalagaji jidi nu ngolo jiavula jidi mukamba gutukalagala gubola. Mbalagaji jiene akhuatshi? Jiakatugile fundo ditshi? Luholo lutshi jiana gulola gutukalagala gubola? Ha guheta mvutu gu mihu yene, tutalele ndaga jiabalegele tangua diazonda gungima dia gufugiwa gua Adama nu Eva.

MBALAGAJI JIETU JITUANAGO GUMONA

7. Satana watumine athu avula ha gukalagala itshi?

7 Tualongugile mu Mukhapho wa 3 egi muanjelo mu moshi walumbugile Nzambi, muanjelo muene watshiginyile guhinyina athu. Biblia yana gumutamega egi Satana Diabulu. (Yatuwuwe 12:9) Satana watshiginyile egi athu ako alumbugile nji Nzambi. Satana wadimbile Eva, sendese tangua diene wadimbile athu avula. Uvi athu gifua Abele, Enoke, nu Nowa, akhadile agujinginyina gudi Yehowa.Hebelu 11:4, 5, 7.

8. (a) Luholo lutshi anjelo ako abuile bademo? (b) Hazalele meya ha mavu, bademo akalegele itshi ha gusala nu lujingu?

 8 Mu tangua dia Nowa, anjelo ako alumbugile; abembele fundo diawo mu dilu ajile mujinga ha mavu gifua athu. Mukunda natshi? Biblia yatuwambela egi atshiginyile guzula akhetu mu ulo. (Tanga Gisendeselo 6:2.) Uvi anjelo akhadilego naye guzula akhetu. (Yuda 6) Luholo lumoshi nu anjelo ene abola, athu avula abuile mbundudi mu tangua diene, akhadile nji mukalagala ndaga jiko jiabola. Hene Yehowa wazudile desizio dia guashiya tangua dianogesele muene mvula yavula ha mavu. Uvi wahuluishile akombeledi enji a gutshigina. (Gisendeselo 7:17, 23) Anjelo ene abola afilego gu mvula, avutugile mu dilu. Biblia yana tamega anjelo ene abola egi bademo. Adinginyishile mu ulumbugi wa Satana Diabulu, muene wabuile mutuameji wawo.Matayo 9:34.

9. (a) Havutugile bademo mu dilu, itshi yaabuidile? (b) Itshi mbatulonguga luko mukunda nu bademo?

9 Yehowa atshiginyilego egi bademo avutuge mu fami yenji, handaga abuile alumbugi. (2 Phetelo 2:4) Bademo ajiyilego luko gusudiga muila wa gimuthu, uvi ana gulandula ‘guhuiga athu ha mavu.’ (Yatuwuwe 12:9; 1 Yone 5:19) Tutale luholo ana gudimba athu avula.Tanga 2 Kolinto 2:11.

LUHOLO BADEMO ANA GUDIMBA ATHU

10. Luholo lutshi bademo ana gudimba athu?

10 Bademo ana gudimba athu mu maluholo avula. Athu avula ana guzuela hakhawo nu bademo, uvi ako ana guyikalagala mu njila ya muthu muko gifua, mbugi udi nu wanga. Guzuela nu bademo guana gutamegewa egi midimo ya phipha, uloji nga wanga. Uvi Biblia idi gututoga ha gutuna ndaga yagasue yajiya gututuma ha guzuela nu bademo. (Galatiya 5:19-21) Mukunda natshi?  Luholo yanga wana gukalegela miheto ha gukuata shitu, bademo nji ana gukalegela mambo ha gudimba nu guhinyina athu.—Tala longo 26 gu gisugishilo gia mukanda.

11. Unganga-ngombo udi itshi? Mukunda natshi tudi naye guwulenga?

11 Bademo ana gukalegela unganga-ngombo ha gudimba athu. Unganga-ngombo udi luholo lua gukalegela ngolo jia nyuma jiabola ha guzola haphelo ndaga jidi jiagusuega nga ndaga mbajibua masugu adi muza. Haguwukalagala athu ako ajiya gutala themua, ako ana gutanga mifundunda ya gikanzo gia koko, uvi ako ana gutala muthu gu phala, gungima asendesa gumuwambela ndaga. Athu avula ana gutangiza egi ndaga jiene jishigo jiabola. Bademo ana gukalagala gubola guavula gubalega. Biblia yazuela egi bademo nu enya ngombo ana gukalagala mudimo hamoshi. Mu mukanda wa Makalegelo 16:16-18 Biblia yazuelela “demo dia guphongesa” diakhalele mukuatesa mona mukhetu mumoshi ha ‘guphonga.’ Hazolele Pholo demo diene, mona mukhetu muene gakhadilego luko nu luholo lua guphonga.

12. (a) Mukunda natshi gulola guzuela nu athu agufua gudi ndaga yabola? (b) Mukunda natshi akombeledi a Nzambi anago gudinginyisa mu ndaga jiatadila bademo?

12 Gudi nji nu luholo luko Bademo ana gukalegela ha gudimba athu. Ana gukalagala yagasue ha gututshiginyisa egi tuajiya gusolula nu athu agufua, luko egi athu agufua ana gujinga fundo diko, ajiya gutuwambela ndaga nga gutukalagala gubola. Athu ako, gila pangi’enji nga futa dienji wafua, ana guya muphongesa gua nganga-ngombo. Nganga-ngombo muene wajiya gumuwambela egi wajiya guzuela nu muthu muene wafile gale. Nganga-ngombo wajiya gumuwambela ndaga imoshi yatadila muthu wafilegale, wajiya nji guteta dizui dienji. (1 Samuele 28:3-19) Ndaga jiavula jiana  gukalegewa gula muthu wafua jiana gumonesa gifua athu afile gale ana gujinga fundo diko. Mukatshi dia ndaga jiene tuajiya gutanga: Fete jiana gukadigiwa gula muthu wafua, lusugu lua guwunguluga gufua gua muthu, gushiya shitu mukunda nu muthu wafi, gukatula sanga diagasue mu muto, nga gukalagala ndaga jiko jia luholo luene. Tangua Aklisto ana gutuna gudinginyisa mu ndaga jiene, enya fami jiawo nga enya dimbo diawo ana guasegulula, ana guashingana, nga guabuisa mbalagaji. Uvi Aklisto ana gujiya egi athu afile gale anago gujinga fundo diko. Hakiene, tuajiyilego guzuela nawo, ene nji ajiyilego gutukalagala gubola. (Ngimbo 115:17) Kalegela gutema. Ulodigo guzuela nu athu afile gale nga nu bademo. Luko, ulodigo gudinginyisa mu ndaga jia bademo.Tanga Mikhuala 18:10, 11; Yeshaya 8:19.

13. Athu avula akhadile nu woma wa bademo adi luholo lutshi mangino?

13 Bademo anago gusuga phamba mu gudimba athu, uvi ana guahana nji woma. Mangino, Satana nu bademo enji ana gujiya egi guasala ‘kumbi diazonda’ hagula Nzambi a akatule ha mavu, giene gishina adi gukalagala ndaga jiavula jiabola. (Yatuwuwe 12:12, 17) Athu avula akhadile guvua woma wa bademo, uvi mangino anako guavila luko woma. Luholo lutshi athu ene adizolele mu uhiga wa woma wene?

LUHOLO LUA GULUA NU BADEMO NU LUA GUZOGA MU UHIGA WAWO

14. Luholo lumoshi nu Aklisto a tangua diathomo, itshi tuajiya gukalagala ha guzoga mu uhiga wa bademo?

14 Biblia yana gutuwambela luholo lua gulua nu bademo nu lua guzoga mu uhiga wawo. Gutuama dia gujiya giamatshidia, Aklisto ako a mu dimbo dia Efeso akhadile thomo guzuela nu bademo. Luholo lutshi azogele mu uhiga wa bademo? Biblia yazuela egi: “Ako  akhalele atshitshi a ndaga jia ilumbelumbe abungishile mikanda yawo, ayikondele tshuya guphala ya athu agasue.” (Makalegelo 19:19) Luholo atshiginyile gubua aklisto, akondele mikanda yawo yagasue ya wanga (magie). Mangino nji tudi naye gukalagala luholo luene. Muthu wagasue wa tshigina gukombelela Yehowa udi naye gutuna gima giagasue gidi gumubungisa nu bademo. Gifua mikanda, bavideo, miziki, nu foto jidi gumonesa gifua ndaga jia wanga nga jia bademo jianako gukalagala athu gubola, nga gifua jidi ndaga jia gukena najio. Adi naye gubishila nji ima yagasue athu ana gusudiga ha gulenga ndaga jiabola.1 Kolinto 10:21.

15. Itshi tuajiya gukalagala luko ha gulua nu Satana nu bademo?

15 Hakondele Aklisto a gu Efeso mikanda yawo ya wanga, ivo yazonda gungima, Pholo wasonegele egi akhadile luko ‘gulua nu nyuma jiabola.’ (Efeso 6:12) Akhadile akondi gale mikanda yawo ya wanga, uvi bademo akhadile luko gukamba luholo lua guakalagala gubola. Hakiene, itshi akhadile naye gukalagala luko? Pholo waawambelele egi: “Muzangule mahugo agasue gutshigina gifua tshibu ha gumibamba gu mifula yagasue ya muthu wabola.” (Efeso 6:16) Gutshigina guetu guajiya gutubamba, luholo tshibu yana gubamba suta tangua dia ita. Gila tuatshigina nu mutshima wetu wagasue egi Yehowa wajiya gutubamba, tuajiya gulua nu Satana nu bademo.Matayo 17:20.

16. Luholo lutshi tuajiya gukolesa gutshigina guetu?

16 Luholo lutshi tuajiya gukolesa gutshigina guetu gudi Yehowa? Tudi naye gutanga Biblia masugu agasue, nu gushila Yehowa mutshima wetu wagasue ha gutubamba. Gila tuashila Yehowa mutshima wetu wagasue, Satana nu bademo ajiyilego guheta luholo lua gutukalagala gubola.1 Yone 5:5.

17. Itshi luko tuajiya gukalagala hagula Yehowa atubambe?

 17 Gima gitshi Aklisto a gu dimbo dia Efeso akhadile naye gukalagala luko? Dimbo dia Efeso diakhadile nu ndaga jiavula jia bademo. Hene Pholo waawambelele egi: ‘Khadienu mukombelela mahugo agasue.’ (Efeso 6:18) Akhadile naye gutoga egi Yehowa a abambe tangua diagasue. Itshi tuajiya guzuela mukunda nu lujingu luetu? Mangino nji tudi mujinga mu mavu adi nu ndaga jiavula jia bademo. Hakiene, tudi naye nji gutoga Yehowa egi atubambe, tangua tudi mukombelela tudi naye gutanga jina dienji. (Tanga Ishima 18:10.) Gila tangua diagasue tudi mutoga Yehowa atuhane ngolo jia gulua nu Satana, Yehowa mbawuhana mvutu gu gukombelela guetu.Ngimbo 145:19; Matayo 6:13.

18, 19. (a) Luholo lutshi tuajiya gubinga Satana nu bademo mu ita ana gutuluisa? (b) Mukhapho walandula mbawuhana mvutu gu muhu utshi?

18 Mu lujingu luetu, gila tuakatula gima giagasue gidi gudivua nu ndaga jia bademo, enji, gila tuasha mutshima wetu wagasue gudi Yehowa egi atubambe, tuajiya guheta ngolo jia gulua nu Satana nu bademo. Tuajiyileko luko guavila woma. (Tanga Yakoba 4:7, 8.) Yehowa udi nu ngolo jiavula gubalega bademo. Mu sungi ya Nowa Yehowa waahuile ndola, mbawuashiya masugu adi muza. (Yuda 6) Ujimbilago egi tushigo gulua hakhetu. Yehowa wana gutuma anjelo enji ha gutubamba. (2 Mafumu 6:15-17) Tuajiya gusha mutshima egi Yehowa mbawutukuatesa ha gubinga Satana nu bademo.1 Phetelo 5:6, 7; 2 Phetelo 2:9.

19 Uvi gila Satana nu bademo adi ha gishina gia malamba avula tuana gumona, mukunda natshi Nzambi khenji a ashiyile gale go? Mukhapho walandula, mbawuhana mvutu gu muhu wene.