MUKUNDA NATSHI IDI NU NDANDO

Gudijiya luholo udi nu ndaga wana gutshigina mbagugukuatesa ha guzula badesizio abonga tangua udi musagesewa.

ITSHI WAJIYA GUKALAGALA?

Tala ndaga eyi: Karen udi gu feti. Gungima dia minuta 10, wavua dizui dia muthu wagujiya dia mutamega, muthu muene wakhalele gungima dienji.

“Itshi udi mukalagala hananyi?”

Karen wabalumuga, wamona futa dienji Jessica wagukolewa gale matombe nu milangi iyadi ya gukangula hamago. Wamuleza egi matombe ene adi nu mutungu wabala. Jessica wathuphula mulangi gukoko dia utata wasuenesa mulangi wene gu phala ya Karen, gungima wamuleza egi “ushigo mona wazonda ha gudisuanguluisa ndambu. Ishigo ngenyi?”

Karen udi mutshigina gutuna, uvi Jessica udi futa dienji. Karen gatshiginyilego egi futa dienji atangize egi umuvua gikenene gu mulonga wene. Luko Jessica wakhalele mona mukhetu wa makalegelo abonga. Gula Jessica udi munua matombe, ishigo mulonga wabola. Karen wazuelele hakhenji egi ‘gudi phamba gunua.’ ‘Gunua matombe gushigo gifua gunua diamba.’

Nga wakhalele hafundo dia Karen, itshi wakhadile naye gukalagala?

TANGIZA THOMO HA GUKALAGALA NDAGA!

Ha guzula desizio diabonga gu ndaga gifua eyi, udi naye gudijiya muabonga. Gudijiya guakotelesa gujiya luholo wabutshiwe, udi nanyi nu ndaga wana gutuna nga wana gutshigina. Gudijiya muabonga guajiya guguhana ngolo jia gutuameza lujingu luaye ha fundo dia gubemba egi athu ako agutuameze.1 Kolinto 9:26, 27.

Luholo lutshi wajiya gukudisa ngolo jiene? Guhana mvutu gu mihu eyi yalandula guajiya gugukuatesa muavula.

 1 MAKALEGELO ATSHI ABONGA NGUDI NAWO?

Gujiya makalegelo aye abonga nu ndaga jiabonga wana gutshita, mbagugukuatesa ha gudishila mutshima.

GIFEZEGESELO GIDI MU BIBLIA: Mupostolo Pholo wasonegele egi: “Nga ngushigo mujiya guzuela, uvi gutema ngudi nago diago.” (2 Kolinto 11:6) Ujiyi wenji wakola wa Biblia wamuhanele ngolo tangua athu ako akhalele gumuphaga. Pholo gabembelego matangi abola a athu amulebese ha gudishila mutshima.2 Kolinto 10:10; 11:5.

DITALELE MUABONGA: Hafundo edi dialandula, sonega makalegelo aye abonga nu ndaga wajiya gukalagala.

Tanga makalegelo abonga udi nawo. (Gifua: Wakhala nu gisemo? Nu khadilo dia guhana? Athu ana gugushila mutshima? Wana gutagenesa mbimbi jiaye?)

2 MAKALEGELO ATSHI ALEBA NGUDI NAWO?

Luholo shinga yana gubatuga hafundo idi ya gujitshiga nu shinga iko, luholo lumoshi makalegelo aye abonga ajiya gubola gula wabemba egi guleba guaye gugutuameze.

GIFEZEGESELO GIDI MU BIBLIA: Pholo wakhalele mujiya muabonga makalegelo enji aleba. Wasonegele egi: “Ngudi musuangulugila mikhuala ya Nzambi moshi’a mutshima wami. Uvi ngudi mumona mukhuala uko mu izeza ya muila wami mulua ita nu mukhuala wa mutshima wami, wene udi mungunginyisa mu uhiga wa mukhuala wa gubola udi mukhalela mu mutshima wami.”Lomo 7:22, 23.

DITALELE MUABONGA: Khadilo ditshi dia guleba udi naye gubinga?

 3 MAFELELA ATSHI NGUDI NAWO?

Wajiya gungina mu gamiyo (mashinyi), wuwambele shofele egi amaganese gamiyo uvi abembe genji motere nu tshuya hagula esanse ihue ba? Mbayimonesa egi ushigo watema, wajiya gusha monyo waye mu gingonza!

Yahana longo ditshi? Gudihagela mafelela guajiya gugukuatesa ha gutuameza lujingu luaye ha gula uvutugago gungima. Idi gifua udi mujiya fundo dimoshi ngenyi udi muya, enji udi gudilonda ha guheta ha fundo diene.

GIFEZEGESELO GIDI MU BIBLIA: Pholo wasonegele egi: “Luholo ngudi mulenga phushi lushigo lua gituhu.” (1 Kolinto 9:26NW) Muene gabembelego egi ndaga jia lujingu luenji jimutuameze, wadihagele mafelela nu wajingile mu gudivua nu mafelela ene.Filiphi 3:12-14.

DITALELE MUABONGA: Hafundo edi dialandula, sonega mafelela thatu awa udi mutshigina gutagenesa mu givuo gidi muza.

4 MU NDAGA JITSHI NGANA GUSHA GUTSHIGINA?

Gila wadijiya muabonga, mbawukhala gifua mutshi udi nu miji yaleha, nga mvula ya gikudi ya noga, mbawubuigo

Gula ushigo nu ndaga wana gusha gutshigina, mbayikhala lamba hagula uzule desizio. Luholo lumoshi nu galungonya gana sombegesa mukubu, wajiya nji gubalumuna makalegelo aye ha gukalagala ndaga jiana tshita mafuta aye. Mbayimonesa diago egi ushigo gudijiya muabonga.

Uvi gula makalegelo aye adi gudivua nu ndaga jidi mu Biblia, mbayigukuatesa ha gubamba umuthu waye, ikhale athu ako adi mukalagala gubola.

GIFEZEGESELO GIDI MU BIBLIA: Hakhalele profete Danyele muvuala, “wazudile desizio nu mutshima umoshi” egi mbawutumagela mikhuala ya Nzambi, nga akhalelego mujinga fundo dimoshi nu fami yenji. (Danyele 1:8) Gukalagala luholo luene guamukuatesele ha gudibamba. Khadilo dia Danyele diakhalele gudivua nu gutshigina guenji.

DITALELE MUABONGA: Mvutu itshi wajiya guhana gu mihu eyi yalandula? Wana gutshigina egi Nzambi wakhala guene ba? Gula idi ngenyi, mukunda natshi? Ndaga jitshi jiana gugutshiginyisa egi Nzambi udi guene?

Wana gutshigina egi mikhuala ya Nzambi idi mukunda nu gubonga guaye? Gula idi ngenyi, mukunda natshi?

Hagusugisa, watshigina gukhala gifua—diyiji didi muhungumuga gu funji nga funji ishigo yabala ba? Nga watshigina gukhala gifua mutshi udi wagudijiga muabonga mu mavu nga gikudi gieza wanago gubua? Kolesa umuthu waye, ngenyi mbawukhala gifua mutshi. Enji, mbayigukuatesa ha guhana mvutu gu muhu owu: Ngudi diago nanyi?