Ndeye fundo didi milonga

Ndeye gu mito ya milonga

Matemue a Yehowa

Tomba zuelelo Kipende

 MUHU 6

Luholo Lutshi Ngajiya Gutuna Matangi Abola a Mafuta?

Luholo Lutshi Ngajiya Gutuna Matangi Abola a Mafuta?

MUKUNDA NATSHI IDI NU NDANDO

Gula udi mukalagala ngolo ha gudibamba, mbawumonesa egi udi mutuameza lujingu luaye nu ushigo mubemba egi athu ako alutuameze.

ITSHI WAJIYA GUKALAGALA?

Tala ndaga eyi: Tangua mafuta mbadi a Brian a mu khalasa adi musuena hehi, Brian wavua mutshima wa mutaphuga. Handaga mahugo mbadi mukatshi dia phoso eyi, akhalele gumutuma ha gunua makaya. Edi hugo dia thatu.

Mona mumoshi wa mu khalasa diawo wazuela egi:

“Matangua agasue wana khala aye hakhaye? Ngudi guguleza futa mumoshi.”

Tangua adi muzuela egi “futa,” wajiamuna diso, wazola gima gimoshi mu benga (khombe), wagihana Brian.

Brian wamona makaya ha mago a futa dienji, mutshima wa mutaphuga luko mangololo.

Brian wazuele egi “Ngabuba, ngamiwambelele gale egi . . .”

Mona muko wa mu khalasa diawo wazuela egi: “Yala, ukhadigo muthu waheya!”

Brian wazuela nu gikhesa giagasue egi: “Ngushigo muthu waheya!”

Mona wa mukhalasa wa mbadi washa koko dienji ha phanga ya Brian, wamuwambela mu mbimbi ya tuluga egi: “Zangula.”

Mona wathomo wa mukhalasa wasuenesa mutshi wa makaya hehi nu phala ya Brian, wamuwambela mu dizui diazonda egi: “Mbatushigo guyiwambela nga muthu. Gushigo nga muthu mbawuyijiya.”

Nga wakhalele ha fundo dia Brian, itshi wakhalele naye gukalagala?

 TANGIZA THOMO HA GUKALAGALA NDAGA!

Mafuta a Brian atangijile diago ndaga adi mukalagala? Azudile badesizio ene hakhawo ba? Ishigo ngenyi. Ene hakhawo abembele egi matangi a athu ako a atuameze. Akhalele nu funu egi mafuta awo atshigine ndaga jiawo. Hene, ahanele athu ako njila ya guzula badesizio ha fundo diawo.

Gila watagana nu ndaga ya luholo elu, itshi wajiya gukalagala ha gula ubinge matangi abola a mafuta aye?

  1. DILONDEGE GUMATUAMA

    Biblia idi muzuela egi: “Muthu watema, udi mulenga hadi muene mumona malamba muza, uvi gihulu gidi muditua muto muto, malamba adi mugibuiila.”Ishima 22:3.

    Tangua diko wajiya gumona malamba gumatuama. Tufezegese: wamona mafuta aye adi muza nu gunua makaya. Ha gulonda ndaga gumatuama, udi naye gujiya ndaga wajiya gukalagala.

  2. TANGIZA

    Biblia yazuela egi: “Mukhale nu mitshima ilaphe.”1 Phetelo 3:16.

    Dihule egi, ‘gula ngakalagala ndaga mafuta ami ana tshigina, mbangudivua luholo lutshi?’ Yadiago, mafuta aye mbaasuanguluga gula wakalagala ndaga ana gutshigina. Uvi, luholo lutshi mbawudivua gungima? Wasuanguluga gaye gubolesa ufuta waye nu Nzambi ha gusuanguluisa mafuta aye ba?Guzoga 23:2.

  3. ZULA DESIZIO

    Biblia idi muzuela egi: “Muthu watema wanatemeena ndaga jiabola.” Ishima 14:16.

    Tudi naye guzula badesizio nu gutshigina ndaga jiajiya gutubatela badesizio ene. Biblia idi muzuelela mala gifua Yosefi, Yobo, nu Yesu, azudile badesizio abonga. Idi muzuelela luko athu gifua Kayina, Esau, nu Yudasa, awa azudile badesizio abola. Aye giwa desizio ditshi mbawuzula?

Biblia idi muzuela egi: ‘Tshita ndaga jiabonga.’ (Ngimbo 37:3) Gila watangiza ndaga jiajiya gugubuila, walonda matangi aye, mbawumonyigo lamba ha guwambela athu ndaga udi mutshigina. Ngenyi, mbayigubamba.

Udisagesago: ushigo naye guwambela mafuta aye ndaga jiavula. Wajiya guaawambela phamba egi NDO. Nga ha gumonesa egi ushigo mubalumuna desizio diaye, wajiya guzuela egi:

  • “Mungushilago mutshima ndo!”

  • “Ngushigo mukalagala ndaga eyi ndo!”

  • “Mudihanyigo lamba, ngushigo guyikalagala ndo!”

Mulonga wa ndando udi guhana mvutu mbala imoshi nu gikhesa giagasue. Gula wakalagala ngenyi, mbawudihula ha gumona luholo mafuta aye mbaabemba gugusagesa!

 NDAGA TUAJIYA GUKALAGALA GULA ATHU ADI GUTULELA

Gila watshigina matangi abola mafuta aye adi guguwambela, mbawumbua gifua gima giawo gia gukenesa

Itshi wajiya gukalagala gula mafuta aye adi gugulela? Itshi wajiya gukalagala gula aguwambala egi, “gubola gudigui giwa, udi waheya diago!” Jiya egi mbimbi jia luholo elu jidi khuta usageshi wa mafuta. Luholo lutshi wajiya guhana mvutu? Udi nu ndaga mbadi wajiya gukalagala.

  • Wajiya gaye gutshigina mashingana awo. (“Yadiago, ngudi ngaheya!” Gungima wajiya guaawambela mukunda natshi.)

  • Wajiya gusugisa usageshi. Wambela asageshi ene mukunda natshi watunyi matangi awo, gungima tangiza nawo. (“Mudi munua makaya? Ngatangijile egi muakhala muatema diago!”)

Gula mafuta ene adi mulandula gugusagesa, katuga gaye! Ujimbilago egi gula wakatugilego muphushi, usageshi wajiya gukola diago. Gula wakatuga hafundo diene, mbawumonesa diago egi udi mutuna guhana mafuta aye njila ya gubolesa makalegelo aye.

Ya giamatshidia, mafuta aye mbaagusagesa. Uvi wajiya gutomba ndaga wajiya gukalagala, monesa matangi aye haphelo, enji tuameza lujingu luaye hakhaye. Gu gisugishilo, aye hakhaye mbawuzula desizio!Yoshua 24:15.