1. Mukunda nu itshi Nzambi wafugile mavu?

Yehowa wahanele mavu gua mala nu akhetu. Adi dimbo dietu. Tangua Yehowa wafugile Adama nu Eva, yala nu mukhetu wa thomo, yakhalele ndo avale ana haguya mujinga mudilu; mukunda wafugile gale anjelo ha gujinga mudilu. (Yobo 38:4, 7) Nzambi washile muthu wa thomo mu katshi dia paladiso yabonga yatamegewe egi masamba a Edena. (Gisendeselo 2:15-17) Yehowa wahuile anenji nu ajigulu enji felela dia gukhala nu monyo wa ivuo nu ivuo ha mavu.Tanga Lungimbo 37:29; 115:16.

Mu gisendeselo, masamba a Edena phamba akhalele paladiso. Adama nu Eva ene atogewe ha guzalesa mavu nu anawo. Mu gisugishilo, an’enji ahinyine mavu agasue enji guabalumuna paladiso. (Gisendeselo 1:28) Mavu mba shimubolesewa ndo. Mbadi musala ivuo nu ivuo dimbo di’athu.Tanga Lungimbo 104:5.

2. Mukunda nu itshi mavu ashigo paladiso mangino?

Adama nu Eva ashagele Nzambi, hene Yehowa wa akayele mu masamba. Paladiso yatotele, enji gushigo nu muthu mungoshi wanungile gudivutula. Biblia yazuela: “Mavu abua mu mago a muthu wa bola.”—Yobo 9:24.Tanga Gisendeselo 3:23, 24.

Yehowa wabembele matangi enji a gisendeselo mukunda nu athu ba? Ndo! Udi Muenya Ngolo jia Gasue. Ajiyile go gubela. (Yeshaya 45:18) Mba umuza mutshitshidisa athu monyo atshiginele akhale nawo mu gisendeselo.Tanga Lungimbo 37:11, 34.

3. Paladiso mba yivutuga luholo lutshi?

Paladiso mba yivutuga ha mavu mu Ufumu wa Yesu, Fumu watombewe gua Nzambi. Mbautuameza anjelo enji mbaushiya  mbalagaji jiagasue jia Nzambi mu ita yanatamegewa Halemagedona. Gungima, Yesu mbaumba Satana mu bologo ivuo 1 000. Akombeledi a Nzambi mbahuluga tangua Yesu mbashiya athu agasue abola, mukunda Yesu mbawatuameza enji mba wabamba. Mba aheta monyo wa ivuo nu ivuo mu Paladiso ha mavu.Tanga Yatuwuwe 20:1-3; 21:3, 4.

4. Malamba mbahua tangua ditshi?

Tangua ditshi Nzambi mbamanesa gubola ha mavu? Yesu wahanele “gijiyilo” gimumonesa egi suga idi hehi. Ndaga jidi mukalegewa ha mavu jidi musha monyo w’athu mu gingonza enji jiamonegesa egi tudi gu “suga ya gisugishilo ya gindongo gigi.”Tanga Matayo 24:3, 7-14, 21, 22.

Tangua Yesu mbahinyina mu Ufumu wenji mudilu ivuo 1 000, mba wumanesela malamba agasue ha mavu. (Yeshaya 9:6, 7; 11:9) Mba akhadi go phamba Fumu; uvi nji Muzueledi Wakoma wa Nzambi. Ngenyi mu njila ya Yesu, Nzambi mba ukatula misongo, kukola nu gufua.Tanga Yeshaya 25:8; 33:24.

5. Nanyi mba ujinga mu Paladiso imuza?

Mu Inzo ya Ufumu, mba udimumona athu anuzumba Nzambi enji anakamba gumusuanguluisa

Athu amutumagela Nzambi mba ajinga mu Paladiso. (1 Yone 2:17) Yesu watumine alandudi enji akambe athu a gudibulumuisa enji aalonge luholo lua gukhala athu abonga gu meso a Nzambi. Mangino, Yehowa umu londega inunu nu inunu y’athu haguheta monyo mu Paladiso imuza ha mavu. (Sefanya 2:3) Mu Jinzo jia Ufumu jia Mathemua a Yehowa, athu analonguga gukhala mala enji atata abonga, akhetu nu amama abonga. Mvuaji nu ana anakombelela Nzambi hamoshi, anu longuga luholo lutshi mene jia bonga jidi mu Biblia jiajiya gu’akuatesa.Tanga Mika 4:1-4.