Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Mene Jia Bonga Jiakatuga Gua Nzambi!

 LONGO DIA 3

Mene jiabonga jidi mu Biblia jiakatuga diago gua Nzambi?

Mene jiabonga jidi mu Biblia jiakatuga diago gua Nzambi?

1. Biblia idi mukanda wa nanyi?

Lumene lua bonga luazuela egi athu mbakhala nu monyo wa ivuo nu ivuo ha mavu ludi mu Biblia. (Lungimbo 37:29) Biblia idi nu tumikanda 66. Nzambi wayisonegesele mu njila ya athu 40 a gutshigina. Mikanda itano ya gudiangela yasonegewe gua Moize ivuo gubalega 3 500. Mukanda wa gusugisa wasonegewe gua mutumiwi Yone ivuo gubalega 1 900. Asonegi a Biblia amonegesele matangi a nanyi? Nzambi wasoluile nu asonegi a Biblia mu njila ya nyuma yenji ya bonga. (2 Samuele 23:2) Asonegele matangi a Nzambi, uvi awo ndo. Hene, Biblia idi mukanda wa Yehowa.Tanga 2 Timote 3:16; 2 Phetelo 1:20, 21.

2. Luholo lutshi tuajiya gutshigina egi Biblia yagatuga gua Nzambi?

Tuajiya egi Biblia yakatuga gua Nzambi mukunda idi mutendelela muabonga masugu adi muza. Gushi ndo muthu mumoshi wajiya guyikalagala. (Yoshua 23:14) Kaka Nzambi Wa Ngolo jia Gasue wajiya gumona mua bonga gutuama masuku a’athu amuza.Tanga Yeshaya 42:9; 46:10.

Gula diago mukanda wakatuga gua Nzambi wene udi naye gukhala wagudisha nu mikanda yagasue, nu Biblia idi ngenyi. Yazolewe inunu nu inunu nunji mu jikhama jia mazuelelo. Ata idi mukanda ukulu, Biblia yanagudivua nu ndaga jia sianse. Enji, asonegi ene 40 adishile ndo iphapha. *  Ndaga iko, mukatshi dienji tudi mumona egi Nzambi udi nu guzumba diago. Biblia idi nu ngolo jia gubalumuna muabonga mionyo y’athu. Ndaga jiji jagasue jatshiginisa inunu nu inunu y’athu egi Biblia idi Mbimbi ya Nzambi.Tanga 1 Tesalonike 2:13.

3. Biblia yanuzuelela itshi?

Biblia yanuzuelela muavula mene jia bonga jidimumonegesa egi Nzambi udi nu matangi a guzumba mukunda nu athu. Mbimbi ya Nzambi yanakotelesa luholo athu atotesele mu gisendeselo giawo luendu lua gukhala nu monyo mu paladiso ha mavu enji luholo Nzambi mba avutula paladiso.Tanga Yatuwiwe 21:4, 5.

Mukanda wene udi nu mikhuala, shigu enji nu malongo. Ndaga iko, Biblia idi mumonegesa luholo Nzambi anugudivua nu athu; yene idi gutukuatesa hagujiya luholo anutalela jindaga. Hene, Biblia yajiya gugukuatesa hagujiya Nzambi. Idi mukotelesa nji luholo lua gukuata ufuta nu Nzambi.Tanga Lungimbo 19:7, 11; Yakoba 2:23; 4:8.

4. Luholo lutshi wajiya gukuata ndaga jidi mu Biblia?

Gamukanda gaga gajiya gugukuatesa ha gukuata ndaga jidi mu Biblia ha gulandula luholo Yesu wakitshile. Wakhalele mukitshila baverse agudisha enji “wakotelesele Mukanda wa Nzambi.”Tanga Luka 24:27, 45.

Gushigo nu ndaga jia gusuanguluisa gubalega mene jia bonga jakatuga gua Nzambi. Uvi, athu ako anaguyikalegela ndo, ako yanagualebesa muila. Uvi aye, ulebesa ndo muila. Felela diaye dia gukhala nu monyo wa ivuo ni ivuo diakuatewa mu ngolo udi musha ha gulonguga gujiya Nzambi.Tanga Yone 17:3.

 

^ par. 3 Tala gamunda Un livre pour tous [mu Français].