Ndeye fundo didi milonga

Ndeye kudieji dia mito ya milonga yazonda

Ndeye gu mito ya milonga

Matemue a Yehowa

Kipende

Mene Jia Bonga Jiakatuga Gua Nzambi!

 LONGO DIA 10

Luholo lutshi lua gujiya gikombelelo gia matshidia?

Luholo lutshi lua gujiya gikombelelo gia matshidia?

1. Gikombelelo gia matshidia gidi phamba gimoshi ba?

“Mutemene ngambi jia mambo.”—MATAYO 7:15.

Yesu walongesele alandudi enji phamba gikombelelo gimoshi, gikombelelo gia matshidia. Wagifanesele nu njila yimuya gu monyo wa ivuo nu ivuo. Yesu wazuelele egi ‘athu azonda adi mu ngina muene.’ (Matayo 7:14) Nzambi wanatshigina phamba gikombelelo gianahata Mbimbi yenji ya matshidia. Akombeledi agasue adi hunji dimoshi mu gutshigina gumoshi.Tanga Yone 4:23, 24; 14:6; Efeso 4:4, 5.

2. Yesu wazuelele itshi mukunda nu aklisto a mambo?

“Ene anatshiginyisa egi tuajiya Nzambi, uvi anamutuna mu makalegelo awo.”—TITO 1:16.

Yesu watemesele egi ngambi jia mambo mba jibolesa gikombelelo gia Klisto. Ngambi jiene jianagudimonegesa gifua akombeledi a matshidia. Ikombelelo yawo yanuguditamega egi ya Klisto. Uvi tuajiya gujiya diago athu ene luholo anakhala. Luholo lutshi? Mukunda phamba gikombelelo gia matshidia gianazola aklisto amatshidia adi nu ifu nu makalagelo abonga.Tanga Matayo 7:13-23.

3. Luholo lutshi wajiya gujiya akombeledi amatshidia?

Talela njimbu jitano jia guajiyila:

  • Akombeledi amatshidia anutumagela Biblia, Mbimbi ya Nzambi. Anagudikolesa ha guhata mikhuala ya Nzambi. Hene, gikombelelo gia matshidia giadisha nu ikombelelo yanahata matangi a’athu. (Matayo 15:7-9) Akombeledi amatshidia anulonga ndo ndaga iko uvi adi mukalagala iko.Tanga Yone 17:17; 2 Timote 3:16, 17.

  • Alandudi a Yesu a matshidia ananemesa jina dia Nzambi, Yehowa. Yesu wanemesele jina dia  Nzambi mukunda wadidijigile gua athu. Wakuatesele athu ha gujiya Nzambi enji walongele ha gutoga egi jina dienji dikhale dia gijila. (Matayo 6:9) Mu dimbo dienu, gikombelelo gitshi gidi mulonga athu jina dia Nzambi?Tanga Yone 17:26; Loma 10:13, 14.

  • Aklisto amatshidia anulonga Ufumu wa Nzambi. Nzambi watumile Yesu ha mavu ha gulonga lukuma lua bonga lua Ufumu. Ufumu wa Nzambi wene udi phamba felela dia athu. Yesu wauzuelele tii nu gu gufua guenji. (Luka 4:43; 8:1; 23:42, 43) Wazuelele egi alandudi enji mbaulonga. Gula muthu weza guguwambela Ufumu wa Nzambi, wajiya gutangiza umukhala muenya gikombelelo gitshi?Tanga Matayo 24:14.

  • Alandudi a Yesu anagudinginyisa ndo mu ndaga jia mavu wawa abola. Walunga guajiya mukunda anagudinginyisa ndo mu ndaga jia politiki nu mu umbalagaji w’athu. (Yone 17:16; 18:36) Luyadi, anuhata ndo matangi nga makalegelo abola a mavu.Tanga Yakoba 4:4.

  • Aklisto amatshidia ana gudizumba muavula. Mbimbi ya Nzambi yanugualonga ha gunemesa athu a iphuta iko.Hene ikombelelo ya mambo yanugudinginyisa gu ita ya khanda nu khanda, uvi akombeledi amatshidia anagudinginyisa ndo. (Mika 4:1-3) Ha gudisha, akombeledi a matshidia anakitshila muabonga tangua nu umonyi wawo ha gukuatesa nu gukolesa athu.Tanga Yone 13:34, 35; 1 Yone 4:20.

4. Wajiya guzuela gikombelelo gitshi gidi gia matshidia?

Gikombelelo gitshi gishina gia malongi’enji gidi mu Mbimbi ya Nzambi, gianunemesa jina dia Nzambi, enji gianulonga egi Ufumu wa Nzambi udi phamba felela dia athu? Gikombelelo gitshi gianumonesa guzumba enji gianungina ndo mu ita? Watangiza itshi?Tanga 1 Yone 3:10-12.